"ହେ ନୁତୋନ, ଦେଖା ଦିକ ଆର୍-ବାର, ଜୋନ୍ମେରୋ ପ୍ରୋଥୋମୋ ଶୁଭୋକ୍ଷୋଣ'– (ହେ ନବୀନ, ପୁଣି ଥରେ ସାମ୍ନାକୁ ଆସ, ଠିକ୍ ସେହିପରି ଯେପରି ଜନ୍ମ ସମୟରେ ସେହି ପ୍ରଥମ ଶୁଭ ମୁହୂର୍ତ୍ତ ଆସିଥିଲା ।)
ଗୁରୁଦେବ ରବୀନ୍ଦ୍ର ନାଥ ଟାଗୋରଙ୍କର ଏକ ପଙ୍କ୍ତି କେବଳ ଏକ କବିତାର ଅଂଶବିଶେଷ ନୁହେଁ, ବରଂ ବିଭିନ୍ନ ସମୟରେ ସ୍ୱତଃପ୍ରବୃତ୍ତ ଭାବେ ବଦଳୁଥିବା ଏବଂ ନୂତନ ରୂପ ନେଉଥିବା ବଙ୍ଗୀୟ ଆତ୍ମାର ଆହ୍ୱାନ ମଧ୍ୟ । ଗୁରୁଦେବ ଭଲଭାବେ ଜାଣିଥିଲେ ଯେ ବଙ୍ଗ ସମୟ ସହିତ ପରିବର୍ତ୍ତିତ ହୁଏନାହିଁ, ବରଂ ଏହା ବାରମ୍ବାର ଉନ୍ନତ ଏବଂ ନୂତନ ରୂପରେ ପ୍ରସ୍ଫୁଟିତ ହୋଇଥାଏ । ଗୁରୁଦେବଙ୍କ ଜନ୍ମବାର୍ଷିକୀରେ ଗାନ କରାଯାଇଥିବା ଏହି କବିତାଟି ନବଜାଗରଣ ଏବଂ ନବଚେତନାର ପ୍ରତୀକ । ଏହି ପ୍ରାର୍ଥନା ପୁରୁଣା ରୂଢ଼ିବାଦୀ ଧାରଣାକୁ ଭାଙ୍ଗି ନୂତନ, ଉଜ୍ଜ୍ୱଳ ଏବଂ ସୃଜନଶୀଳ ଚିନ୍ତାଧାରା ଗ୍ରହଣ କରିବା ପାଇଁ ଏକ ଆହ୍ୱାନ ମଧ୍ୟ ।
ଏହା ଏକ ସୁଖଦ ସଂଯୋଗ ଯେ, ଗୁରୁଦେବ ରବୀନ୍ଦ୍ରନାଥ ଟାଗୋରଙ୍କ ୧୬୫ତମ ଜନ୍ମବାର୍ଷିକୀର କିଛି ଦିନ ପୂର୍ବରୁ, ପଶ୍ଚିମବଙ୍ଗ ଅନେକ ଦଶନ୍ଧି ପରେ ଏକ ନବଜାଗରଣର ସାକ୍ଷୀ ହେଉଛି । ମଇ ୪ ତାରିଖରେ, ଭାରତୀୟ ଜନତା ପାର୍ଟି (ବିଜେପି) ପଶ୍ଚିମବଙ୍ଗ ବିଧାନସଭା ନିର୍ବାଚନରେ ଏକ ଐତିହାସିକ ବିଜୟ ହାସଲ କରିଛି । କିନ୍ତୁ ବିଜେପି ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପାଇଁ ଏହି ନିର୍ବାଚନ କେବେବି କେବଳ ଏକ ରାଜନୈତିକ ପ୍ରତିଯୋଗିତା ନଥିଲା । ଏହା ଏ ମହାନ ଭୂମିର ହଜିଯାଇଥିବା ଗୌରବକୁ ପୁନରୁଦ୍ଧାର କରିବାର ଏକ ସୁଯୋଗ ଥିଲା– ଏପରି ଏକ ସଭ୍ୟତାଗତ ଆହ୍ୱାନ ଥିଲା ଯାହା ନିର୍ବାଚନୀ ସମୀକରଣ ଏବଂ ଗଣନା ଠାରୁ ଊଦ୍ଧ୍ୱର୍ରେ ।
