ନୂଆଦିଲ୍ଲୀ,୧୧/୧୦: ନୋବେଲ ଶାନ୍ତି ପୁରସ୍କାର ପାଇବେ ବୋଲି କେଡେ ଆଶା କରିଥିଲେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ବାରମ୍ବାର ବିଭିନ୍ନ ଦେଶ ମଧ୍ୟରେ ଯୁଦ୍ଧବିରାମ କରି ଶାନ୍ତି ପ୍ରତିଷ୍ଠା କରିଥିବା କହୁଥିଲେ । ହେଲେ ଟ୍ରମ୍ପ ଆଶା ଆଶାରେ ରହିଗଲା । ଯାହାକୁ ନେଇ ହତାଶ ହୋଇଛନ୍ତି ଟ୍ରମ୍ପ । ବହୁ ପ୍ରତୀକ୍ଷିତ ନୋବେଲ ଶାନ୍ତି ପୁରସ୍କାର ପାଇଁ ଭେନେଜୁଏଲାର 'ଆଇରନ୍ ଲେଡି' ମାରିଆ କୋରିନା ମାସାଡୋଙ୍କୁ ମନୋନୀତ କରାଯାଇଛି । ଫଳରେ ଆଶା ବାନ୍ଧିଥିବା ଟ୍ରମ୍ପ ନିରାଶ ହୋଇଛନ୍ତି । ନୋବେଲ ନମିଳିବା ପରେ ଟ୍ରମ୍ପଙ୍କ ପ୍ରଥମ ପ୍ରତିକ୍ରିୟା ସାମ୍ନାକୁ ଆସିଛି । ସେ କହିଛନ୍ତି, ମୁଁ ପ୍ରକୃତ ହକଦାର । ନୋବେଲ ଶାନ୍ତି ପୁରସ୍କାର ବିଜେତା ମାରିଆ ବି ଏହା ସ୍ୱୀକାର କରିଛନ୍ତି ।

ନୋବେଲ ନମିଳିବାରୁ ନିରାଶ ଥିବା ଡୋନାଲ୍ଡ ଟ୍ରମ୍ପ କହିଛନ୍ତି, ''ବାସ୍ତବରେ ଯାହାଙ୍କୁ ନୋବେଲ ମିଳିଛି ମାରିଆ କୋରିନା ମୋତ ଫୋନ୍ କରିଥିଲେ । ସେ ଏହି ପୁକସ୍କାରକୁ ମୋ ସମ୍ମାନରେ ସ୍ୱୀକାର କରିଥିବା କହିଛନ୍ତି । ଏହାର ପ୍ରକୃତ ହକ୍‌ଦାର ମୁଁ ବୋଲି କହିଛନ୍ତି । ଏହା ବହୁତ ଭଲ କଥା । ମୁଁ ତାଙ୍କୁ କହିନାହିଁ କି ଏହା ମୋତେ ଦେଇଦିଅ । ମୁଁ ତାଙ୍କୁ ସବୁପ୍ରକାର ସାହାଯ୍ୟ କରିଥିବାରୁ ସେ ଏପରି କରିଛନ୍ତି । ମୁଁ ଖୁସି ଅଛି କାରଣ ଲକ୍ଷ ଲକ୍ଷ ଜୀବନ ବଞ୍ଚାଇଛି । ଭେନେଜୁଏଲା ଲୋକଙ୍କ ଗଣତାନ୍ତ୍ରିକ ଅଧିକାରକୁ ବୃଦ୍ଧି କରିବା ନେଇ ମାରିଆ କୋରିନାଙ୍କୁ ନୋବେଲ ଶାନ୍ତି ପୁରସ୍କାର ଦିଆଯାଇଛି ।''​​​​​​​​​​​​​​

ଭେନେଜୁଏଲାରେ ଗଣତନ୍ତ୍ର ସ୍ଥାପନ ଏବଂ ଲୋକଙ୍କୁ ଗଣତାନ୍ତ୍ରିକ ଅଧିକାର ଲାଗି ଲଗାତର ୨୦ ବର୍ଷ ଧରି ସଂଘର୍ଷ ଜାରି ରଖିଥିବା ମାରିଆଙ୍କ ନାଁ ନୋବେଲ କମିଟି ପକ୍ଷରୁ ଘୋଷଣା କରାଯାଇଛି । ତାଙ୍କୁ ଭେନେଜୁଏଲାର ‘ଆଇରନ ଲେଡି’ କୁହାଯାଏ । ନୋବେଲ ଜିତିବା ପରେ ମାରିଆଙ୍କ ପକ୍ଷରୁ ଏକ ଭିଡିଓ ବାର୍ତ୍ତା ଜାରି ହୋଇଥିଲା । ଶାନ୍ତିରେ ନୋବେଲ ପାଇବା ଖବର ଶୁଣିବା ପରେ ସେ ଚକିତ ହୋଇଯାଇଥିବା କହିଥିଲେ । ଏଥିସହ ମାରିଆ ଏକ୍ସରେ ଏକ ପୋଷ୍ଟ  କରି ଟ୍ରମ୍ପ୍‌ଙ୍କୁ ଶ୍ରେୟ ଦେବା କଥା ସଭିଁଙ୍କୁ ଚକିତ କରିଥିଲା । ''ଏହି ସମ୍ମାନ ସମସ୍ତ ଭେନେଜୁଏଲାବାସୀଙ୍କ ସଂଘର୍ଷର ପରିଚୟ, ଯେଉଁମାନେ ସ୍ୱାଧୀନତାର ସଂଗ୍ରାମରେ ସାଥୀରେ ଛିଡ଼ା ହୋଇଛନ୍ତି । ଏହା ଆମକୁ ଆମର ଶେଷ ଲକ୍ଷ୍ୟ ‘ସ୍ୱାଧୀନତା ହାସଲ’ ପର୍ଯ୍ୟନ୍ତ ପହଞ୍ଚିବାକୁ ବଳ ଦେବ ।  ମୁଁ ଏହି ନୋବେଲ ପୁରସ୍କାର ଭେନେଜୁଏଲା ପୀଡ଼ିତ ଏବଂ ରାଷ୍ଟ୍ରପତି ଟ୍ରମ୍ପ୍‌ଙ୍କୁ ସମର୍ପିତ କରୁଛି ବୋଲି କହିଥିଲେ ମାରିଆ ।''