ନୂଆଦିଲ୍ଲୀ,୨୦/୧୧: ପ୍ୟାରିସରୁ ନୂଆଦିଲ୍ଲୀ ଆସୁଥିବା ଏୟାର ଇଣ୍ଡିଆ ବିମାନ ଖରାପ ପାଗ ଯୋଗୁଁ ହେଲା ଡାଇଭର୍ଟ । ଡ୍ୟୁଟି ସରି ଯାଇଥିବାରୁ ପାଇଲଟ ଆଉ ବିମାନ ଉଡାଇବାକୁ ମନା କରିଦେଲେ । ଏହାପରେ ଜୟପୁର ବିମାନ ବନ୍ଦରରେ ସ୍ଥିତି ଜଟିଳ ହୋଇଥିବା ବେଳେ ଅନେକ ସମୟ ଧରି ଯାତ୍ରୀ ସେଠାରେ ଫସି ରହିଥିଲେ । ଯାହାପରେ ବିମାନ ପରିଚାଳନା କମ୍ପାନି ବସ ଜରିଆରେ ସଡ଼କ ମାର୍ଗରେ ଯାତ୍ରୀଙ୍କୁ ଦିଲ୍ଲୀରେ ପହଞ୍ଚାଇଥିଲା ।
ସୂଚନା ଅନୁଯାୟୀ, ଏୟାର ଇଣ୍ଡିଆ ବିମାନ ରବିବାର ରାତି ୧୦ଟାରେ ପ୍ୟାରିସରୁ ଉଡାଣ ଭରିଥିଲା । ସୋମବାର ସକାଳ ୧୦.୧୫ରେ ଦିଲ୍ଲୀରେ ଅବତରଣ କରିଥାନ୍ତା ।କିନ୍ତୁ ରାଜଧାନୀରେ ଘନ କୁହୁଡ଼ି ଯୋଗୁଁ ବିମାନକୁ ଜୟପୁର ଡାଇଭର୍ଟ କରାଯାଇଥିଲା । ଜୟପୁର ଏୟାରପୋର୍ଟରେ ବିମାନ ଦିଲ୍ଲୀ ଅଭିମୁଖେ ପୁଣି ଯାତ୍ରା ପାଇଁ ଅନୁମତି ଅପେକ୍ଷାରେ ଥିଲା। କିନ୍ତୁ ସେହି ସମୟରେ ପାଇଲଟ୍ ଡ୍ୟୁଟି ସମୟ ଶେଷ ହୋଇଥିବା କହି ଉଡାଣ ଜାରି ରଖିବାକୁ ମନା କରିଦେଲେ । ଯାହାପରେ ସେଠାରେ ହଙ୍ଗାମା ହୋଇଥିଲା । ଡିଜିସିଏ ଦ୍ୱାରା ପ୍ରସ୍ତୁତ ଫ୍ଲାଇଟ୍ ଡ୍ୟୁଟି ଟାଇମ୍ ଲିମିଟେସନ୍ ନିୟମ ଅନୁସାରେ, ଫ୍ଲାଇଟ୍ କ୍ରିୟୁଙ୍କୁ ପର୍ଯ୍ୟାପ୍ତ ବିଶ୍ରାମ ମିଳିବା ଦରକାର । ଅନ୍ୟପଟେ ମଝି ବାଟରେ ଫସିଥିବା ଯାତ୍ରୀ ବିକଳ୍ପ ଉଡାଣ ପାଇଁ ଦାବି କରିଥିଲେ, କିନ୍ତୁ ବିମାନ କମ୍ପାନି ତାହା ଯୋଗାଇବାରେ ବିଫଳ ହୋଇଥିଲା । ପରେ ସମସ୍ତ ଯାତ୍ରୀଙ୍କୁ ବସ ଯୋଗେ ଦିଲ୍ଲୀ ପଠାଯାଇଥିଲା । ଯାହାକୁ ନେଇ ଯାତ୍ରୀ ଅସନ୍ତୋଷ ହୋଇଛନ୍ତି ।
