ନୂଆଦିଲ୍ଲୀ: ବିରୋଧୀ ମେଣ୍ଟ ଇଣ୍ଡିଆର ସହଯୋଗୀ ଦଳ ଆମ ଆଦମୀ ପାର୍ଟି (ଆପ୍) । ଆସନ୍ତା ଲୋକସଭା ନିର୍ବାଚନ ପୂର୍ବରୁ ବହୁ ବିଚାର ବିମର୍ଶ ପରେ କଂଗ୍ରେସ ଏବଂ ଆପ୍ ମଧ୍ୟରେ ଆସନ ଭାଗବଣ୍ଟାକୁ ନେଇ ସହମତି ପ୍ରକାଶ ପାଇଥିଲା । ୪-୩ ଫର୍ମୁଲାରେ ଆପ ଓ କଂଗ୍ରେସ ରାଜି ହୋଇଥିଲେ । ଆଉ ଆଜି ୪ଟି ଆସନ ଲାଗି ପ୍ରାର୍ଥୀ ଘୋଷଣା କରିଛି ଆପ୍ ।
ନୁଆ ଦିଲ୍ଲୀରୁ ସୋମନାଥ ଭାରତୀଙ୍କୁ ଦଳ ପ୍ରାର୍ଥୀ କରିଥିବା ବେଳେ ଦକ୍ଷିଣ ଦିଲ୍ଲୀରୁ ସହି ରାମ ପହଲବାନ ନିର୍ବାଚନ ଲଢ଼ିବେ । ପୂର୍ବଦିଲ୍ଲୀରୁ କୁଲଦୀପ କୁମାର ଏବଂ ପଶ୍ଚିମ ଦିଲ୍ଲୀରୁ ମହାବଳ ମିଶ୍ରଙ୍କୁ ପ୍ରାର୍ଥୀ କରିଛି ଆପ୍ । ଏହା ବ୍ୟତୀତ ହରିୟାଣାର କୁରୁକ୍ଷେତ୍ର ଲୋକସଭା ଆସନରୁ ଆପ୍ ପ୍ରାର୍ଥୀ ହେବେ ସୁଶୀଲ ଗୁପ୍ତା । ତେବେ ୫ଟି ରାଜ୍ୟରେ ୨୩ଟି ଲୋକସଭା ଆସନରେ ନିର୍ବାଚନ ଲଢ଼ିବ ଆପ୍ । ଏହା ପୂର୍ବରୁ ୫ ପ୍ରାର୍ଥୀଙ୍କ ନାଁ ଦଳ ଘୋଷଣା କରିସାରିଥିବା ବେଳେ ଆଜି ଆଉ ୫ ପ୍ରାର୍ଥୀଙ୍କ ନାଁ ଘୋଷଣା କରିଛି ।
ଆପ୍ ନେତା ଗୋପାଳ ରାୟ ସାମ୍ବାଦିକ ସମ୍ମିଳନୀରେ କହିଛନ୍ତି, ଆପ ପ୍ରାର୍ଥୀ ଦିଲ୍ଲୀ, ହରିୟାଣା, ଗୁଜରାଟ, ପଞ୍ଜାବ ଏବଂ ଆସାମରେ ନିର୍ବାଚନ ଲଢ଼ିବେ । ସେ ଆହୁରି କହିଛନ୍ତି ଯେ, ପୂର୍ବ ଦିଲ୍ଲୀ ଲୋକସଭା ଆସନ ଲାଗି ବଡ଼ ନିର୍ଣ୍ଣୟ ଗ୍ରହଣ କରିଛି । କୋଣ୍ଡଳିର ଆପ୍ ବିଧାୟକ କୁଲଦୀପ କୁମାରଙ୍କୁ ଏଠାରୁ ପ୍ରାର୍ଥୀ କରିଛି ଦଳ । ଏହି ଆସନ ଅଣସଂରକ୍ଷିତ ବର୍ଗଙ୍କ ଲାଗି ଥିବା ବେଳେ କୁଲଦୀପ କୁମାର ଅନୁସୂଚିତ ଜାତି (ଏସ୍ସି) ବର୍ଗରୁ ଆସୁଛନ୍ତି । ଏହାକୁ ଐତିହାସିକ ନିଷ୍ପତ୍ତି ବୋଲି ଗୋପାଳ ରାୟ କହିଛନ୍ତି ।
