ନୂଆଦିଲ୍ଲୀ ୩୦/୦୬: ତେଲେଙ୍ଗାନାରେ ବଡ଼ ଅଘଟଣ। ସାଙ୍ଗାରେଡ୍ଡୀ ଜିଲ୍ଲାର ପାଶା ମେଲାରାମ ଇଣ୍ଡଷ୍ଟ୍ରିଆଲ୍ ଅଞ୍ଚଳରେ ଭୟଙ୍କର ଦୁର୍ଘଟଣା ଘଟିଛି। ଏଠାରେ ଥିବା ଏକ କେମିକାଲ୍ସ କାରଖାନାରେ ବଡ଼ ଧରଣର ବିସ୍ଫୋରଣ ଘଟିଛି। ଫଳରେ ସେଠାରେ ଉପସ୍ଥିତ ଥିବା ୧୦ ଜଣ ଶ୍ରମିକଙ୍କର ମୃତ୍ୟୁ ହୋଇଛି ।
ସୂଚନା ଅନୁଯାୟୀ, ସୋମାବାର ସକାଳେ ସେଗାଚି କେମିକାଲ୍ସ କାରଖାନାରେ ବିସ୍ଫୋରଣ ହୋଇଥିଲା। କେମିକାଲ ଭର୍ତ୍ତି ଟ୍ୟାଙ୍କର ଫାଟିବାରୁ ଏହି ବିସ୍ଫୋରଣ ଘଟିଥିଲା। ଫଳରେ ଚାହୁଁ ଚାହୁଁ ପୁରା କାରଖାନାରେ ନିଆଁ ବ୍ୟାପି ଯାଇଥିଲା । ଏହି ଘଟଣାରେ ୧୦ଜଣ ଶ୍ରମିକଙ୍କ ମୃତ୍ୟୁ ହୋଇଥିବା ବେଳେ ୨୦ଜଣ ଶ୍ରମିକ ଗୁରୁତର ଆହତ ହୋଇଛନ୍ତି। ସମସ୍ତ ଆହତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି।ଆହତଙ୍କ ଅବସ୍ଥା ଗୁରୁତର ଥିବାରୁ ଆଗକୁ ମୃତ୍ୟୁ ସଂଖ୍ୟା ବଢିପାରେ ବୋଲି ଆଶଙ୍କା କରାଯାଉଛି।
ପ୍ରତ୍ୟକ୍ଷଦର୍ଶୀଙ୍କ କହିବାନୁସାରେ, ବିସ୍ଫୋରଣ ଏତେ ଭୟଙ୍କର ଥିଲା ଯେ ଅନେକ ଶ୍ରମିକ ୧୦୦ ମିଟର ଦୂରକୁ ଛିଟିକି ପଡିଥିଲେ । ଏହାର ଶବ୍ଦ ଅନେକ କିଲୋମିଟର ଦୂର ଯାଏଁ ଶୁଭିଥିଲା। କାରଖାନାର ଆଖପାଖ ଅଞ୍ଚଳରେ ପୁରା ଆତଙ୍କ ଖେଳିଯାଇଥିଲା। ତେବେ ଏହି କମ୍ପାନୀ ଔଷଧ ତିଆରିରେ ବ୍ୟବହୃତ ପାଉଡର ପ୍ରସ୍ତୁତ କରେ । ବିଭିନ୍ନ ରାଜ୍ୟରୁ ୧୦୦ ରୁ ଅଧିକ ଶ୍ରମିକ ଏଠାରେ କାମ କରନ୍ତି । ଦୁର୍ଘଟଣାର ଖବର ପାଇବା ମାତ୍ରେ ଶ୍ରମିକଙ୍କ ସମ୍ପର୍କୀୟମାନେ କାରଖାନା ବାହାରେ ଏକାଠି ହୋଇଥିଲେ। ଉଦ୍ଧାର କାର୍ଯ୍ୟ ପରେ ଦୁର୍ଘଟଣାର କାରଣ ସମ୍ପର୍କରେ ତଦନ୍ତ ଆରମ୍ଭ ହୋଇଛି।
