ନୂଆଦିଲ୍ଳୀ,୮।୩: ଦେଶର ପ୍ରାୟ ୯୦% ପ୍ରତିଶତ ଲୋକଙ୍କ ପାଖରେ ଆଧାର କାର୍ଡ ଅଛି। ଆଜିକାଲି ଆଧାର କାର୍ଡ କେବଳ ଏକ ପରିଚୟପତ୍ର ନୁହେଁ। ଏହା ପ୍ରାୟ ପ୍ରତ୍ୟେକ ଗୁରୁତ୍ୱପୂର୍ଣ୍ଣ କାର୍ଯ୍ୟରେ ସାମିଲ ହୋଇଯାଇଛି। ବ୍ୟାଙ୍କ ଆକାଉଣ୍ଟ ଖୋଲିବା,ସରକାରୀ ଯୋଜନାର ଲାଭ ନେବା, କିମ୍ବା ମୋବାଇଲ୍ ସିମ୍ କିଣିବା ହେଉ, ପ୍ରାୟ ସବୁଠାରେ ଆଧାର ଆବଶ୍ୟକ। ଏହି କାରଣରୁ ଏଥିରେ ପ୍ରବେଶ କରାଯାଇଥିବା ସୂଚନା ସଠିକ୍ ହେବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ।
ଅନେକ ସମୟରେ, ଲୋକମାନେ ଆଧାର କାର୍ଡ ଆବେଦନ କରିବା ସମୟରେ ଛୋଟ ଛୋଟ ଭୁଲଗୁଡ଼ିକୁ ଅଣଦେଖା କରନ୍ତି। ତଥାପି, ଏହି ଭୁଲଗୁଡ଼ିକ ପରେ ସମସ୍ୟା ସୃଷ୍ଟି କରିପାରେ। ଆଧାର ଜାରି କରୁଥିବା ସଂସ୍ଥା UIDAI କିଛି ସୂଚନା ଅପଡେଟ୍ କରିବା ପାଇଁ କଠୋର ନିୟମ ସ୍ଥିର କରିଛି। ଏଥିରେ କିଛି ବିବରଣୀ ରହିଛି ଯାହା ଜୀବନରେ କେବଳ ଥରେ ପରିବର୍ତ୍ତନ କରାଯାଇପାରିବ। ତେବେ ଆସନ୍ତୁ ଜାଣି ନେବା ସେ ସବୁ କ’ଣ
ଜନ୍ମ ତାରିଖ ସଠିକ୍ ରହିବା ଜରୁରୀ
ଆପଣଙ୍କ ଆଧାର କାର୍ଡରେ ଲିପିବଦ୍ଧ ଜନ୍ମ ତାରିଖ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଯଦି ଏହା ଭୁଲ ଥାଏ, ତେବେ ଏହାକୁ ଅପଡେଟ୍ କରିବା ପାଇଁ ଆପଣଙ୍କର କେବଳ ଗୋଟିଏ ସୁଯୋଗ ଅଛି। ଏହାର ଅର୍ଥ ହେଉଛି ଆପଣ ଆପଣଙ୍କ ଜୀବନକାଳରେ କେବଳ ଥରେ ଏହି ସୂଚନା ସଂଶୋଧନ କରିପାରିବେ। ଆପଣଙ୍କୁ ସଠିକ୍ ଡକ୍ୟୁମେଣ୍ଟ ଦାଖଲ କରିବାକୁ ପଡିବ, ଯେପରିକି ଜନ୍ମ ପ୍ରମାଣପତ୍ର, ପାସପୋର୍ଟ, କିମ୍ବା ଅନ୍ୟାନ୍ୟ ବୈଧ ପ୍ରମାଣ। UIDAI କେବଳ ଏହି ଡକ୍ୟୁମେଣ୍ଟଗୁଡ଼ିକୁ ଯାଞ୍ଚ କରିବା ପରେ ପରିବର୍ତ୍ତନ ପାଇଁ ମଞ୍ଜୁରୀ ଦେଇଥାଏ। ଯଦି ସୂଚନା ପ୍ରଥମ ଥର ପାଇଁ ସଠିକ୍ ଭାବରେ ଅପଡେଟ୍ କରାଯାଇ ନଥାଏ କିମ୍ବା ଦ୍ୱିତୀୟ ଥର ପରିବର୍ତ୍ତନ କରିବାକୁ ଚେଷ୍ଟା କରାଯାଏ, ତେବେ ଅନୁରୋଧ ଗ୍ରହଣ କରାଯିବ ନାହିଁ। ତେଣୁ, ଆଧାର ପାଇଁ ଆବେଦନ କରିବା କିମ୍ବା ଅପଡେଟ୍ କରିବା ସମୟରେ ସଠିକ୍ ଜନ୍ମ ତାରିଖ ସୂଚନା ପ୍ରଦାନ କରିବା ଅତ୍ୟନ୍ତ ଜରୁରୀ।
ଜେଣ୍ଡର ବା ଲିଙ୍ଗ ଗୋଟିଏ ଥର କରିହେବ ପରିବର୍ତ୍ତନ
ଆପଣଙ୍କ ଆଧାର କାର୍ଡରେ ଲିଙ୍ଗ ସୂଚନା ପରିବର୍ତ୍ତନ କରିବା ପାଇଁ କଠୋର ନିୟମ ରହିଛି। UIDAI ନିୟମ ଅନୁଯାୟୀ, ଏହି ସୂଚନା ଜୀବନରେ କେବଳ ଥରେ ଅପଡେଟ୍ କରାଯାଇପାରିବ। ଯଦି କୌଣସି କାରଣରୁ ପରିବର୍ତ୍ତନ ଆବଶ୍ୟକ ହୁଏ, ତେବେ ସଠିକ୍ ଡକ୍ୟୁମେଣ୍ଟେସନ୍ ଦାଖଲ କରିବାକୁ ପଡିବ। ସେଭଳି ଜୀବନରେ କେବଳ ଦୁଇ ଥର ନିଜର ନାଁ ପରିବର୍ତ୍ତନ କରିହେବ ତାଠାରୁ ଅଧିକ ଥର ସମ୍ଭବ ନୁହେଁ।
