ଭବାନୀପାଟଣା,୨୩/୬: ସୋମବାର ଭବାନୀପାଟଣା ଟାଉନ ଥାନା ପୁଲିସ ପକ୍ଷରୁ ସ୍ଥାନୀୟ ଟିଭିସେଣ୍ଟରପଡ଼ାରେ ଚଢ଼ାଉ କରି ୭.୭୬୦ କିଲୋଗ୍ରାମ ବେଆଇନ୍ ଗଞ୍ଜେଇ ଜବତ କରାଯାଇଛି। ଏଥିରେ ସଂପୃକ୍ତ ଗଞ୍ଜେଇ ଚାଲାଣକାରୀ ଜନୈକା ୪୨ ବର୍ଷିୟା ମହିଳା ସୁଲେଖା ଦେବି ସମେତ ଶଶିକାନ୍ତ ସାହାଣୀ(୩୩) ନାମକ ଯୁବକଙ୍କୁ ଗିରଫ କରି ପୁଲିସ କୋର୍ଟ ଚାଲାଣ କରିଛି। ଉଭୟଙ୍କ ଘର ବିହାରର ମୁଜାଫରପୁର ଜିଲ୍ଲା କୁରହାନି ଥାନା ଅନ୍ତର୍ଗତ ବସଉଲି ଗାଁରେ ବୋଲି କୁହାଯାଇଛି।
ବିଶ୍ଵସ୍ତ ସୂତ୍ରରୁ ଖବର ପାଇ ଆଜି ଭବାନୀପାଟଣା ପୁଲିସ ସହରର ଟିଭିସେଣ୍ଟରପଡ଼ାରେ ଚଢାଉ କରିଥିଲା। ଅଭିଯୁକ୍ତ ମାନେ ଏକ ସୁଟକେଶ୍ରେ ବାହାର ରାଜ୍ୟକୁ ବେଆଇନ୍ ଗଞ୍ଜେଇ ଚୋରା ଚାଲାଣ କରୁଥିବା ବେଳେ ଧରାପଡ଼ିଥିଲେ। ସେମାନେ ବ୍ୟବହାର କରୁଥିବା ଏକ ସ୍କୁଟି, ଦୁଇଟି ମୋବାଇଲ ଓ ୬ଟି ଏଟିଏମ୍ କାର୍ଡ ମଧ୍ୟ ଜବତ ହୋଇଥିବା ଟାଉନ୍ ଥାନା ଅଧିକାରୀ ଯଶୋବନ୍ତ ହିଆଲ ସୂଚନା ଦେଇଛନ୍ତି। ଏହି ମାମଲାରେ ଅନ୍ୟ ସମ୍ପୃକ୍ତ ଅଭିଯୁକ୍ତଙ୍କୁ ଗିରଫ କରିବା ପାଇଁ ଅଧିକ ତଦନ୍ତ ଜାରି ରହିଥିବା କୁହାଯାଇଛି।