ଆଜି, ଯେତେବେଳେ ପଶ୍ଚିମବଙ୍ଗର ଚେତନା ଏବଂ ଗୌରବର ନୂତନ ସୂର୍ଯ୍ୟୋଦୟ ହେଉଛି, ଆମକୁ ବୁଝିବାକୁ ପଡିବ ଯେ ବଙ୍ଗ କ'ଣ ଏବଂ ବଙ୍ଗ ଚେତନାର ନବଜାଗରଣ କାହାକୁ କୁହାଯାଏ । ଏଥିପାଇଁ ବଙ୍ଗର ଶହ ଶହ ବର୍ଷ ପୁରୁଣା ଚେତନାକୁ ବୁଝିବା ଏବଂ ଜାଣିବା ଆବଶ୍ୟକ ।
ବଙ୍ଗ ସାମାଜିକ ଚେତନାର କେନ୍ଦ୍ର ହେବା ପୂର୍ବରୁ, ଜ୍ଞାନ ଏବଂ ଆଧ୍ୟାତ୍ମିକତାର ଏକ ପବିତ୍ର ଭୂମି ଥିଲା । ପଞ୍ଚଦଶ ଶତାବ୍ଦୀରେ, ନବଦ୍ୱୀପର ଗଙ୍ଗାନଦୀ କୂଳରେ, ଜଣେ ଯୁବ ସନ୍ନ୍ୟାସୀ ନିମାଇଁ ନିଜ କୀର୍ତ୍ତନ ମାଧ୍ୟମରେ ସମାଜକୁ ଏକ ନୂତନ ଦିଗ୍ଦର୍ଶନ ଦେଇଥିଲେ । ଆଜି, ଆମେ ସେହି ଯୁବ ସନ୍ନ୍ୟାସୀଙ୍କୁ ଆଦିସନ୍ଥ ଚୈତନ୍ୟ ମହାପ୍ରଭୁ ଭାବରେ ଜାଣୁ । ଚୈତନ୍ୟ ମହାପ୍ରଭୁଙ୍କ ଦ୍ୱାରା ପ୍ରଦର୍ଶିତ ଭକ୍ତିମାର୍ଗ କେବଳ ଆଧ୍ୟାତ୍ମିକ ଶାନ୍ତି ପ୍ରାପ୍ତ କରିବାର ଏକ ମାଧ୍ୟମ ନୁହେଁ ବରଂ ସାମାଜିକ ସମନ୍ୱୟ ପାଇଁ ଏକ ଅଭିଯାନ ମଧ୍ୟ ଥିଲା । ଚୈତନ୍ୟ ମହାପ୍ରଭୁ ଜାତିଗତ ଏବଂ ଉଚ୍ଚ-ନୀଚର ବନ୍ଧନକୁ ଭାଙ୍ଗି ଦେଇଥିଲେ । ତାଙ୍କଦ୍ୱାରା ପ୍ରବାହିତ ବୈଷ୍ଣବ ପରମ୍ପରା ସମାଜକୁ କରୁଣା, ସମାବେଶ, ସମାନତା ଏବଂ ସଦ୍ଭାବନା ଉପରେ ଗୁରୁତ୍ୱ ଦେଇଥିଲା ।
