ନୂଆଦିଲ୍ଲୀ,୦୪/୧୧: ଆଇସିସି ପାକିସ୍ତାନୀ ଦ୍ରୁତ ବୋଲର ହାରିସ ରଉଫଙ୍କୁ ଦୁଇଟି ମ୍ୟାଚ୍ ପାଇଁ ନିଲମ୍ବିତ କରିଛି। ଆଇସିସିର ମ୍ୟାଚ୍ ରେଫରି ପ୍ୟାନେଲ ଏସିଆ କପରେ ଖେଳାଯାଇଥିବା ତିନୋଟି ଭାରତ ବନାମ ପାକିସ୍ତାନ ମ୍ୟାଚ୍ର ଶୁଣଣି କରିଥିଲେ। ହାରିସ ରାଉଫଙ୍କୁ ଆଇସିସି ଆଚରଣ ସଂହିତାର ଧାରା ୨.୨୧ ରେ ଦୋଷୀ ସାବ୍ୟସ୍ତ କରାଯାଇଥିଲା, ଯାହା ଫଳରେ ତାଙ୍କ ଉପରେ ଦୁଇ ମ୍ୟାଚ୍ ପାଇଁ ପ୍ରତିବନ୍ଧକ ଲଗାଯାଇଛି। ସେହିପରି ସୂର୍ଯ୍ୟକୁମାର ଯାଦବ, ଜସପ୍ରିତ ବୁମରାହ ଏବଂ ସାହିବଜାଦା ଫରହାନଙ୍କୁ ମଧ୍ୟ ଦଣ୍ଡବିଧାନ ହୋଇଛି।
ପ୍ରଥମ ଘଟଣାଟି ସେପ୍ଟେମ୍ବର ୧୪ ତାରିଖରେ ଭାରତ ବନାମ ପାକିସ୍ତାନ ମ୍ୟାଚ୍ ସମୟରେ ଘଟିଥିଲା। ରାଉଫଙ୍କୁ ତାଙ୍କ ମ୍ୟାଚ୍ ଫିର ୩୦ ପ୍ରତିଶତ ଜରିମାନା କରାଯାଇଥିଲା ଏବଂ ଦୁଇଟି ଡିମେରିଟ୍ ପଏଣ୍ଟ ଦିଆଯାଇଥିଲା। ସୁପର ୬ ମ୍ୟାଚ୍ରେ ରାଉଫ ଭାରତୀୟ ଓପନର ବ୍ୟାଟର ଶୁଭମନ ଗିଲ୍ ଏବଂ ଅଭିଷେକ ଶର୍ମାଙ୍କୁ ଗାଳି ଦେଇଥିଲେ ଏବଂ ସେମାନଙ୍କ ସହିତ ଲଢ଼ିବାକୁ ଚେଷ୍ଟା କରିଥିଲେ। ଭାରତୀୟ ପ୍ରଶଂସକଙ୍କ ଦ୍ୱାରା ଟ୍ରୋଲ୍ ହେବା ପରେ ସେ ଫିଲ୍ଡିଂ ସମୟରେ ଉତ୍ତେଜନାମୂଳକ ଇଙ୍ଗିତ ମଧ୍ୟ କରିଥିଲେ। ଏଥର, ତାଙ୍କୁ ପୁଣି ଥରେ ତାଙ୍କ ମ୍ୟାଚ୍ ଫିର ୩୦ ପ୍ରତିଶତ ଜରିମାନା କରାଯାଇଛି ଏବଂ ଦୁଇଟି ଡିମେରିଟ୍ ପଏଣ୍ଟ ଦିଆଯାଇଛି।
ଉଲ୍ଲେଖଯୋଗ୍ୟ ଯେ, ଜଣେ ଖେଳାଳି ଯିଏ ୨୪ ମାସ ମଧ୍ୟରେ ଚାରୋଟି ଡିମେରିଟ୍ ପଏଣ୍ଟ ସଂଗ୍ରହ କରନ୍ତି ତାଙ୍କୁ ଗୋଟିଏ ଟେଷ୍ଟ, ଦୁଇଟି ଦିନିକିଆ କିମ୍ବା ଦୁଇଟି ଟି-୨୦ ପାଇଁ ବାସନ୍ଦ କରାଯାଏ। ତେଣୁ, ହାରିସ୍ ରାଉଫଙ୍କୁ ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ସିରିଜର ପ୍ରଥମ ଦୁଇଟି ମ୍ୟାଚ୍ରୁ ବାସନ୍ଦ କରାଯାଇଛି।
ବୁମରାହ ଏବଂ ସୂର୍ଯ୍ୟକୁମାର ଯାଦବଙ୍କୁ ମଧ୍ୟ ମିଳିଛି ଦଣ୍ଡ:
ଭାରତୀୟ ଟି-୨୦ ଅଧିନାୟକ ସୂର୍ଯ୍ୟକୁମାର ଯାଦବ, ହାରିସ ରାଉଫଙ୍କ ପରି, ଆଇସିସି ଆଚରଣ ସଂହିତାର ଧାରା ୨.୨୧ ଉଲ୍ଲଂଘନ କରିଥିବାରୁ ଦୋଷୀ ସାବ୍ୟସ୍ତ ହୋଇଥିଲେ। ତାଙ୍କୁ ମଧ୍ୟ ତାଙ୍କ ମ୍ୟାଚ୍ ଫିର ୩୦ ପ୍ରତିଶତ ଜରିମାନା କରାଯାଇଥିଲା ଏବଂ ଦୁଇଟି ଡିମେରିଟ୍ ପଏଣ୍ଟ ଦିଆଯାଇଥିଲା। ଯଦି ସୂର୍ଯ୍ୟକୁମାର ଯାଦବ ଆଉ ଦୁଇଟି ଡିମେରିଟ୍ ପାଆନ୍ତି, ତେବେ ସେ ହାରିସ ରାଉଫଙ୍କ ପରି ନିଲମ୍ବନର ସମ୍ମୁଖୀନ ହୋଇପାରନ୍ତି। ସାହିବଜାଦା ଫରହାନଙ୍କୁ ତାଙ୍କ ଗନ୍ ସେଲିବ୍ରେସନ୍ ଢ଼ଙ୍ଗକୁ ନେଇ ଚେତାବନୀ ଦେଇ ମୁକ୍ତ କରାଯାଇଥିଲା, କିନ୍ତୁ ଏକ ଡିମେରିଟ୍ ପଏଣ୍ଟ ମଧ୍ୟ ମିଳିଥିଲା। ଏହି ସମୟରେ, ଜସପ୍ରିତ ବୁମରାହ, ହାରିସ ରାଉଫଙ୍କ କଟାକ୍ଷର ଜବାବରେ ଏକ ବ୍ୟଙ୍ଗାତ୍ମକ ଢ଼ଙ୍ଗରେ ତାଙ୍କୁ ଇଙ୍ଗିତ କରିଥିଲେ। ଏଥିପାଇଁ ତାଙ୍କୁ ମଧ୍ୟ ଚେତାବନୀ ଦେଇ ମୁକ୍ତ କରାଯାଇଥିଲା, କିନ୍ତୁ ଫରହାନଙ୍କ ପରି, ତାଙ୍କୁ ମଧ୍ୟ ଏକ ଡିମେରିଟ୍ ପଏଣ୍ଟ ମିଳିଥିଲା।
