ମୁମ୍ବାଇ, ୨୪/୧୦: ଚଳିତ ମହିଳା ଦିନିକିଆ ବିଶ୍ୱକପ୍ରେ ଚତୁର୍ଥ ଦଳ ଭାବେ ଭାରତ ସେମି ଫାଇନାଲ୍ରେ ପ୍ରବେଶ କରିଛି । ଗୁରୁବାର ଅନୁଷ୍ଠିତ ୨୪ତମ ଲିଗ୍ ମୁକାବିଲାରେ ଦଳ ୫୩ ରନ୍ରେ ନ୍ୟୁଜିଲାଣ୍ଡକୁ ହରାଇଥିଲା । ଏହି ମ୍ୟାଚ୍ରେ ପ୍ରଥମେ ବ୍ୟାଟିଂ କରି ଭାରତ ୩ ୱିକେଟ୍ ବିନିମୟରେ ୩୪୦ ରନ ସଂଗ୍ରହ କରିଥିଲା । ପରେ ବର୍ଷା ଯୋଗୁଁ ଡକ୍ ୱର୍ଥ ଲୁଇସ ନିୟମ ଅନୁଯାୟୀ ନ୍ୟୁଜିଲାଣ୍ଡ ସମ୍ମୁଖରେ ବିଜୟ ପାଇଁ ୪୪ ଓଭରରେ ୩୨୫ ରନର ଲକ୍ଷ୍ୟ ଧାର୍ଯ୍ୟ କରାଯାଇଥିଲା । ନ୍ୟୁଜିଲାଣ୍ଡ ୮ ୱିକେଟ୍ ହରାଇ ୨୭୧ ରନ କରିବାକୁ ସକ୍ଷମ ହୋଇଥିଲା । ଭାରତ ସେମିରେ ପ୍ରବେଶ କରିବା ଫଳରେ ନ୍ୟୁଜିଲାଣ୍ଡ, ଶ୍ରୀଲଙ୍କା ଓ ବାଂଲାଦେଶଙ୍କ ଆଶା ଧୂଳିସାତ୍ ହୋଇଯାଇଛି । ଶତକୀୟ ଇନିଂସ୍ ଖେଳିଥିବା ସ୍ମୃତି ମନ୍ଧନା ପ୍ଲେୟାର ଅଫ୍ ଦ ମ୍ୟାଚ୍ ବିବେଚିତ ହୋଇଥିଲେ ।
ଡିୱାଇ ପାଟିଲ ଗ୍ରାଉଣ୍ଡରେ ଟସ ଜିତି ଫିଲ୍ଡିଂ ନିଷ୍ପତ୍ତି ନେବା ନ୍ୟୁଜିଲାଣ୍ଡ ପାଇଁ ମହଙ୍ଗା ପଡ଼ିଥିଲା । ବ୍ୟାଟିଂ ଆମନ୍ତ୍ରଣ ପାଇଥିବା ଭାରତ ବିଶାଳ ସ୍କୋର ସଂଗ୍ରହ କରିଥିଲା । ଦୁଇ ଓପନର ସ୍ମୃତି ମନ୍ଧନା ଓ ପ୍ରତିକା ରାୱଲ୍ ପ୍ରାରମ୍ଭରୁ ବିସ୍ଫୋରକ ବ୍ୟାଟିଂ କରି ଦ୍ରୁତ ବେଗରେ ଦଳୀୟ ସ୍କୋରକୁ ଆଗେଇ ନେଇଥିଲେ । ନ୍ୟୁଜିଲାଣ୍ଡ ବୋଲର ଏହି ଯୋଡ଼ି ଭାଙ୍ଗି ପାରି ନଥିଲେ । ଉଭୟ ଦର୍ଶନୀୟ ସଟ୍ମାନ ଖେଳି ଅର୍ଦ୍ଧଶତକ ପୂରଣ କରିଥିଲେ । ନ୍ୟୁଜିଲାଣ୍ଡ ୭ଜଣ ବୋଲର ନିୟୋଜିତ କରିଥିଲା । ହେଲେ କିଛି ଫଳ ମିଳି ନଥିଲା।
ମନ୍ଧନା ୮୮ଟି ବଲ୍ରେ ଶତକ ପୂରଣ କରିଥିଲେ । ଦିନିକିଆରେ ଏହା ତାଙ୍କର ୧୪ତମ ଶତକ ରହିଥିଲା । ତାଙ୍କ ସହ ତାଳ ଦେଇ ପ୍ରତିକା ଦ୍ୱିତୀୟ ଦିନିକିଆ ଶତକ ଅର୍ଜନ କରିଥିଲେ । ଉଭୟ ରେକର୍ଡ ୨୧୨ ରନ୍ର ଭାଗିଦାରୀ ଗଠନ କରିଥିଲେ । ଶେଷରେ ୩୪ତମ ଓଭରରେ ସୁଜି ବେଟ୍ସ ଯୋଡ଼ି ଭାଙ୍ଗିଥିଲେ । ମନ୍ଧନା ୯୫ଟି