କଟକ,୨୩/୦୯: କଟକ ଜିଲ୍ଲାର ଜମିଜମା ରେକର୍ଡର ଡିଜିଟାଇଜେସନ୍ ଏବଂ ସ୍କାନିଂ କରାଯିବ । ଏଥିପାଇଁ ୨ କୋଟି ୨୧ ଲକ୍ଷ ୪୪ ହଜାର ୬୩୪ ଟଙ୍କା ଖର୍ଚ୍ଚ ହେବ । ଏହି ଅର୍ଥ ଯୋଗାଇ ଦେବାଲାଗି ଲ୍ୟାଣ୍ଡ ରେକର୍ଡ ନିର୍ଦ୍ଦେଶକ, ରାଜ୍ୟ ରାଜସ୍ୱ ବିଭାଗ ସଚିବଙ୍କୁ ଚିଠି ଲେଖିଛନ୍ତି ।
କଟକ ଜିଲ୍ଲାର ଜମିଜିମା ରେକର୍ଡ ରୁମ୍ ଜିଲ୍ଲାପାଳଙ୍କ କାର୍ଯ୍ୟାଳୟ ନିକଟରେ ରହିଛି । ଏହି ରେକର୍ଡ ରୁମ୍ରେ କେବଳ କଟକ ଜିଲ୍ଲା ନୁହେଁ ଉପକୂଳବର୍ତ୍ତୀ ଜଗତସିଂହପୁର, କେନ୍ଦ୍ରାପଡ଼ା, ଯାଜପୁର ଆଦି ଜିଲ୍ଲାର ସମସ୍ତ ଜମିର ରେକର୍ଡପତ୍ର ରହିଛି । ନିକଟରେ ଜଗତସିଂହପୁର ଜିଲ୍ଲାର ରେକର୍ଡପତ୍ର ସେହି ଜିଲ୍ଲାକୁ ନିଆଯାଇଛି । ଅନ୍ୟସବୁ ଜିଲ୍ଲାର ରେକର୍ଡପତ୍ର ଏବେ ବି ସେହି ରେକର୍ଡ ରୁମ୍ରେ ରହିଛି । ଏହି ରେକର୍ଡ ରୁମ୍ଟି ଇଂରେଜମାନଙ୍କ ସମୟରେ ନିର୍ମାଣ ହୋଇଥିବାବେଳେ ଏହାକୁ ନବୀକରଣ କରାଯାଇନି । ଫଳରେ ରେକର୍ଡ ରୁମ୍ରୁ ବିଭିନ୍ନ ସ୍ଥାନରେ ବର୍ଷାଜଳ ଗଳି ପୁରୁଣା ରେକର୍ଡଗୁଡ଼ିକ ନଷ୍ଟ ହୋଇଯାଉଛି । ଏ ସଂକ୍ରାନ୍ତରେ ଗତ କିଛିମାସ ତଳେ ‘ପ୍ରମେୟ’ରେ ବିସ୍ତୃତ ରିପୋର୍ଟ ପ୍ରକାଶ ପାଇଥିଲା ।
ଏହି ରିପୋର୍ଟ ପ୍ରକାଶ ପାଇବା ପରେ ମୈତ୍ରୀ ସଂସଦ ସଭାପତି ଅଜୟ କୁମାର ମହାନ୍ତି ଲ୍ୟାଣ୍ଡ ରେକର୍ଡରେ ଏକ ସ୍ମାରକପତ୍ର ପ୍ରଦାନ କରି ରେକର୍ଡ ରୁମ୍ର ତୁରନ୍ତ ମରାମତି ପାଇଁ ପଦକ୍ଷେପ ନେବାକୁ ସେ ଦାବି କରିଥିଲେ । ଏହି ସ୍ମାରକପତ୍ର ଏବଂ ‘ପ୍ରମେୟ’ ରିପୋର୍ଟକୁ ଆଧାର କରି ଲ୍ୟାଣ୍ଡ ରେକର୍ଡ ପକ୍ଷରୁ କଟକ ଅତିରିକ୍ତ ଜିଲ୍ଲାପାଳଙ୍କୁ ରିପୋର୍ଟ ତଲବ କରାଯାଇଥିଲା । ଏହି ରେକର୍ଡ ରୁମ୍ର ଡିଜିଟାଇଜେସନ୍ ଏବଂ ସ୍କାନିଂ ପାଇଁ କେତେ ଅର୍ଥ ଖର୍ଚ୍ଚ ହେବ ତାହାର ଏକ ଆକଳନ କରି ଦେବାକୁ କୁହାଯାଇଥିଲା । ଅତିରିକ୍ତ ଜିଲ୍ଲାପାଳ ରିପୋର୍ଟ ଦେବା ପରେ ଲ୍ୟାଣ୍ଡ ରେକର୍ଡ ନିର୍ଦ୍ଦେଶକ ବିଜୟ ଖଣ୍ଡାୟତରାୟ, ରାଜ୍ୟ ରାଜସ୍ୱ ବିଭାଗ ସଚିବଙ୍କୁ ଏହି ଅର୍ଥ ଯୋଗାଇ ଦେବାକୁ ଅନୁରୋଧ କରିଛନ୍ତି । ଏହି ଅର୍ଥ ମିଳିବା ପରେ ରେକର୍ଡ ରୁମ୍ର ଡିଜିଟାଇଜେସନ୍ କାର୍ଯ୍ୟ ଆରମ୍ଭ ହେବ ।
