ନୂଆଦିଲ୍ଲୀ,୧୬/୦୯: ପୁଲିସ ଥାନାରେ ସିସିଟିଭି କ୍ୟାମେରାର ଅଭାବ ସହ ଜଡ଼ିତ ମାମଲାରେ ସୋମବାର ସୁପ୍ରିମକୋର୍ଟରେ ଶୁଣାଣି ହୋଇଥିଲା । ଏହି ସମୟରେ ସୁପ୍ରିମକୋର୍ଟ କହିଛନ୍ତି, ଦେଶର ସବୁ ଥାନାରେ ସିସିଟିଭି ଲଗାଇବା ଜରୁରି । ସେହିପରି ରେକର୍ଡିଂ ଯାଞ୍ଚ ଲାଗି କଣ୍ଟ୍ରୋଲ ରୁମ୍ ଖୋଲିବା ଉପରେ କୋର୍ଟ ଗୁରୁତ୍ୱାରୋପ କରିଛନ୍ତି । ଏକ ଖବରକାଗଜରେ ପ୍ରକାଶିତ ରିପୋର୍ଟ ଉପରେ କୋର୍ଟ ସ୍ୱତଃ ସଂଜ୍ଞାନ ନେଇ ଏହା କହିଛନ୍ତି । ଏଥିସହ ମାମଲାରେ ରାୟକୁ ସଂରକ୍ଷିତ ରଖିଛନ୍ତି । ସେପ୍ଟେମ୍ବର ୨୬ରେ ଏଥିନେଇ ଚୂଡ଼ାନ୍ତ ରାୟ ଆସିବ ।
ନିକଟରେ ‘ଦୈନିକ ଭାସ୍କର’ରେ ପ୍ରକାଶିତ ଏକ ଆଲେଖ୍ୟରେ ରାଜସ୍ଥାନରେ ବିଗତ ୮ ମାସ ମଧ୍ୟରେ ପୁଲିସ କଷ୍ଟଡିରେ ୧୧ ଜଣଙ୍କ ମୃତ୍ୟୁ ହୋଇଥିବା ଉଲ୍ଲେଖ କରାଯାଇଥିଲା । ସେଥିମଧ୍ୟରୁ ଉଦୟପୁର ଡିଭିଜନ୍ରେ କେବଳ ୭ ଜଣଙ୍କର ମୃତ୍ୟୁ ହୋଇଥିଲା । ଏହାର ଶୁଣାଣି କରି ଜଷ୍ଟିସ୍ ବିକ୍ରମ ନାଥ ଓ ଜଷ୍ଟିସ୍ ସନ୍ଦୀପ ମେହତାଙ୍କ ଖଣ୍ଡପୀଠ କହିଛନ୍ତି, ଏହି ମାମଲା ହେଉଛି ଅନୁଧ୍ୟାନର । ଥାନାରେ ସିସିଟିଭି ନଥିବାରୁ ଅନୁଧ୍ୟାନରେ ସମସ୍ୟା ହେଉଛି । ସେହିପରି ଥାନାରେ ସିସିଟିଭି ଲାଗିଲେ ବି କାଲି ଅଧିକାରୀ କ୍ୟାମେରାକୁ ବନ୍ଦ କରିପାରନ୍ତି । ଏପରିସ୍ଥଳେ ରେକର୍ଡିଂ ଯାଞ୍ଚ ଲାଗି ଆମେ ଏମିତି ଏକ କଣ୍ଟ୍ରୋଲ ରୁମ୍ ଚାହୁଁଛୁ ଯେଉଁଥିଲେ ମାନବିକ ହସ୍ତକ୍ଷେପ ସର୍ବନିମ୍ନ ରହିବ । ଆଇଆଇଟିଗୁଡି଼କୁ ସାମିଲ କରି ଏଭଳି ସିଷ୍ଟମ ବନାଇବା ଉପରେ ବିଚାର କରିହେବ । ସେମାନେ ଏମିତି ଏକ ସଫ୍ଟୱେର ଦେବେ ଯେଉଁଥିରେ ପ୍ରତି ସିସିଟିଭି ଫୁଟେଜ୍ର ଅନୁଧ୍ୟାନ କରିହେବ । କୌଣସି କ୍ୟାମେରା ବନ୍ଦ ହୋଇଗଲେ ତୁରନ୍ତ କଣ୍ଟ୍ରୋଲ ରୁମ୍କୁ ସୂଚନା ମିଳିବ । ଏହି ଅନୁଧ୍ୟାନ ମାନବୀୟ ନ ହୋଇ ପୂରାପୂରି କୃତ୍ରିମ ବୁଦ୍ଧିମତ୍ତା ଉପରେ ହେବାକୁ କୋର୍ଟ ଗୁରୁତ୍ୱାରୋପ କରିଥିଲେ ।
ଏହାପୂର୍ବରୁ ୨୦୧୮ରେ ସୁପ୍ରିମକୋର୍ଟ ମାନବାଧିକାର ଉଲ୍ଲଂଘନକୁ ରୋକିବାକୁ ସବୁ ରାଜ୍ୟକୁ ପୁଲିସ ଥାନାରେ ସିସିଟିଭି ଲଗାଇବାକୁ ନିର୍ଦ୍ଦେଶ ଦେଇଥିଲେ । ପରବର୍ତ୍ତୀ ସମୟରେ ୨୦୨୦ରେ ସିବିଆଇ, ଇଡି, ଏନ୍ଆଇଏ ଭଳି ତଦନ୍ତକାରୀ ଏଜେନ୍ସିର ଅଫିସ୍ରେ ମଧ୍ୟ କ୍ୟାମେରା ଲଗାଯିବା କଥା କହିଥିଲେ । ତେବେ ଅଦ୍ୟାବଧି କିଛି ରାଜ୍ୟ ନିଜର ପୁଲିସ ଥାନାରେ କ୍ୟାମେରା ଲଗାଇଥିବା ବରିଷ୍ଠ ଓକିଲ ତଥା ଏହି ମାମଲାରେ ଆମିକସ୍ କ୍ୟୁରି ସିଦ୍ଧାର୍ଥ ଦାଭେ ଦର୍ଶାଇଥିଲେ।