ଏହି ଚେତନା ବାଉଲ ପରମ୍ପରାରେ ମଧ୍ୟ ଦେଖିବାକୁ ମିଳିଥିଲା । ବାଉଲ ପରମ୍ପରାର ଫକୀରମାନଙ୍କ ପରିଚୟ ଜାତି, ଧର୍ମ କିମ୍ବା କୌଣସି ଶାସ୍ତ୍ର ଦ୍ୱାରା ପରିଭାଷିତ ହେଉନଥିଲା, ବରଂ ସେମାନଙ୍କର ମାନବିକତା ଭାବନା ଦ୍ୱାରା ସେମାନେ ପରିଚିତ ହେଉଥିଲେ । ଲାଲନ ଫକୀର ବାଉଲ ପରମ୍ପରାର ସର୍ବଶ୍ରେଷ୍ଠ ପ୍ରବକ୍ତା ଥିଲେ । ସେ କେଉଁ ସମ୍ପ୍ରଦାୟର ପ୍ରତିନିଧିତ୍ୱ କରୁଥିଲେ, ସେହି ପ୍ରଶ୍ନ କେବେ ମହତ୍ତ୍ୱପୂର୍ଣ୍ଣ ନଥିଲା । ସେ ହିନ୍ଦୁ ସମାଜରେ ପ୍ରଚଳିତ ଜାତିପ୍ରଥାକୁ ବିରୋଧ କରିଥିଲେ ଏବଂ ମୁସଲିମ ସମାଜ ମଧ୍ୟରେ ରହିଥିବା ଭେଦଭାବ ବିରୁଦ୍ଧରେ ସ୍ୱର ଉଠାଇଥିଲେ । ସେ ବଙ୍ଗର ସେହି ସାଂସ୍କୃତିକ ଚେତନାର ପ୍ରତୀକ ଥିଲେ ଯେଉଁଥିରେ ସହିଷ୍ଣୁତା ଓ ସହାବସ୍ଥାନର ଭାବନା ସମାହିତ ଥିଲା ।
ବିଗତ ତିନି ଶତାବ୍ଦୀ ମଧ୍ୟରେ, ବଙ୍ଗ ଓ ବଙ୍ଗର ଲୋକମାନେ କେବଳ ଭାରତର ସାମାଜିକ ନବଜାଗରଣରେ ଭାଗ ନେଇନଥିଲେ, ବରଂ ଏହାର ନେତୃତ୍ୱ ମଧ୍ୟ ନେଇଥିଲେ । ଯେତେବେଳେ ସମାଜ ଏହାର ଜଡ଼ତା, କୁପ୍ରଥା ଏବଂ ବିକୃତ ପରମ୍ପରା ଦ୍ୱାରା ଭାରାକ୍ରାନ୍ତ ଥିଲା, ରାଜା ରାମମୋହନ ରାୟ ପରମ୍ପରାକୁ ସମ୍ପୂର୍ଣ୍ଣ ପରିତ୍ୟାଗ କରିନଥିଲେ କିମ୍ବା ଅଯୌକ୍ତିକ ଭାବରେ ଏହାକୁ ଯଥାର୍ଥ ବୋଲି କହିନଥିଲେ । ସେ ଲୋକମାନଙ୍କୁ ଆତ୍ମବୋଧ କରାଇ, ସମାଜକୁ ଭିତରରୁ ସଂସ୍କାର କରିବାର ପଥ ବାଛିଥିଲେ । ତାଙ୍କର ବାର୍ତ୍ତା ସ୍ପଷ୍ଟ ଥିଲା: ସମାଜର ପୁନର୍ଜନ୍ମ ବାହାରୁ ନୁହେଁ ବରଂ ଭିତର ଚେତନାରୁ ହୋଇଥାଏ । ସତୀଦାହ ପ୍ରଥା ଭଳି ଅମାନବୀୟ କୁପ୍ରଥା ବିରୁଦ୍ଧରେ ତାଙ୍କର ସଂଘର୍ଷ କେବଳ ସାମାଜିକ ସଂସ୍କାର ପାଇଁ ଏକ ଆନ୍ଦୋଳନ ନଥିଲା, ବରଂ ଭାରତୀୟ ଆତ୍ମାକୁ ପୁନର୍ଜୀବିତ କରିବା