ନୂଆଦିଲ୍ଲୀ,୦୭/୧୦: ଇଭି କମ୍ପାନି ଓଲା ଇଲେକ୍ଟ୍ରିକ ଦେଶର ପ୍ରଥମ ରେୟାର ଆର୍ଥ ମେଟାଲ ବିହୀନ ୨ ଚକିଆ ଫେରାଇଟ୍ ମୋଟର ବନାଇଛି । ଏହି ମୋଟରକୁ ସରକାର ମଞ୍ଜୁରି ପ୍ରଦାନ କରିଛନ୍ତି । ଏବେ ଭାରତ ଇଲେକ୍ଟ୍ରିକ ଭେଇକିଲ ମୋଟର ବନାଇବା ଲାଗି ଚୀନ ଉପରେ ନିର୍ଭର କରୁଛି । ଚୀନ ରେୟାର ଆର୍ଥ ମେଟାଲ ରପ୍ତାନି ଉପରେ ରୋକ ଲଗାଇଲେ ଭାରତ ଉପରେ ଏହାର ପ୍ରଭାବ ପଡ଼ୁଛି । ଏଭଳି ସ୍ଥିତିରେ ଓଲା ଇଲେକ୍ଟ୍ରିକର ନୂଆ ଉଦ୍ଭାବନ ଦେଶ ପାଇଁ ଲାଭ ଆଣିବ । ଚୀନ ଉପରେ ନିର୍ଭରତା କମିବ। ଓଲା ଇଲେକ୍ଟ୍ରିକ ସୂଚନା ମୁତାବକ, କମ୍ପାନିର ତାମିଲନାଡୁ ସ୍ଥିତ ଗ୍ଲୋବାଲ ଅଟୋମୋଟିଭ ରିସର୍ଚ୍ଚ ସେଣ୍ଟରକୁ ଏହି ଉଦ୍ଭାବନ ଲାଗି ସରକାର ପ୍ରମାଣପତ୍ର ପ୍ରଦାନ କରିଛନ୍ତି ।
ସଡ଼କ ପରିବହନ ମନ୍ତ୍ରଣାଳୟର ଏଆଇଏସ୍ ୦୪୧ ନିୟମ ମୁତାବକ, ଓଲାର ଏହି ମୋଟରକୁ ପରୀକ୍ଷଣ କରାଯାଇଛି । ଅଗଷ୍ଟ ମାସର ସଂକଳ୍ପ ୨୦୨୫ କାର୍ଯ୍ୟକ୍ରମରେ କମ୍ପାନି ପ୍ରଥମ ଥର ଲାଗି ଏହି ମୋଟର ଟେକ୍ନୋଲୋଜିକୁ ପ୍ରଦର୍ଶନ କରିଥିଲା । ନୂଆ ଫେରାଇଟ୍ ମୋଟର ୭ ଏବଂ ୧୧ କିଲୋୱାଟ ଭଳି ୨ ମଡେଲରେ ଆସିଛି । ଏହା ଉଭୟ କ୍ଷମତା ଏବଂ ଦୃଢ଼ତା ଦୃଷ୍ଟିକୋଣରୁ ବେଶ ଉନ୍ନତ । ମାତ୍ର ଏହାର ପରିଚାଳନା ଖର୍ଚ୍ଚ କମ୍ । ଯୋଗାଣ ଶୃଙ୍ଖଳ ସମସ୍ୟାକୁ ଏହା ସମାଧନ କରିବ । ଏହା ଦ୍ୱାରା ଇ-ସ୍କୁଟର ଉତ୍ପାଦନ ଆହୁରି ଶସ୍ତା ହେବ ।
