ନୂଆଦିଲ୍ଲୀ,୧୪/୧୦: ବିହାର ବିଧାନସଭା ନିର୍ବାଚନ ପାଇଁ ଆସନ ବୁଝାମଣାକୁ ନେଇ ମହାମେଣ୍ଟରେ ଫାଟ ସୃଷ୍ଟି ହୋଇଛି । ଯାହାଫଳରେ କଂଗ୍ରେସ ରାଜ୍ୟର ସମସ୍ତ ୨୪୩ଟି ଆସନରେ ନିର୍ବାଚନ ଲଢ଼ିବାକୁ ରଣନୀତି ପ୍ରସ୍ତୁତ କରୁଛି । ଏହି କାରଣରୁ ଦଳର କେନ୍ଦ୍ରୀୟ ନେତୃବୃନ୍ଦ ରାଜ୍ୟ ଶାଖାଠାରୁ ୨୪୩ଟି ଆସନରେ ସମ୍ଭାବ୍ୟ ପ୍ରାର୍ଥୀଙ୍କ ତାଲିକା ମାଗିଛି ।
ରାଜଧାନୀ ଦିଲ୍ଲୀରେ କଂଗ୍ରେସ ଅଧ୍ୟକ୍ଷ ମଲିକାର୍ଜୁନ ଖଡ୍ଗେଙ୍କ ବାସଭବନରେ ସୋମବାର ରାତିରେ ସିଇସିର ଏକ ଜରୁରି ବୈଠକ ହୋଇଥିଲା । ବୈଠକରେ ସକିଲ ଅହମ୍ମଦ, ରାଜେଶ ରାମ, କୃଷ୍ଣା ଆଲାଭରୁ, ନାସିର ହୁସେନ ଓ କେ.ସି ବେଣୁଗୋପାଳ ପ୍ରମୁଖ ସାମିଲ ହୋଇଥିଲେ । କଂଗ୍ରେସ ତାର ସମସ୍ତ ବଡ଼ ନେତାମାନଙ୍କୁ ଦିଳ୍ଲୀରେ ରହିବାକୁ ପରାମର୍ଶ ଦେଇଛି । ତେବେ ବୈଠକରେ କ'ଣ ନିଷ୍ପତ୍ତି ନିଆଯାଇଛି ତାହା ସ୍ପଷ୍ଟ ହୋଇନାହିଁ । କୁହାଯାଉଛି କି ବିହାର ପାଇଁ ପ୍ରଥମ ପର୍ଯ୍ୟାୟରେ କଂଗ୍ରେସ ୭୬ ପ୍ରାର୍ଥୀଙ୍କ ନାମ ଚୂଡାନ୍ତ କରିଛି । ଏହି ତାଲିକାରେ ମୋହର ଲାଗିବା ପରେ ସେମାନଙ୍କୁ ସର୍ତ୍ତ ନାମାଙ୍କନ ଦାଖଲ କରିବାକୁ ଅନୁମତି ଦିଆଯିବ । ଅର୍ଥାତ ଯଦି ବୁଝାମଣା ହୁଏ ତେବେ ଯେଉଁସବୁ ଆସନ କଂଗ୍ରେସ ହାତକୁ ନଯିବ ସେଠାରୁ ପ୍ରାର୍ଥୀମାନେ ନାମାଙ୍କନ ପ୍ରତ୍ୟାହାର କରିବେ ।
ସେପଟେ ଆରଜେଡି ସୁପ୍ରିମୋ ଲାଲୁ ପ୍ରସାଦ ଯାଦବ, ପତ୍ନୀ ରାବ୍ରୀ ଦେବୀ ଓ ପୁଅ ତେଜସ୍ୱୀ ଯାଦବ ଦିଲ୍ଲୀ ଯାଇଥିଲେ । ଆଇଆରସିଟିସି ମାମଲାରେ ସେମାନେ କୋର୍ଟରେ ହାଜର ହେବାକୁ ଥିଲା । ଚର୍ଚ୍ଚା ହେଉଥିଲା କି ଦିଲ୍ଲୀରେ ସେମାନେ କଂଗ୍ରେସ ଅଧ୍ୟକ୍ଷ ଖଡ୍ଗେ ଓ ସାଂସଦ ରାହୁଲ ଗାନ୍ଧୀଙ୍କୁ ଭେଟି ଆସନ ବୁଝାମଣା ଚୂଡାନ୍ତ କରିବେ । କିନ୍ତୁ ସେମାନେ କଂଗ୍ରେସ ନେତାଙ୍କୁ ଭେଟିନାହାନ୍ତି । କୋର୍ଟରେ ହାଜର ହେବା ପରେ ସିଧାସଳଖ ପାଟନା ଫେରି ଆସିଛନ୍ତି । ପାଟନାସ୍ଥିତ ବାସଭବନରେ ପହଞ୍ଚିବା ପରେ ଲାଲୁ ଦଳୀୟ ପ୍ରାର୍ଥୀଙ୍କୁ ନିର୍ବାଚନ ଚିହ୍ନ ବାଣ୍ଟିବା ଆରମ୍ଭ କରିଦେଇଛନ୍ତି । ବେଗୁସରାଇ ଜିଲ୍ଲାର ମଟିହାନି ଆସନରେ ବାଗୋ ସିଂହଙ୍କୁ ଆରଜେଡି ଚିହ୍ନ ମିଳିଛି । ଭୋଜପୁରର ସନ୍ଦେଶ ଆସନରେ ଅରୁଣ ଯାଦବଙ୍କ ପୁଅ ଦୀପୁ ଯାଦବଙ୍କୁ ଚିହ୍ନ ଆବଣ୍ଟନ କରାଯାଇଛି । ସେହିଭଳି ପରବତା ଆସନରୁ ସଞ୍ଜୀବ ସିଂହଙ୍କୁ ଦଳୀୟ ଚିହ୍ନ ଦିଆଯାଇଛି । ସେ ନିକଟରେ ଜେଡିୟୁ ଛାଡି ଆରଜେଡିରେ ସାମିଲ ହୋଇଥିଲେ । ବିଭିନ୍ନ ଆସନରେ ମନୋନୀତ ହୋଇଥିବା ପ୍ରାର୍ଥୀମାନଙ୍କୁ ପ୍ରଥମ ପର୍ଯ୍ୟାୟ ନିର୍ବାଚନ ଲାଗି ପ୍ରାର୍ଥିପତ୍ର ଦାଖଲ କରିବାକୁ ପ୍ରସ୍ତୁତ ରହିବା ଲାଗି କୁହାଯାଇଛି । କାରଣ ୧୭ ତାରିଖ ହେଉଛି ପ୍ରାର୍ଥିପତ୍ର ଦାଖଲର ଶେଷ ତାରିଖ ।
ଅନ୍ୟପକ୍ଷରେ କଂଗ୍ରେସ ଭିଆଇପି ମୁଖ୍ୟ ମୁକେଶ ସାହାନୀଙ୍କୁ ଦିଲ୍ଲୀ ଡାକିଛି । ତାଙ୍କ ସହ ଆସନ ବୁଝାମଣା କରିବାକୁ ଡକାଯାଇଛି ଏବଂ ସେ ଦିଲ୍ଲୀରେ ମଧ୍ୟ ପହଞ୍ଚିଛନ୍ତି । କିନ୍ତୁ ଆରଜେଡି ଇତିମଧ୍ୟରେ ଭିଆଇପିକୁ ୧୮ ଆସନ ଦେବାକୁ ଘୋଷଣା କରିଛି । ତେବେ ଏଥିରେ ଆରଜେଡି ସର୍ତ୍ତ ରଖିଛି । ସର୍ତ୍ତ ଅନୁସାରେ ଭିଆଇପି ୮ ଆସନରେ ନିଜସ୍ୱ ପ୍ରାର୍ଥୀ ଦେବ ଏବଂ ବାକି ୧୦ ଆସନରେ ଆରଜେଡି ନେତାମାନେ ଭିଆଇପି ଟିକଟରେ ଲଢ଼ିବେ । ତେବେ ଏଭଳି ସର୍ତ୍ତରେ ଭିଆଇପି ରାଜି ହୋଇଛି କି ନାହିଁ ତାହା ଜଣାପଡିନାହିଁ ।
