ଲକ୍ଷ୍ନୌ: ଯମୁନାରେ ହରିୟାଣା ଜହର ମିଶାଇଥିବା ମନ୍ତବ୍ୟ ଉପରେ ନିର୍ବାଚନ ଆୟୋଗଙ୍କ ପାଖରେ ଜବାବ ରଖିଛନ୍ତି ଆପ୍ ସୁପ୍ରିମୋ ଅରବିନ୍ଦ କେଜ୍ରିୱାଲ । ଯମୁନା ପାଣିର ମାନ ଖରାପ ହେବା ସାଧାରଣରେ ଏକ ଚିନ୍ତାର ବିଷୟ ହୋଇଥିବାରୁ ଏହି ପ୍ରସଙ୍ଗ ଉତ୍ଥାପନ କରିବାକୁ ମୁଁ ଏଭଳି ମନ୍ତବ୍ୟ ଦେଇଥିଲି ବୋଲି କେଜ୍ରିୱାଲ୍ କହିଛନ୍ତି । ଯମୁନା ପାଣିରେ ହରିୟାଣା ସରକାର ବିଷାକ୍ତ ବର୍ଜ୍ୟବସ୍ତୁ ମିଶ୍ରଣ କରୁଛନ୍ତି । ଏତେ ବିଶାକ୍ତ ଯେ ଏହାକୁ ଦିଲ୍ଲୀରେ ବିଶୋଧନ କରିବା କଷ୍ଟକର ହୋଇପଡ଼ୁଛି। ଦିଲ୍ଲାବାସୀଙ୍କୁ ପାଣିରୁ ବଞ୍ଚିତ କରିବାକୁ ହରିୟାଣା ସରକାର ଏହା କରୁଛନ୍ତି ବୋଲି କେଜ୍ରିୱାଲ ଅଭିଯୋଗ କରିଥିଲେ ।
କେଜ୍ରିୱାଲଙ୍କ ଏହି ଅଭିଯୋଗକୁ ବିରୋଧ କରିବା ସହ ତାଙ୍କ ବିରୋଧରେ ଏତଲା ଦେବେ ବୋଲି ହରିୟାଣା ସରକାର ଚେତାବନୀ ଦେଇଥିଲେ । କେଜ୍ରିୱାଲଙ୍କ ବିସ୍ଫୋରକ ମନ୍ତବ୍ୟକୁ ନେଇ ରାଜନୀତି ମଧ୍ୟ ଜୋର ଧରିଛି । ଏହାରି ମଧ୍ୟରେ ଭାରତୀୟ ନିର୍ବାଚନ ଆୟୋଗ (ଇସିଆଇ) ତାଙ୍କୁ ନୋଟିସ୍ କରି ବୁଧବାର(ଜାନୁଆରୀ ୨୯) ସନ୍ଧ୍ୟା ୮ ସୁଦ୍ଧା ଏହାକୁ ପ୍ରମାଣିତ କରିବାକୁ ନିର୍ଦ୍ଦେଶ ଦେଇଥିଲେ । ଜବାବରେ କେଜ୍ରିୱାଲ କହିଛନ୍ତି, ହରିୟାଣାରୁ ଆସୁଥିବା ଜଳ ଉପରେ ଦିଲ୍ଲୀ ନିର୍ଭର କରେ । ହରିୟାଣାରୁ ଆସୁଥିବା ପାଣିର ପ୍ରଦୂଷଣକୁ ଉଜାଗର କରିବା ପାଇଁ ଏଭଳି ବୟାନ ଦିଆଯାଇଥିଲା । ସେ ଆହୁରି କହିଛନ୍ତି ଯେ, ହରିୟାଣାରୁ ଆସୁଥିବା ପାଣି ଏତେ ବିଷାକ୍ତ ଯେ ଏହାକୁ ଦିଲ୍ଲୀରେ ବିଶୋଧନ କରି ପାନୀୟ ଜଳରେ ପରିଣତ କରିବା ଅସମ୍ଭବ ହେଇ ପଡ଼ୁଛି। ଏପରି ବିଷାକ୍ତ ପାଣିକୁ ଲୋକେ ପିଇଲେ ଏହା ଗୁରୁତର ସ୍ୱାସ୍ଥ୍ୟ ବିପଦ ସୃଷ୍ଟି କରିବା ସହ ମୃତ୍ୟୁର କାରଣ ପାଲଟି ପାରେ। ସେ କହିଛନ୍ତି, ତାଙ୍କର ଏହି ମନ୍ତବ୍ୟକୁ ଗୋଷ୍ଠୀ ମଧ୍ୟରେ ଶତ୍ରୁତା ଉସୁକାଇବା କିମ୍ବା ଜାତୀୟ ସଂହତି ପ୍ରତି ବିପଦ ସୃଷ୍ଟିକାରୀ ବୋଲି କୁହାଯାଇପାରିବ ନାହିଁ ।
ଯମୁନା ପାଣି ଉପରେ ଜାନୁଆରୀ ୨୭ ତାରିଖରେ ଦିଲ୍ଲୀ ଜଳ ବୋର୍ଡର ସିଇଓ ଏକ ଚିଠି ଦେଇଥିଲେ। ଏହି ଚିଠିକୁ ଆଧାର କରି ସେ ମନ୍ତବ୍ୟ ଦେଇଥିଲେ ବୋଲି କେଜ୍ରିୱାଲ କହିଛନ୍ତି। ଚିଠିରେ ବୋର୍ଡ ନିଜେ ସ୍ୱୀକାର କରିଥିଲେ ଯେ, ହରିୟାଣାରୁ ଦିଲ୍ଲୀ ଆସୁଥିବା ପାଣିରେ ଆମୋନିଆର ସ୍ତର ବହୁ ଗୁଣ ବୃଦ୍ଧି ପାଇଛି। ଏହା ୬.୫-୭ ପିପିଏମ ସ୍ତର ପର୍ଯ୍ୟନ୍ତ ପହଞ୍ଚିଛି । ୱାଜିରାବାଦ ବ୍ୟାରେଜର ଉପରମୁଣ୍ଡରେ କିଛି ଅପରିଷ୍କାର ସ୍ୱେରେଜ କିମ୍ବା ଶିଳ୍ପ ଆବର୍ଜନା ମିଶ୍ରଣ ଯୋଗୁ ଯମୁନା ନଦୀରେ ଆମୋନିଆ ବୃଦ୍ଧି ପାଉଛି ବୋଲି ଜଳ ବୋର୍ଡ ଚିଠିରେ ଉଲ୍ଲେଖ କରିଥିଲା । ପାନୀୟ ଜଳରେ ଅତ୍ୟଧିକ ଆମୋନିଆ ମିଶିବାରୁ ଏହାକୁ ପିଇବା ସ୍ୱାସ୍ଥ୍ୟପକ୍ଷେ କ୍ଷତିକାରକ । ତେଣୁ ମୋ ମନ୍ତବ୍ୟ ନିର୍ବାଚନ ଆଚରଣ ବିଧିର ଉଲ୍ଲଂଘନ ନୁହେଁ। ଅଭିବ୍ୟକ୍ତିର ସ୍ୱାଧୀନତା ଅଧୀନରେ ଏହି ମନ୍ତବ୍ୟ ଦିଆଯାଇଛି ବୋଲି କେଜ୍ରିୱାଲ କହିଛନ୍ତି।
