ପୃଥିବୀ ରାଇଜ ରାଜା ହେବାକୁ ଚୀନର ମନ ଉଚ୍ଛନ୍ନ । କରୋନା ଭୂତାଣୁ ଛାଡ଼ି ସାରା ବିଶ୍ୱରେ ତାଣ୍ଡବ ଲୀଳା ରଚିଥିବା ବେଜିଂ ଏବେ ଆତଙ୍କବାଦର ନୂଆ କୌଶଳ ଆପଣାଇଛି । କୃଷି ଆତଙ୍କବାଦକୁ ଅସ୍ତ୍ର କରି ବିଶ୍ୱ ଖାଦ୍ୟ ଶୃଙ୍ଖଳକୁ ଧ୍ୱଂସ କରିବାର ଷଡ଼ଯନ୍ତ୍ର ପଦାକୁ ଆସିଛି।
ଶସ୍ୟ ଶ୍ୟାମଳା କ୍ଷେତ ପାଲଟିଯିବ କି ଯୁଦ୍ଧକ୍ଷେତ୍ର? ଯେଉଁଠି ଏବେ ସୁନା ଫଳୁଛି, ସେଇଠି ବିଷ ଉତ୍ପାଦନ ହେବ? ସାରା ବିଶ୍ୱକୁ ଏବେ ଘାରିଛି ଏ ଚିନ୍ତା । କରୋନା ପରି ଭୂତାଣୁକୁ ଛାଡ଼ି ସାରା ପୃଥିବୀରେ ତାଣ୍ଡବ ରଚିଥିବା ଡ୍ରାଗନ୍ ଚୀନ୍ ଏବେ ‘ସୁପର ପାୱାର’ ପାଲଟିବାକୁ ନୂଆ ଯୁଦ୍ଧର ପରିକଳ୍ପନା କରିଛି । ହାତରେ ନ ମାରି ଭାତରେ ମାରିବାକୁ ଆରମ୍ଭ କରିଛି ବଡ଼ ଷଡ଼ଯନ୍ତ୍ର । ଯୁଦ୍ଧ ଜିତିବାକୁ ଖାଦ୍ୟକୁ କରିଛି ମାଧ୍ୟମ । ବିଶ୍ୱ ସମ୍ରାଟ ହେବାକୁ ଚାଇନା ରଚିଛି ଚକ୍ରବ୍ୟୂହ । ଫସଲ ଉତ୍ପାଦନ କରୁଥିବା କ୍ଷେତରେ ଜୈବିକ ଅସ୍ତ୍ର ଫଙ୍ଗସ୍ ପ୍ରୟୋଗ କରି ଫସଲକୁ ସଂପୂର୍ଣ୍ଣ ନଷ୍ଟ କରିଦେବ । କରୋନା ପରି ଏ ଚକ୍ରବ୍ୟୂହରେ ଗୋଟିଏ ପରେ ଗୋଟିଏ ଦେଶ ଫସିବେ । ଖାଦ୍ୟ ସଂକଟ ଉପୁଜି ସାରା ବିଶ୍ୱରେ ଆସିବ ହାହାକାର । ଡ୍ରାଗନର ଏ ଦୀର୍ଘମିଆଦି ଯୋଜନା କିନ୍ତୁ ପ୍ରଥମରୁ ଝୁଣ୍ଟିଛି । ଚାଇନାର ଏ ‘କୃଷି ଆତଙ୍କବାଦ’କୁ ସମାଧି ଦେବାକୁ ଆମେରିକା ପଣ କରିଛି । ଶତ୍ରୁଠୁ ଅଧିକ କପଟତା କରୁଥିବା ଚୀନ୍ର ଏ ‘କୃଷି ଆତଙ୍କବାଦ’ ଦ୍ୱାରା ଆଗକୁ ଭାରତ ଯେ ବହୁଳ କ୍ଷତିଗ୍ରସ୍ତ ନହେବ କିଏ କହିବ?
