ନୂଆଦିଲ୍ଲୀ,୨୨।୭: ଅଷ୍ଟମ ବେତନ କମିଶନ ସମ୍ପର୍କରେ ସରକାରଙ୍କ ପକ୍ଷରୁ ଆସିଛି ଏକ ବଡ଼ ସୂଚନା। ଏହା କାର୍ଯ୍ୟକାରୀ ହେବା ସହିତ, କେନ୍ଦ୍ରୀୟ କର୍ମଚାରୀ ଏବଂ ପେନସନଭୋଗୀଙ୍କ ଦରମା, ଭତ୍ତା ଏବଂ ପେନସନରେ ଏକ ବଡ଼ ପରିବର୍ତ୍ତନ ଆସିବ। ସରକାର ଏହାକୁ କାର୍ଯ୍ୟକାରୀ କରିବା ପାଇଁ ପଦକ୍ଷେପ ନେଇଛନ୍ତି ଏବଂ ଅର୍ଥ ମନ୍ତ୍ରଣାଳୟ CPC ଗଠନ ପାଇଁ ପ୍ରାରମ୍ଭିକ ଆଲୋଚନା ଆରମ୍ଭ କରିଛି। ସଂସଦର ମୌସୁମୀ ଅଧିବେଶନ ସମୟରେ ଲୋକସଭାରେ ଏକ ଲିଖିତ ଉତ୍ତରରେ, ଅର୍ଥ ରାଷ୍ଟ୍ରମନ୍ତ୍ରୀ ପଙ୍କଜ ଚୌଧୁରୀ ଏ ସମ୍ପର୍କିତ ସୂଚନା ପ୍ରଦାନ କରିଛନ୍ତି।
ପିଟିଆଇର ଏକ ରିପୋର୍ଟ ଅନୁସାରେ, ଅର୍ଥମନ୍ତ୍ରଣାଳୟ ଅଷ୍ଟମ ବେତନ କମିଶନ ସମ୍ପର୍କରେ ପ୍ରମୁଖ ବିଭାଗ, ମନ୍ତ୍ରଣାଳୟ ଏବଂ ରାଜ୍ୟ ସରକାରଙ୍କ ସହିତ ପରାମର୍ଶ ଆରମ୍ଭ କରିଛି। ଏଥିରେ ପ୍ରତିରକ୍ଷା ମନ୍ତ୍ରଣାଳୟ, ଗୃହ ମନ୍ତ୍ରଣାଳୟ, କାର୍ମିକ ଏବଂ ତାଲିମ ମନ୍ତ୍ରଣାଳୟ ଏବଂ ବିଭିନ୍ନ ରାଜ୍ୟ ସରକାର ଅନ୍ତର୍ଭୁକ୍ତ ରହିଛନ୍ତି। ଲୋକସଭାରେ ଏକ ଲିଖିତ ଉତ୍ତରରେ, ଅର୍ଥ ରାଷ୍ଟ୍ରମନ୍ତ୍ରୀ ପଙ୍କଜ ଚୌଧୁରୀ ଏ ସମ୍ପର୍କରେ ଚିତ୍ର ସ୍ପଷ୍ଟ କରିଛନ୍ତି । ସେ କହିଛନ୍ତି ଯେ ସମସ୍ତଙ୍କଠାରୁ ମତାମତ ମଗାଯାଇଛି ଏବଂ କମିଶନ ଆନୁଷ୍ଠାନିକ ବିଜ୍ଞପ୍ତି ଜାରି ହେବା ପରେ ଏହାର ଅଧ୍ୟକ୍ଷ ଏବଂ ଅନ୍ୟାନ୍ୟ ସଦସ୍ୟଙ୍କୁ ନିଯୁକ୍ତ କରାଯିବ। ତଥାପି, ସେ ସ୍ପଷ୍ଟ କରିଛନ୍ତି ଯେ ଏପର୍ଯ୍ୟନ୍ତ କୌଣସି ନାମ ଘୋଷଣା କରାଯାଇ ନାହିଁ।
ବର୍ତ୍ତମାନ ସୁଦ୍ଧା, ଅଷ୍ଟମ ବେତନ କମିଶନର ସରକାରୀ ସୁପାରିଶ ପ୍ରସ୍ତୁତ ହୋଇନାହିଁ, କିନ୍ତୁ ପୂର୍ବ କମିଶନଗୁଡ଼ିକ ଦ୍ୱାରା ସ୍ଥିର କରାଯାଇଥିବା ଢାଞ୍ଚା ଅନୁସାରେ ସେଗୁଡ଼ିକର କରାଯିବ ବୋଲି ଆଶା କରାଯାଉଛି। ଉଲ୍ଲେଖନୀୟ ଯେ ସପ୍ତମ ବେତନ କମିଶନ ଫେବୃଆରୀ ୨୦୧୪ ରେ ଗଠିତ ହୋଇଥିଲା, କିନ୍ତୁ ଏହାର ସୁପାରିଶ ୧ ଜାନୁଆରୀ ୨୦୧୬ ରୁ କାର୍ଯ୍ୟକାରୀ ହୋଇଥିଲା। ଏଭଳି ସ୍ଥିତିରେ କୁହାଯାଉଛି ଯେ, ଟାଇମଲାଇନ୍କୁ ଦୋହରାଇ ଅଷ୍ଟମ ବେତନ କମିଶନ ସୁପାରିଶକୁ ୧ ଜାନୁଆରୀ ୨୦୨୬ ରୁ କାର୍ଯ୍ୟକାରୀ କରିପାରନ୍ତି। ନୂତନ ବେତନ କମିଶନ କାର୍ଯ୍ୟକାରୀ କରିବା ପ୍ରଶ୍ନରେ ପଙ୍କଜ ଚୌଧୁରୀ କହିଛନ୍ତି, ଅଷ୍ଟମ କେନ୍ଦ୍ରୀୟ ବେତନ କମିଶନ ଏହାର ସୁପାରିଶ କରିବା ଏବଂ ସରକାରଙ୍କ ଦ୍ୱାରା ଗ୍ରହଣ କରାଯିବା ପରେ ହିଁ ଏହା କାର୍ଯ୍ୟକାରୀ ହେବ। ଏହାଦ୍ବାରା ୫୦ ଲକ୍ଷ କର୍ମଚାରୀ ଓ ୬୫ ଲକ୍ଷ ପେନଶନଧାରୀଙ୍କୁ ଲାଭ ମିଳିବ।
