ନୂଆଦିଲ୍ଲୀ: ଆଫଗାନିସ୍ତାନରେ ହୋଇଥିବା ଭୟଙ୍କର ଭୂକମ୍ପରେ ଏଯାଏଁ ୧୪୧୧ ଜଣଙ୍କ ମୃତ୍ୟୁ ହୋଇଛି । ତାଲିବାନ ସରକାରଙ୍କ ମୁଖପାତ୍ର ଜାବିହୁଲ୍ଲା ମୁଜାହିଦ ଏହି ସୂଚନା ଦେଇଛନ୍ତି । କହିଛନ୍ତି ଯେ କୁନାର ପ୍ରଦେଶ ଯାହା ୬.୦ ତୀବ୍ରତା ବିଶିଷ୍ଟ ଭୂମିକମ୍ପରେ ସବୁଠାରୁ ଅଧିକ କ୍ଷତିଗ୍ରସ୍ତ ହୋଇଛି । X ରେ ଏକ ପୋଷ୍ଟରେ ସେ କହିଛନ୍ତି ଯେ, ଅନ୍ୟ ୩୧୨୪ ଜଣ ଆହତ ହୋଇଛନ୍ତି ଏବଂ ୫୪୦୦ରୁ ଅଧିକ ଘର ନଷ୍ଟ ହୋଇଯାଇଛି। ରବିବାର ବିଳମ୍ବିତ ରାତିରେ ହୋଇଥିବା ଭୂମିକମ୍ପ ଆଫଗାନିସ୍ତାନରେ ବ୍ୟାପକ କ୍ଷୟକ୍ଷତି ଘଟାଇଛି, ଅନେକ ଗ୍ରାମକୁ ଧ୍ୱଂସ କରିଦେଇଛି । କୁନାର ପ୍ରଦେଶର ଗାଜିଆବାଦ ଗ୍ରାମ ନିଶ୍ଚିହ୍ନ ହୋଇଯାଇଛି। ସ୍ଥାନୀୟ ଲୋକଙ୍କ ସୂଚନା ଅନୁସାରେ ଲୋକମାନେ ଏବେ ବି ଧ୍ୱଂସାବଶେଷ ତଳେ ଚାପି ହୋଇ ରହିଛନ୍ତି, କିନ୍ତୁ ଭଗ୍ନାବଶେଷ କାଢିବା ଏବଂ ନିଖୋଜ ଲୋକଙ୍କୁ ଉଦ୍ଧାର କରିବାର କୌଣସି କାର୍ଯ୍ୟାନୁଷ୍ଠାନ ନାହିଁ।"
ଆଫଗାନିସ୍ତାନ ପୃଥିବୀର ସବୁଠାରୁ ସକ୍ରିୟ ଭୂକମ୍ପୀୟ ଅଞ୍ଚଳରେ ଅବସ୍ଥିତ, ଯେଉଁଠାରେ ହିନ୍ଦୁକୁଶ ପର୍ବତମାଳାକୁ ଅଗଭୀର ଭୂମିକମ୍ପର କେନ୍ଦ୍ରସ୍ଥଳ କୁହାଯାଏ। ଭାରତୀୟ ପ୍ଲେଟ ଏବଂ ୟୁରେସିଆନ ପ୍ଲେଟ ମଧ୍ୟରେ ଅବସ୍ଥିତ ହେତୁ ଏହି ଅଞ୍ଚଳ ଅତ୍ୟନ୍ତ ସକ୍ରିୟ। ଫଳସ୍ୱରୂପ, ଉତ୍ତର ଆଫଗାନିସ୍ତାନର ପାମିର-ହିନ୍ଦୁକୁଶ ଅଞ୍ଚଳରେ ତୀବ୍ର ଭୂମିକମ୍ପ ଅନୁଭୂତ ହୁଏ, ଯାହାର ଗଭୀରତା ୨ ଶହ କିଲୋମିଟର ପର୍ଯ୍ୟନ୍ତ ପହଞ୍ଚିଥାଏ । ଏହା ବିଶ୍ୱ ସ୍ତରରେ ଏକ ବିରଳ ଘଟଣା।
