ନୂଆଦିଲ୍ଲୀ: ବ୍ରାଜିଲର ରାଷ୍ଟ୍ରପତି ଲୁଇଜ୍ ଇନାସିଓ ଲୁଲା ଡା ସିଲଭା ଗୁରୁବାର ଘୋଷଣା କରିଛନ୍ତି ଯେ, ସେ ଆସନ୍ତା ବର୍ଷ ପୁନଃନିର୍ବାଚନ ପାଇଁ ପ୍ରତିଦ୍ୱନ୍ଦ୍ୱିତା କରିବେ। ଦେଖିବାକୁ ଗଲେ ସେ କ୍ରମାଗତ ଭାବେ ନିଜ ଚତୁର୍ଥ କାର୍ଯ୍ୟକାଳ ପାଇଁ ପ୍ରତିଦ୍ୱନ୍ଦ୍ୱିତା କରିବେ। ଏନେଇ ଲୁଲା କହିଛନ୍ତି, "ମୁଁ ଏବେ ୮୦ ବର୍ଷ ବୟସରେ ପହଞ୍ଚିଛି, କିନ୍ତୁ ଆପଣ ନିଶ୍ଚିତ ହୋଇପାରିବେ ଯେ ମୋର ଶକ୍ତି ୩୦ ବର୍ଷ ବୟସରେ ଯେପରି ଥିଲା ସେହିପରି ଅଛି। ମୁଁ ବ୍ରାଜିଲରେ ଚତୁର୍ଥ କାର୍ଯ୍ୟକାଳ ପାଇଁ ନିଶ୍ଚିନ୍ତ ଭାବେ ପ୍ରତିଦ୍ୱନ୍ଦ୍ୱିତା କରିବି।" ବ୍ରାଜିଲର ସମ୍ବିଧାନ ଅନୁଯାୟୀ, ଜଣେ ରାଷ୍ଟ୍ରପତି କେବଳ ଦୁଇଟି କ୍ରମାଗତ କାର୍ଯ୍ୟ କରିପାରିବେ। ଲୁଲା ୧୩ ବର୍ଷର ବିରତି ପରେ ୨୦୨୩ ମସିହାରେ କ୍ଷମତାକୁ ଫେରିଥିଲେ ଏବଂ ଏବେ ପୁନଃନିର୍ବାଚନ ପାଇଁ ପ୍ରତିଦ୍ୱନ୍ଦ୍ୱିତା କରିପାରିବେ।
ବ୍ରାଜିଲ ରାଷ୍ଟ୍ରପତି ଲୁଲା ବର୍ତ୍ତମାନ ଏସିଆ ଗସ୍ତରେ ଅଛନ୍ତି। ସେ ଇଣ୍ଡୋନେସିଆରେ ରାଷ୍ଟ୍ରପତି ପ୍ରବୋଓ ସୁବିୟାଣ୍ଟୋଙ୍କୁ ଭେଟିବେ ଏବଂ ତା’ପରେ ମାଲେସିଆ ଯାତ୍ରା କରିବେ, ଯେଉଁଠାରେ ସେ ଆସିଆନ୍ ସମ୍ମିଳନୀରେ ଯୋଗଦେବେ। ବ୍ରାଜିଲ ଗଣମାଧ୍ୟମ ଅନୁଯାୟୀ, ରାଷ୍ଟ୍ରପତି ଲୁଲା ମାଲେସିଆରେ ପ୍ରଥମ ଥର ପାଇଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଭେଟିପାରନ୍ତି। ଦୁଇ ନେତା ସମ୍ପ୍ରତି ଏକ ସୌହାର୍ଦ୍ଦ୍ୟପୂର୍ଣ୍ଣ ଟେଲିଫୋନ୍ ଆଲୋଚନା କରିଛନ୍ତି। ତେବେ ଏହି ସାକ୍ଷାତକାରରେ ଉଭୟ ନେତା ଅତିରିକ୍ତ ବାଣିଜ୍ୟ ଶୁଳ୍କ ଉପରେ ଆଲୋଚନା କରିପାରନ୍ତି ବୋଲି ଅନୁମାନ କରାଯାଉଛି।