ବଲ୍ରୁ ୧୦ଚୌକା ଓ ୪ଛକା ବଳରେ ୧୦୯ ରନ କରି ଆଉଟ୍ ହୋଇଥିଲେ । ପ୍ରତିକାଙ୍କ ସହ ଜେମିମା ରୋଡ୍ରିଗ୍ସ ମିଶି ଆଉ ୭୬ ରନ୍ର ଭାଗିଦାରୀ ଗଢ଼ିବା ଫଳରେ ଦଳୀୟ ସ୍କୋର ୨୮୮ରେ ପହଞ୍ଚିଥିଲା । ୪୩ତମ ଓଭରରେ ରାୱଲ୍ଙ୍କୁ ଆଉଟ୍ କରି ଆମେଲିଆ କେର ନ୍ୟୁଜିଲାଣ୍ଡକୁ ସାମାନ୍ୟ ଆଶ୍ୱସ୍ତ କରିଥିଲେ । ରାୱଲ୍ ୧୩ଚୌକା ଓ ୨ଛକା ବଳରେ ୧୨୨ ରନ କରିଥିଲେ । ଫିଟ୍ ହୋଇ ଫେରିଥିବା ଜେମିମା ବିସ୍ଫୋରକ ବ୍ୟାଟିଂ ଜାରି ରଖି ଦଳୀୟ ସ୍କୋରକୁ ୩୪୦ରେ ପହଞ୍ଚାଇଥିଲେ । ସେ ୭୬ (୧୧ଚୌକା) ରନ କରି ଅପରାଜିତ ରହିଥିଲେ ।
୩୨୫ ରନ୍ର ବିଶାଳ ବିଜୟ ଲକ୍ଷ୍ୟର ପିଛା କରିବା ସହଜ ନଥିଲା । ତଥାପି ନ୍ୟୁଜିଲାଣ୍ଡ ଲଢୁଆ ବ୍ୟାଟିଂ କରିଥିଲା । ଓପନର ସୁଜି ବେଟ୍ସ ୧ ରନ କରି ଆଉଟ୍ ହୋଇଥିଲେ । ଏହାପରେ ଜର୍ଜିୟା ପ୍ଲିମର ଓ ଆମେଲିଆ କେର ୫୦ ରନର ଭାଗିଦାରୀ ଗଠନ କରିଥିଲେ । ପ୍ଲିମର ୩୦ ରନ କରି ଆଉଟ୍ ହେବା ପରେ ଅଧିନାୟକ ଶୋଫି ଡିଭାଇନ (୬)ଙ୍କୁ ମଧ୍ୟ ନ୍ୟୁଜିଲାଣ୍ଡ ସହଳ ହରାଇଥିଲା । ଆମେଲିଆଙ୍କ ସହ ବ୍ରୁକ ହାଲିଡେ ମିଶି ୫୬ ରନର ଭାଗିଦାରୀ ଗଢ଼ିଥିଲେ । ଦଳୀୟ ସ୍କୋର ୧୧୫ ବେଳେ ଆମେଲିଆ ବ୍ୟକ୍ତିଗତ ୪୫ ରନ କରି ବିଦାୟ ନେଇଥିଲେ । ପରେ ପରେ ମାଡି ଗ୍ରୀନ (୧୮) ମଧ୍ୟ ଆଉଟ୍ ହୋଇଥିଲେ । ହାଲିଡେଙ୍କ ସହ ଇସାବେଲ ଗେଜ ମିଶି ଆକ୍ରମଣାତ୍ମକ ବ୍ୟାଟିଂ କରିଥିଲେ । ଉଭୟ ଏକ ସମୟରେ ବିଜୟ ଆଶା ସଂଚାର କରିଥିଲେ । ଷଷ୍ଠ ୱିକେଟ୍ରେ ୭୨ ରନ୍ର ଭାଗିଦାରୀ ଗଢ଼ି ଉଠିଥିଲା । ଦଳୀୟ ସ୍କୋର ୨୨୬ରେ ପହଞ୍ଚି ସାରିଥିଲା । ୩୨ ବଲରେ ଆଉ ୯୯ ରନ୍ ଆବଶ୍ୟକ ଥିଲା । ୩୯ତମ ଓଭରରେ ହାଲିଡେଙ୍କୁ ଆଉଟ୍ କରିଥିଲେ ଶ୍ରୀଚରଣୀ ଓ ବିଜୟ ନିଶ୍ଚିତ ହୋଇଯାଇଥିଲା । ସେ ୯ଚୌକା ଓ ୧ଛକା ବଳରେ ୮୧ ରନ କରିଥିଲେ । ପରେ ଦଳ ଆଉ ୨ଟି ୱିକେଟ୍ ହରାଇ ୨୭୧ରେ ସୀମିତ ରହିଥିଲା । ଗେଜ ୬୫ ରନ କରି ଅପରାଜିତ ରହିଥିଲେ ।