ପାଇଁ ଏକ ତପସ୍ୟା ଥିଲା । ଈଶ୍ୱର ଚନ୍ଦ୍ର ବିଦ୍ୟାସାଗର ଏହି କାର୍ଯ୍ୟକୁ ଆଗକୁ ବଢ଼ାଇଥିଲେ । ସେ ଶିକ୍ଷାକୁ କେବଳ ଜ୍ଞାନ ପ୍ରାପ୍ତିର ଏକ ମାଧ୍ୟମ ନୁହେଁ, ବରଂ ମୁକ୍ତିର ଏକ ମନ୍ତ୍ରରେ ପରିଣତ କରିଥିଲେ । ସେ ଶିକ୍ଷାକୁ ମହିଳାମାନଙ୍କ ଉତ୍ଥାନ, ସଶକ୍ତିକରଣ ଏବଂ ମୁକ୍ତିର ଏକ ମାଧ୍ୟମ ଭାବରେ ପରିଣତ କରିଥିଲେ ।
ବଙ୍ଗର ଅନ୍ୟତମ ମହାପୁରୁଷ ବଙ୍କିମ ଚନ୍ଦ୍ର ଚାଟାର୍ଜୀ ହିଁ ଦେଶକୁ "ବନ୍ଦେ ମାତରମ୍’ ଅମର ମନ୍ତ୍ର ଦେଇଥିଲେ । "ବନ୍ଦେ ମାତରମ୍' ଗୀତଟି ଆମ ସ୍ୱାଧୀନତା ସଂଗ୍ରାମୀମାନଙ୍କୁ ବ୍ରିଟିଶ ସାମ୍ରାଜ୍ୟ ବିରୁଦ୍ଧରେ ଲଢ଼ିବାକୁ ଶକ୍ତି ଦେଇଥିଲା ଏବଂ ଶହ ଶହ ବର୍ଷ ଧରି ଶୋଇଥିବା ଏକ ଜାତିକୁ ଜାଗ୍ରତ କରିଥିଲା । ଏହି ଗୀତଟି ଏବେ ବି ଭାରତର ଅନ୍ତରାତ୍ମା ସହ ପ୍ରତିଧ୍ୱନିତ ହୁଏ । ବଙ୍ଗ ଭାରତର ପ୍ରଥମ ମହିଳା ଚିକିତ୍ସକ ଡକ୍ଟର କାଦମ୍ବିନୀ ଗାଙ୍ଗୁଲିଙ୍କୁ ମଧ୍ୟ ଜନ୍ମ ଦେଇଥିଲା, ଯିଏ ସମସ୍ତଙ୍କୁ, ବିଶେଷକରି ମହିଳାମାନଙ୍କୁ ପ୍ରେରଣା ଦେଇଥିଲେ। ବଙ୍ଗ ମାଟିରେ ଜନ୍ମଗ୍ରହଣ କରିଥିବା ପ୍ରଖର ରାଷ୍ଟ୍ରବାଦୀ ଡକ୍ଟର ଶ୍ୟାମା ପ୍ରସାଦ ମୁଖାର୍ଜୀ ଭାରତର ଏକତା, ଅଖଣ୍ଡତା ଏବଂ ସାର୍ବଭୌମତ୍ୱ ପାଇଁ ନିଜ ଜୀବନକୁ ଉତ୍ସର୍ଗ କରିଥିଲେ।
ବଙ୍ଗ ଯେତେ ଅସାଧାରଣ ପ୍ରତିଭା ଏବଂ ମହାପୁରୁଷମାନଙ୍କୁ ଜନ୍ମ ଦେଇଛି ସେମାନଙ୍କ ମଧ୍ୟରୁ ହୁଏତ ସବୁଠାରୁ ପ୍ରସିଦ୍ଧ ଏବଂ ପ୍ରବୁଦ୍ଧ ହେଉଛନ୍ତି ସ୍ୱାମୀ ବିବେକାନନ୍ଦ । ଚିକାଗୋ ଠାରେ ୧୮୯୩ ମସିହାରେ ବିଶ୍ୱ ଧର୍ମ ସଂସଦରେ ତାଙ୍କର ଭାଷଣ ଇତିହାସ ପୃଷ୍ଠାରେ ସ୍ୱର୍ଣ୍ଣାକ୍ଷରରେ ଲିପିବଦ୍ଧ । ସେ ସମଗ୍ର ବିଶ୍ୱକୁ ବେଦାନ୍ତ ଏବଂ ଭାରତର ମହାନ ସଭ୍ୟତା ମୂଲ୍ୟବୋଧ ସହିତ ପରିଚିତ କରାଇଥିଲେ । ସେ ହିନ୍ଦୁ ଧର୍ମର ମହାନତା ବିଷୟରେ ବର୍ଣ୍ଣନା କରିବା ସହିତ ଧାର୍ମିକ ସହନଶୀଳତା ଅବଲମ୍ବନ କରିବା ଏବଂ ଧର୍ମାନ୍ଧତା ଦୂର କରିବା ଲାଗି ଆହ୍ୱାନ ଦେଇଥିଲେ । ସେଠାରୁ ସ୍ୱଦେଶ ପ୍ରତ୍ୟାବର୍ତ୍ତନ କରିବା ପରେ ସେ ଏପରି କିଛି କଥା ଦେଶବାସୀଙ୍କୁ କହିଥିଲେ- ଶକ୍ତି ବିନା ଆଧ୍ୟାତ୍ମିକତା ହେଉଛି ଭାବପ୍ରବଣତା, ଜଣେ ଭୋକିଲା ପୁରୁଷକୁ ଦର୍ଶନ ଶିକ୍ଷା ଦିଆଯାଇପାରିବ ନାହିଁ, ଦେବୀଙ୍କୁ କେବଳ ମନ୍ଦିରରେ ନୁହେଁ ବରଂ ମହିଳା, ଗରିବ, ରାଷ୍ଟ୍ର ରୂପରେ ପୂଜା କରାଯିବା ଉଚିତ ।
ଏହା ହିଁ ବଙ୍ଗର ପରିଚୟ । ବଙ୍ଗ ସବୁବେଳେ ନିଜକୁ ଏହି ରୂପରେ ବ୍ୟକ୍ତ କରିଆସିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବଙ୍ଗଳା ପାଇଁ ଏହି ଦୃଷ୍ଟିକୋଣ ରଖିଛନ୍ତି । ଏହା ଅତୀତକୁ ଫେରିଯିବାର ଆକାଂକ୍ଷା ନୁହେଁ, କିମ୍ବା ଆଧୁନିକତାର ପଛରେ ପଡ଼ି ଏକ ବିଦେଶୀ ସଭ୍ୟତାର ଛାୟା ହେବାର ଲାଳସା ନୁହେଁ । ଏହା ଏକ ଦୃଷ୍ଟିକୋଣ, ଯାହା ବଙ୍ଗକୁ ପୁନର୍ବାର ଜାଗ୍ରତ କରିବାକୁ ଚେଷ୍ଟା କରେ ଯାହାଦ୍ୱାରା ରାଜ୍ୟ ତାର ପୂର୍ଣ୍ଣ ସାମର୍ଥ୍ୟ ଆଧାରରେ ନିଜର ସର୍ବୋଚ୍ଚ ବୈଭବ ହାସଲ କରିପାରିବ ।
