ଖନ୍ତାପଡ଼ା, ୧୮/୦୮: ବାଲେଶ୍ବର ଜିଲ୍ଲା ବାହାନଗା ବ୍ଲକ୍ ଚକଜଗନ୍ନାଥପୁରରେ ଅଘଟଣ । ବିଦ୍ୟୁତ୍ ଆଘାତରେ ଚାଲିଗଲା ଯୁବକଙ୍କ ଜୀବନ । ୮ ନଂ ଓ୍ବାର୍ଡର ବଳରାମ ପ୍ରଧାନଙ୍କ ପୁଅ ସତ୍ୟଜିତ୍ ବିଦ୍ୟୁତ ଆଘାତର ଶିକାର ହୋଇଛନ୍ତି ।
ସୂଚନା ଅନୁଯାୟୀ ସତ୍ୟଜିତ୍ ଘରେ ଏକ ଇଲେକଟ୍ରିକ୍ ବୋର୍ଡ ସଜାଡୁ ଥିବା ବେଳେ ଅସାବଧାନତା ଯୋଗୁଁ ବିଦ୍ୟୁତ ସଂସ୍ପର୍ଶରେ ଆସିଥିଲେ । ବିଜୁଳି ଝଟକା ମାରିବାରୁ ସେ ତଳେ ପଡ଼ିଯାଇଥିଲେ । ପରିବାର ଲୋକ ଗୁରୁତର ଅବସ୍ଥାରେ ତାଙ୍କୁ ଖନ୍ତାପଡ଼ା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ହେଲେ ସେଠାରେ ଡାକ୍ତର ସତ୍ୟଜିତଙ୍କୁ ମୃତ ବୋଲି ଘୋଷଣା କରିଥିଲେ । ଖବର ପାଇ ଖନ୍ତାପଡ଼ା ପୁଲିସ ଘଟଣାସ୍ଥଳରେ ପହଂଚି ଶବ ଜବତ କରି ବ୍ୟବଛେଦ ପାଇଁ ବାଲେଶ୍ୱର ମୁଖ୍ୟ ଚିକିତ୍ସାଳୟକୁ ପଠାଇବା ସହ ପ୍ରାଥମିକ ତଦନ୍ତ ଜାରି ରଖିଛି । ପ୍ରକାଶ ଥାଉ କି ମୃତ ସତ୍ୟଜିତ୍ ହେଉଛନ୍ତି ପରିବାରର ଏକମାତ୍ର ପୁଅ। ସେ ବିଇଡି ପଢା ସାରି ନିଜ ଗ୍ରାମରେ ଏକ କୋଚିଂ ସେଣ୍ଟରରେ ଶିକ୍ଷାଦାନ କରୁଥିଲେ । ତେବେ ସତ୍ୟଜିତଙ୍କ ଏଭଳି ବିୟୋଗରେ ଅଞ୍ଚଳରେ ଶୋକର ଛାୟା ଖେଳିଯାଇଛି।