‘ବିଶ୍ୱ ସମ୍ରାଟ’ ପାଇଁ ନୂଆ ଅସ୍ତ୍ର
ମାଟିରେ ଦାୟ ନା ମଣିଷରେ । ମାଟି ମଣିଷର ନୁହେଁ, ମଣିଷ ମାଟିର । ବଳ ବୟସ ଗଡ଼ି ନିଃଶ୍ୱାସ ଟିକକ ଚାଲିଯିବା ପରେ ମାଟି ହିଁ ମଣିଷକୁ କୋଳେଇ ନିଏ । ମାଆ ଗର୍ଭ ପରି । ଏବେ ଏ ମାଟି ମାଆକୁ ଦଖଲ କରିବାକୁ ବେଜିଂର ଦୁର୍ବାର ଇଚ୍ଛା । ସାରା ବିଶ୍ୱ ଆତଙ୍କବାଦ ବିରୋଧରେ ଲଢ଼ୁଥିଲା ବେଳେ ନୂଆ ପ୍ରକାରର ଆତଙ୍କବାଦକୁ ଜନ୍ମ ଦେଇଛି ଚୀନ୍ । ଅଶାନ୍ତି, ରକ୍ତପାତ ଓ ଜବରଦଖଲ ପାଇଁ ସମୟ ଅନୁସାରେ ନିଜ ରଣକୌଶଳ ବଦଳାନ୍ତି ଆତଙ୍କବାଦୀ ସଂଗଠନ । ପୃଥିବୀର ମୁକୁଟବିହୀନ ରାଜା ହେବାକୁ ‘କୃଷି ଆତଙ୍କବାଦ’ ଭଳି ଜୈବିକ ଅସ୍ତ୍ର ପ୍ରସ୍ତୁତ କରିଛି ଚୀନ୍ । ଏ ଆତଙ୍କବାଦ ଜରିଆରେ ଅଚିରେ ବିଶ୍ୱକୁ ନିଜ ମୁଠାକୁ ଆଣିପାରିବ ବୋଲି ବେଜିଂର ପ୍ରଚଣ୍ଡ ବିଶ୍ୱାସ ।
ଜୟ ଯବାନ, ଜୟ କିଷାନ । ଦେଶର ସାମାଜିକ ତଥା ଅର୍ଥନୈତିକ ବିକାଶର ଚାବିକାଠି ହେଉଛି କୃଷି । ଜୀବନଧାରଣର ମୁଖ୍ୟ ଆବଶ୍ୟକତା ପୂରଣ କରନ୍ତି ଆମ ଅନ୍ନଦାତା । ଚାଷ ଆଉ ଚାଷୀଙ୍କ ବିନା ଦୁନିଆର ପରିକଳ୍ପନା ବି କରି ହେବନି । ନିଜ ଶକ୍ତିର ଅହଂକାରରେ ଅନ୍ୟକୁ ନୀଚା ଦେଖାଇବାକୁ ଡ୍ରାଗନ୍ କିଛି ବି କରିବାକୁ ପ୍ରସ୍ତୁତ । କୋଭିଡ୍ ଭୂତାଣୁରେ ଲକ୍ଷ ଲକ୍ଷ ଲୋକଙ୍କୁ ମାରିଥିବା ଚୀନ୍ ଏବେ ଲୋକଙ୍କୁ ଭୋକରେ ମାରିବାକୁ ଗୋଟି ଚଳାଇଛି । ହେଲେ ଆମେରିକା ହାତରେ ଧରାପଡ଼ିଛି ଏ ଚାଲ୍ ।
କୃଷି ଆତଙ୍କବାଦର ଷଡ଼ଯନ୍ତ୍ର ଅଭିଯୋଗରେ ଦୁଇ ଜଣ ଚୀନ୍ ନାଗରିକଙ୍କୁ ଗିରଫ କରିଛି ଆମେରିକୀୟ ତଦନ୍ତକାରୀ ସଂସ୍ଥା (ଏଫ୍ବିଆଇ)। ଉଭୟ ଅଭିଯୁକ୍ତ ଚୀନ୍ରୁ ଆମେରିକାକୁ ବିପଦଜନକ ଫଙ୍ଗସ୍ ଚୋରା ଚାଲାଣ କରୁଥିଲେ । ଏହା ପଛରେ ବଡ଼ ଷଡ଼ଯନ୍ତ୍ରର ପ୍ରମାଣ ପାଇଛି ଏଫ୍ବିଆଇ । ଏହି ପ୍ରକାରର ଫଙ୍ଗସ୍ ଜମିର ଫସଲରେ ରୋଗ ସୃଷ୍ଟି କରିବେ । ଚାଷଜମିକୁ ମରୁଭୂମିରେ ପରିଣତ କରିଦେବେ । ଯେ କୌଣସି ଦେଶର ଆର୍ଥିକ ସ୍ଥିତିକୁ ମାଟିରେ ମିଶାଇବାକୁ ଏହି ବିପଦପୂର୍ଣ୍ଣ ଫଙ୍ଗସ୍କୁ ଜୈବିକ ଅସ୍ତ୍ର ଭାବରେ ବ୍ୟବହାର କରିହେବ । ମିଶିଗାନ୍ ବିଶ୍ୱବିଦ୍ୟାଳୟରେ କାମ କରୁଥିବା ଦୁଇ ଚାଇନା ନାଗରିକ ଏଠାର ପରୀକ୍ଷାଗାରରେ ବ୍ୟବହାର କରିବାକୁ ଏହି ଫଙ୍ଗସ୍ ଆଣିଥିବା ମାନିଛନ୍ତି । ପଚରା ଉଚରା ବେଳେ ଦୁହେଁ କହିଛନ୍ତି ଷଡ଼ଯନ୍ତ୍ରର କାହାଣୀ । ଏ ଫଙ୍ଗସ୍ ଆମେରିକାରେ ଖାଦ୍ୟ ସଂକଟର ବୀଜ ବୁଣିଥାନ୍ତା ।
ଭାତରେ ମାରିବାକୁ ଷଡ଼ଯନ୍ତ୍ର
ଆମେରିକୀୟ କୃଷି ବିଜ୍ଞାନୀଙ୍କ ଯୁକ୍ତି, ଏହି ଫଙ୍ଗସ୍ ହେଡ୍ ବ୍ଲାଇଟ୍ କିମ୍ବା ସ୍କାବ ନାମକ ରୋଗ ସୃଷ୍ଟି କରେ । ଏହା ଶସ୍ୟର ଗୁଣବତ୍ତା ନଷ୍ଟ କରିଦେବ । ଫସଲର ଉତ୍ପାଦନ କ୍ଷମତା ହ୍ରାସ ମଧ୍ୟ କରିବ । ଏହା ଗହମ ଓ ଧାନ ଫସଲକୁ ବହୁଳ ଭାବେ କ୍ଷତି ପହଞ୍ଚାଇଥାଏ । ଅମଳ କମିବା ସହ ସଂକ୍ରମିତ ଶସ୍ୟ ହାଲୁକା ଏବଂ ଭଙ୍ଗୁର ହୋଇଥାଏ । ବିଚରା ଚାଷୀ ଏହାଦ୍ୱାରା କ୍ଷତି ସହିବା ସହ ଖାଦ୍ୟ ସଂକଟର ଧାରା ଆରମ୍ଭ ହୁଏ । ବିଗ୍ ବ୍ରଦର୍ ଆମେରିକାକୁ ତଳକୁ ଠେଲି ଶୀର୍ଷସ୍ଥାନ ଦଖଲ କରିବାକୁ ଭାତରେ ମାରିବାକୁ ଚୀନର ଗୋଳିଆ ଗୋପନ ଇଚ୍ଛା ଧରାପଡ଼ିଛି । ବିଶ୍ୱ ସମୁଦାୟ ଆଗରେ ଚୀନ୍ ଏବେ ଖଳନାୟକ ।
ଏକ ସାଇନ୍ସ ଜର୍ଣ୍ଣାଲ ଅନୁଯାୟୀ ୧୯୮୦ ଦଶକରେ ଆମେରିକାରେ ‘ଫ୍ୟୁଜେରିୟମ ହେଡ ବ୍ଲାଷ୍ଟ’ ଶସ୍ୟ ସଂକ୍ରମଣ ମହାମାରୀ ସ୍ତର ପର୍ଯ୍ୟନ୍ତ ପହଞ୍ଚି ଯାଇଥିଲା । ବିହନ ଅମଳ, ମୂଲ୍ୟ ଓ ଗୁଣବତ୍ତା ଗଭୀର ଭାବରେ କ୍ଷତିଗ୍ରସ୍ତ ହୋଇଥିଲା । ଏହି ରୋଗକୁ ସେ ସମୟରେ ନିୟନ୍ତ୍ରଣ କରିବା କଷ୍ଟକର ହୋଇଥିଲା । ଏହି ଫଙ୍ଗସ୍ ଦ୍ୱାରା ଯେ କେବଳ ଫସଲ ନଷ୍ଟ ହୁଏନି । ପଶୁପକ୍ଷୀ ଓ ସାଧାରଣ ଲୋକ ମଧ୍ୟ ଏଥିରେ ବହୁଳ ପ୍ରଭାବିତ ହୁଅନ୍ତି । ଫସଲକୁ ଏ ରୋଗପୋକ ସଂକ୍ରମଣ ପରେ ବିଷାକ୍ତ ପଦାର୍ଥ ଉତ୍ପନ୍ନ ହୁଏ । ଏହି ସଂକ୍ରମିତ ଶସ୍ୟ ଖାଉଥିବା ଲୋକ ଓ ପଶୁପକ୍ଷୀ ରୋଗାକ୍ରାନ୍ତ ହୁଅନ୍ତି । ଯକୃତକୁ କ୍ଷତି ପହଞ୍ଚେ । ପ୍ରଜନନ ସମସ୍ୟା ସୃଷ୍ଟି ହୁଏ । ପ୍ରାଣୀ ସମ୍ପଦକୁ ମାଡ଼ି ଆସେ ଅକାଳ ମଡ଼କ । କୃଷି ପ୍ରଣାଳୀକୁ ରୋଗାକ୍ରାନ୍ତ କରିବା ସହ ଅନ୍ୟ ଜୈବିକ ଉପାଦାନକୁ କ୍ଷତି ପହଞ୍ଚାଇବା କୃଷି ଆତଙ୍କବାଦର ମୂଳ ଉଦ୍ଦେଶ୍ୟ । ଏହାଦ୍ୱାରା ଖାଦ୍ୟ ପ୍ରକିୟାକରଣ ଖର୍ଚ୍ଚର ଗ୍ରାଫ୍ ଉପରମୁହାଁ ହେବ । ବାଣିଜ୍ୟିକ ସଂପର୍କରେ ମଧ୍ୟ ଲାଗିବ ତାଲା । ଚାଷଜମିରୁ ଅସ୍ଥିରତା ଓ ଭୟର ବାତାବରଣ ଦେଶର ଖାଦ୍ୟ ଶୃଙ୍ଖଳରେ ବିଭ୍ରାଟ ଆଣିବ । ଦେଶର ଅର୍ଥନୀତିକୁ ଧ୍ୱସ୍ତ କରିବା ସହ ସାମାଜିକ ଅଶାନ୍ତି ଛିଡ଼ା କରାଇବ । ବଡ଼ କଥା ଏପରି ଅପରାଧ କରିଥିବା ବ୍ୟକ୍ତି ଧରାପଡ଼ିବାର ସମ୍ଭାବନା ଖୁବ୍ କମ୍ । ଅଳ୍ପ ଖର୍ଚ୍ଚରେ ଏକ ବଡ଼ ଉଦ୍ଦେଶ୍ୟ ସାଧନ ଅଚିରେ ହୋଇଯାଏ । ତେଣୁ ବେଜିଂ କୃଷି ଆତଙ୍କବାଦରେ ଫଙ୍ଗସ୍କୁ ଏକ ବଡ଼ ଅସ୍ତ୍ର ଭାବରେ ବ୍ୟବହାର କରିବାର ଗୁପ୍ତ ଯୋଜନା ପ୍ରସ୍ତୁତ କରିଛି ।
ବିଶ୍ୱଯୁଦ୍ଧରେ ବ୍ୟବହାର କରିଥିଲା ଜର୍ମାନୀ
କୃଷି ଆତଙ୍କବାଦର ଇତିହାସ କେତେ ପୁରୁଣା? ହଁ...ବିଶ୍ୱ ପାଇଁ ଏହା ଆଦୌ ନୂଆ ନୁହେଁ । ପ୍ରଥମ ବିଶ୍ୱଯୁଦ୍ଧ ସମୟରେ ଜର୍ମାନୀ ଏ ଅସ୍ତ୍ରକୁ ଶତ୍ରୁପକ୍ଷ ବିରୋଧରେ ବ୍ୟବହାର କରିଥିଲା । ଦ୍ୱିତୀୟ ବିଶ୍ୱଯୁଦ୍ଧ ସମୟରେ ବ୍ରିଟେନର ଆଳୁ ଫସଲକୁ ଟାର୍ଗେଟ କରିଥିଲା । ଆଳୁ ଫସଲକୁ ନଷ୍ଟ କରିବାକୁ ସ୍ୱତନ୍ତ୍ର ପୋକ ବିମାନ ଜରିଆରେ ଛାଡ଼ିଥିଲା । କ୍ଷେତରେ ତାଣ୍ଡବ ରଚିଥିଲା ଜର୍ମାନୀର ଏ କୌଶଳ । ଜାପାନ ମଧ୍ୟ ଆମେରିକା ଓ ସୋଭିଏତ୍ ଋଷର ଗହମ କ୍ଷେତରେ ଧ୍ୱଂସଲୀଳା ରଚିବାକୁ ଯୋଜନା କରିଥିଲା । ଆମେରିକା ମୁହଁତୋଡ଼ ଜବାବ ଦେବାକୁ ଯାଇ ଜାପାନରେ ଫସଲହାନୀର ବିଧ୍ୱସ୍ତ ଆଣିବାକୁ ଚେତାବନୀ ଦେଇଥିଲା ।
୨୦୧୬ରେ ବାଲାଂଦେଶରୁ ବିଷାକ୍ତ ପଙ୍ଗପାଳ ଭାରତମୁହାଁ ହୋଇଥିଲେ । ସମ୍ଭାବ୍ୟ ବିପଦକୁ ଆଖିରେ ରଖି ପଶ୍ଚିମବଙ୍ଗର ୩ଟି ଜିଲ୍ଲାରେ ୩ ବର୍ଷ ପାଇଁ ଗହମ ଚାଷକୁ ନିଷେଧ କରାଯାଇଥିଲା । କେନ୍ଦ୍ର ଓ ରାଜ୍ୟ ସରକାର ମିଳିତ ଭାବେ ଏହାକୁ ଅତି ସତର୍କତାର ସହ ନିୟନ୍ତ୍ରଣ କରିଥିଲେ ।
ଭାରତ ପ୍ରତି ବିପଦ
ଭାରତ ଭୂ-ଖଣ୍ଡ ଉପରେ ଚୀନ୍ର ସବୁବେଳେ ଆଖି । ବିନା ଲଢ଼େଇରେ ଯୁଦ୍ଧ ଜୟ, ଏହା ଚାଇନାର ଅତି ପ୍ରିୟ ଫର୍ମୁଲା । ଭାରତକୁ ବୁଢ଼ିଆଣୀ ଜାଲରେ ପକାଇବାକୁ ଚାଇନାର ଉଦ୍ୟମରେ ପୂର୍ଣ୍ଣଚ୍ଛେଦ ନାହିଁ । ଅପରେସନ ସିନ୍ଦୂର ପରେ ପାକିସ୍ତାନ ରକ୍ତ ଚାଉଳ ଚୋବାଉଛି । ଚୀନ୍ ମଧ୍ୟ ଇତସ୍ତତଃ । ସୀମାନ୍ତରେ ଥିବା ଏ ଦୁଇ ଦେଶ ପଟୁ ଭାରତ ପ୍ରତି ବିପଦ ଥିଲା ବେଳେ ଆଗକୁ ଯେ ଭାରତ କୃଷି ଆତଙ୍କବାଦର ଶିକାର ନ ହେବ କିଏ କହିବ? ଭାରତର ଅର୍ଥନୀତି କୃଷି ଉପରେ ନିର୍ଭରଶୀଳ । ଆମ ଦେଶର ମୋଟ ଘରୋଇ ଉତ୍ପାଦରେ କୃଷିକ୍ଷେତ୍ରର ଅବଦାନ ୧୭ ପ୍ରତିଶତ । ଦେଶ ଜନସଂଖ୍ୟାର ପ୍ରାୟ ୫୫% କୃଷି ଓ ଆନୁଷଙ୍ଗିକ କାର୍ଯ୍ୟକଳାପରେ ନିୟୋଜିତ । ପଞ୍ଜାବ, ରାଜସ୍ଥାନ, ହିମାଚଳ ପ୍ରଦେଶ ଭଳି ପ୍ରମୁଖ କୃଷିପ୍ରଧାନ ରାଜ୍ୟର ସୀମାରେ ଶତ୍ରୁଦେଶ ପାକିସ୍ତାନ ଏବଂ ଚୀନ୍ । ତେଣୁ ଆଜି ନ ହେଲେ କାଲି କୃଷି- ଆତଙ୍କବାଦର ବିପଦ ରହିଛି ବୋଲି କୃଷିବିଜ୍ଞାନୀଙ୍କ ଅନୁମାନ । ଶତ୍ରୁଙ୍କ ଏ ଉଦ୍ୟମ ପଣ୍ଡ କରିବାକୁ ଭାରତକୁ ଏବେଠାରୁ ସତର୍କ ରହିବାର ଆବଶ୍ୟକତା ଅଛି ।
ଆତଙ୍କ, ଅଶାନ୍ତି, ଈର୍ଷା ଆଉ ହିଂସାର ବିଷ ପାଇଁ ଡ୍ରାଗନ୍ କାହିଁକି ଏତେ ବ୍ୟଗ୍ର? ବିଶ୍ୱ ବିନାଶର ମଞ୍ଜି କାହିଁକି? କରୋନା ଅନେକ କିଛି ଶିଖାଇଲା । ଅନୁତାପ କରୁନି ବେଜିଂ । ରାଇଜ ରଜା ହେବା, ମିଛ ହଟଚମଟ ଓ ଦପଦପ ଦେଖାଇବାକୁ ସାମ, ଦାମ, ଦଣ୍ଡ, ଭେଦର ଷଡ଼ଯନ୍ତ୍ର ଆଉ କେତେଦିନ? ପୃଥିବୀର ଭବିଷ୍ୟତ ଶାନ୍ତିରେ ନା ହାହାକାରରେ?