ଦୁର୍ଭାଗ୍ୟବଶତଃ, ବହୁତ ଦିନ ଧରି ବଙ୍ଗର କିଛି ବୁଦ୍ଧିଜୀବୀ ଓ ରାଜନୈତିକ ବର୍ଗ ନିଜର ସାଂସ୍କୃତିକ ଐତିହ୍ୟକୁ ବୋଝ ବୋଲି ମନେ କରୁଥିଲେ ଏବଂ ଏହାକୁ ହୀନଦୃଷ୍ଟିରେ ଦେଖୁଥିଲେ । ଯେଉଁମାନେ ବଙ୍ଗର ସଭ୍ୟତା, ଧର୍ମ, ସଂସ୍କୃତି ଏବଂ ଚେତନାର କଥା କହୁଥିଲେ ସେମାନଙ୍କୁ ଦମନ କରାଯାଇଥିଲା ଏବଂ ସେମାନଙ୍କ ସ୍ୱରକୁ ଦମନ କରାଯାଇଥିଲା । ପରମ୍ପରାକୁ ପଛୁଆ ବୋଲି ବିବେଚନା କରାଯାଇଥିଲା । ଆଧୁନିକତା ନାମରେ ଏକ ଉପନିବେଶବାଦୀ ମାନସିକତାକୁ ପ୍ରୋତ୍ସାହିତ କରାଯାଇଥିଲା । ଫଳସ୍ୱରୂପ, ପଶ୍ଚିମବଙ୍ଗ ଅନେକ ଦଶନ୍ଧି ଧରି ଅସ୍ଥିରତା, ଅରାଜକତା, ବିକାଶହୀନତା, ସାଂଗଠନିକ ଅବନତି ଏବଂ ବୈଚାରିକ ଜଡ଼ତା ଭୋଗ କରିଥିଲା ।
ପଶ୍ଚିମବଙ୍ଗରେ ଏହି ନିର୍ବାଚନ ଓ ପରିବର୍ତ୍ତନ କେବଳ ରାଜନୈତିକ କ୍ଷମତାର ହସ୍ତାନ୍ତର ନୁହେଁ । ଏହା ବଙ୍ଗକୁ ଏହାର ମୂଳଦୁଆ ଠାରୁ ଦୂରେଇ ରଖିଥିବା ଲୋକଙ୍କ ବିରୁଦ୍ଧରେ ଏକ ଜନାଦେଶ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପାଇଁ, ପଶ୍ଚିମବଙ୍ଗ ବିଧାନସଭା ନିର୍ବାଚନ କ୍ଷମତା ପାଇଁ ଲଢ଼େଇ ନୁହେଁ, ବରଂ ପଶ୍ଚିମବଙ୍ଗର ଗୌରବ ଓ ଐତିହ୍ୟକୁ ପୁନରୁଦ୍ଧାର କରିବା ପାଇଁ ଏକ ଯଜ୍ଞ ଥିଲା ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କର ବେଲୁର ମଠ ସହିତ ଆଧ୍ୟାତ୍ମିକ ସମ୍ପର୍କ, ସ୍ୱାମୀ ବିବେକାନନ୍ଦଙ୍କ ପ୍ରତି ତାଙ୍କର ଅପାର ଶ୍ରଦ୍ଧା ଏବଂ ସୁଶାସନକୁ "ସେବା' ରୂପରେ ଦେଖିବାର ତାଙ୍କର ଦୃଷ୍ଟିକୋଣ- ଏସବୁ ପ୍ରମାଣ ଯେ "ପ୍ରଧାନ ସେବକ' ବଙ୍ଗର ବିକାଶ ଏବଂ ପୁନର୍ଜାଗରଣକୁ ଏକ ପବିତ୍ର ଦାୟିତ୍ୱ ବୋଲି ବିବେଚନା କରନ୍ତି । ଏହାକୁ ସେ ତାଙ୍କର "ପ୍ରଧାନ ଧର୍ମ' ଏବଂ "ପ୍ରଧାନ କର୍ମ' ରୂପେ ପାଳନ କରୁଛନ୍ତି।