ଗତ ବର୍ଷ ୨୦୨୨ ମସିହାରେ ଲୁଲା, ଜାଇର ବୋଲସୋନାରୋଙ୍କୁ ପରାସ୍ତ କରି କ୍ରମାଗତ ତୃତୀୟ ରାଷ୍ଟ୍ରପତି ନିର୍ବାଚନରେ ବିଜୟୀ ହୋଇଥିଲେ। ପୂର୍ବରୁ, ଲୁଲା କହିଥିଲେ ଯେ ଏହା ତାଙ୍କର ଶେଷ ନିର୍ବାଚନ ହେବ, ତାଙ୍କ ବୟସ ଏବଂ ଦେଶର ରାଜନୈତିକ ନବୀକରଣର ଆବଶ୍ୟକତାକୁ ଦର୍ଶାଇ ସେ ଏହି ନିର୍ବାଚନ ଲଢିଥିଲେ। କିନ୍ତୁ ତାଙ୍କର ବର୍ତ୍ତମାନର କାର୍ଯ୍ୟକାଳ ଆରମ୍ଭରେ, ସେ ପୁଣି ଥରେ ନିର୍ବାଚନ ଲଢ଼ିପାରନ୍ତି ବୋଲି ସୂଚାଇ ଦେଇଥିଲେ। ଗତ ଫେବୃଆରୀ ୨୦୨୩ ରେ, ସେ କହିଥିଲେ ଯେ ସେ ୨୦୨୬ ରେ ସେ ପୁଣି ଥରେ ନିର୍ବାଚନ ଲଢ଼ିପାରନ୍ତି। କିନ୍ତୁ ଏହି ନିଷ୍ପତ୍ତି ଦେଶର ରାଜନୈତିକ ପରିସ୍ଥିତି ଏବଂ ତାଙ୍କ ସ୍ୱାସ୍ଥ୍ୟ ଉପରେ ନିର୍ଭର କରିବ। ଲୁଲା ହେଉଛନ୍ତି ବ୍ରାଜିଲର ବାମପନ୍ଥୀ ଦଳର ପ୍ରମୁଖ ନେତା ଏବଂ ଦେଶ ଗଣତନ୍ତ୍ରକୁ ଫେରିବା ପରେ ସେ ସବୁଠାରୁ ଅଧିକ ସମୟ ଧରି ରାଷ୍ଟ୍ରପତି ପଦରେ ରହିଛନ୍ତି।
ବ୍ରାଜିଲର କିଛି ରାଜନେତା ତାଙ୍କ ବୟସ ଏବଂ ସାମ୍ପ୍ରତିକ ସ୍ୱାସ୍ଥ୍ୟ ସମସ୍ୟା ବିଷୟରେ ଚିନ୍ତା ପ୍ରକାଶ କରିଛନ୍ତି। ଗତ ବର୍ଷ ଲୁଲାଙ୍କ ମସ୍ତିଷ୍କରେ ରକ୍ତ ଜମାଟ ବାନ୍ଧିବା ପାଇଁ ଜରୁରୀକାଳୀନ ଅସ୍ତ୍ରୋପଚାର କରାଯାଇଥିଲା। ତଥାପି, ଲୁଲା ପ୍ରାୟତଃ ସୋସିଆଲ ମିଡିଆରେ ସ୍ୱାସ୍ଥ୍ୟ ଏବଂ ବ୍ୟାୟାମ ଭିଡିଓ ସେୟାର କରି ଦାବି କରନ୍ତି ଯେ ସେ ସୁସ୍ଥ ଏବଂ ସକ୍ରିୟ ଅଛନ୍ତି।
ବର୍ତ୍ତମାନର ବ୍ରାଜିଲରେ ହୋଇଥିବା ଏକ ସର୍ଭେ ଅନୁଯାୟୀ ଲୁଲା ୨୦୨୬ ନିର୍ବାଚନରେ ଆଗୁଆ ଅଛନ୍ତି, କିନ୍ତୁ ପ୍ରାୟ ଅଧା ଭୋଟର ତାଙ୍କ ଉପରେ ଅସନ୍ତୁଷ୍ଟ ରହିଛନ୍ତି। ଟ୍ରମ୍ପଙ୍କ ବାଣିଜ୍ୟ ଶୁଳ୍କ ଲୁଲାଙ୍କ ଲୋକପ୍ରିୟତାକୁ ବୃଦ୍ଧି କରିଛି। ତାଙ୍କର ମୁଖ୍ୟ ପ୍ରତିଦ୍ୱନ୍ଦ୍ୱୀ, ବୋଲସୋନାରୋଙ୍କୁ ନିର୍ବାଚନ ଲଢ଼ିବାରୁ ନିଷେଧ କରାଯାଇଛି ଏବଂ ୨୭ ବର୍ଷ ଜେଲଦଣ୍ଡ ଦିଆଯାଇଛି। ଯଦିଓ ବର୍ତ୍ତମାନ ସୁଦ୍ଧା ତାଙ୍କ ସାମ୍ନାରେ କୌଣସି ଦୃଢ଼ ବିରୋଧୀ ପ୍ରାର୍ଥୀ ନାହାଁନ୍ତି, ତଥାପି ବିଶ୍ଳେଷକମାନେ କହିଛନ୍ତି ଯେ ଜଣେ ଯୋଗ୍ୟ ପ୍ରାର୍ଥୀଙ୍କ ନିର୍ବାଚନ ବୋଲସୋନାରୋଙ୍କ ସମର୍ଥନ ଉପରେ ନିର୍ଭର କରିପାରିବ।