ତେଣୁ, ବଙ୍ଗର ବିକାଶ ଏବଂ ପୁନଃନିର୍ମାଣର ଅର୍ଥ କେବଳ ଅନେକ ଦଶନ୍ଧି ଧରି ଅବହେଳିତ ଏବଂ କ୍ଷତିଗ୍ରସ୍ତ ହୋଇଥିବା ଭିତ୍ତିଭୂମି ନିର୍ମାଣ କରିବା ନୁହେଁ, ବରଂ ସେହି ଘାଟଗୁଡ଼ିକୁ ପୁନରୁଦ୍ଧାର କରିବା ଯେଉଁଠାରେ ଚୈତନ୍ୟ ମହାପ୍ରଭୁଙ୍କ କୀର୍ତ୍ତନ ଏକଦା ଲୋକଙ୍କୁ ଆକର୍ଷିତ କରିଥିଲା । ଏହାର ଅର୍ଥ ସେହିସବୁ ଶିକ୍ଷାନୁଷ୍ଠାନଗୁଡ଼ିକୁ ମଧ୍ୟ ସୁଦୃଢ଼ କରିବା ଯାହାର ସ୍ୱପ୍ନ ଈଶ୍ୱର ଚନ୍ଦ୍ର ବିଦ୍ୟାସାଗର ଦେଖିଥିଲେ । ଏହାର ଅର୍ଥ ଶହ ଶହ ବର୍ଷ ଧରି ବଙ୍ଗରେ ବସବାସ କରୁଥିବା ଆମର ଆଦିବାସୀ ଭାଇଭଉଣୀମାନଙ୍କୁ ମର୍ଯ୍ୟାଦା, ସମ୍ମାନ ଏବଂ ସୁଯୋଗ ଦେବା । ଏହାର ଅର୍ଥ ଦୀର୍ଘଦିନ ଧରି ଶାସକ ଦଳ ଦ୍ୱାରା ବୈମାତୃକ ମନୋଭାବ କାରଣରୁ ଅବହେଳିତ ହୋଇ ରହିଥିବା ପାର୍ବତ୍ୟାଞ୍ଚଳର ଲୋକଙ୍କ ଆକାଂକ୍ଷା ପୂରଣ କରିବା ।
ଗତ କିଛି ଦଶନ୍ଧି ଧରି ଭୟ ଏବଂ କୁଶାସନ ଯୋଗୁଁ ଏପରି ଲାଗୁଥିଲା ଯେପରି ପଶ୍ଚିମବଙ୍ଗର ସୁବର୍ଣ୍ଣ ଯୁଗ ଚାଲିଯାଇଛି । କିନ୍ତୁ ଆଜି, ନୂତନ ଆତ୍ମବିଶ୍ୱାସ ଓ ଶକ୍ତି ସହିତ, ବଙ୍ଗ ପୁଣି ଥରେ ସମୃଦ୍ଧି ଓ ଶାନ୍ତିର ଏକ ନୂତନ ଯୁଗରେ ପ୍ରବେଶ କରିବାକୁ ଯାଉଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱ ଏବଂ ମାର୍ଗଦର୍ଶନରେ ଗଠିତ ପ୍ରଥମ ବିଜେପି ସରକାର ଗୁରୁଦେବଙ୍କ ଦ୍ୱାରା ବର୍ଣ୍ଣିତ "ନୂତନ' ଭାବନା ସହିତ ସେବାର ସଂକଳ୍ପକୁ ନେଇ ଆଗକୁ ବଢ଼ିବ । ବଙ୍ଗର ପ୍ରତିଷ୍ଠା ଓ ସମୃଦ୍ଧି ସହିତ ଏହାର ସାଂସ୍କୃତିକ ଗୌରବ ବୃଦ୍ଧି କରିବା ପାଇଁ କାର୍ଯ୍ୟ କରିବ ।
