ନୂଆଦିଲ୍ଲୀ: ବାରାମତୀରେ ବିମାନ ଦୁର୍ଘଟଣାରେ ପୂର୍ବତନ ମହାରାଷ୍ଟ୍ର ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ଦୁଃଖଦ ମୃତ୍ୟୁକୁ ନେଇ ଥମୁନି ବିବାଦ। ଏହା ଏକ ଦୁର୍ଘଟଣା ନା ପ୍ରାୟୋଜିତ ହତ୍ୟା ତାକୁ ନେଇ ଲାଗି ରହିଛି କଳ୍ପନାଜଳ୍ପନା। ଏବେ NCP (SP) ନେତା ରୋହିତ ପାୱାର ବିମାନ ଚଳାଚଳ ମନ୍ତ୍ରଣାଳୟ ଏବଂ ବିମାନ ଚଳାଚଳ ମନ୍ତ୍ରୀ ରାମ ମୋହନ ନାଇଡୁଙ୍କ ବିରୋଧରେ ଗମ୍ଭୀର ଅଭିଯୋଗ ଆଣିଛନ୍ତି। ଅଜିତ ପାୱାରଙ୍କ ପୁତୁରା ରୋହିତ ନାଇଡୁଙ୍କ ଇସ୍ତଫା ଦାବି କରିଛନ୍ତି। ଏହା ବ୍ୟତୀତ, ସେ ଗୃହମନ୍ତ୍ରୀ ଅମିତ ଶାହ ଏବଂ ପ୍ରଧାନମନ୍ତ୍ରୀ ମୋଦୀଙ୍କୁ ତଦନ୍ତରେ ହସ୍ତକ୍ଷେପ କରିବାକୁ ଅନୁରୋଧ କରିଛନ୍ତି।
କ’ଣ ଦାବି କରିଛନ୍ତି ରୋହିତ ?
NCP (SP) ସାଧାରଣ ସମ୍ପାଦକ ତଥା ବିଧାୟକ ରୋହିତ ପାୱାର ପ୍ରଧାନମନ୍ତ୍ରୀ ମୋଦୀଙ୍କୁ ଏନେଇ ଏକ ଚିଠି ଲେଖିଛନ୍ତି । ଏଥିରେ ତାଙ୍କର ଦାବିକୁ ସେ ଉଲ୍ଲେଖ କରିଛନ୍ତି। ସେ ଏକ ସାମ୍ବାଦିକ ସମ୍ମିଳନୀରେ ଗମ୍ଭୀର ଅଭିଯୋଗ କରିଛନ୍ତି।ପାୱାର ଦାବି କରିଛନ୍ତି ଯେ, ତାଙ୍କ ତଦନ୍ତରେ ଅନେକ ଗମ୍ଭୀର ତ୍ରୁଟି ପ୍ରକାଶ ପାଇଛି । ସେ ଏହା ମଧ୍ୟ ଅଭିଯୋଗ କରିଛନ୍ତି ଯେ, ଭିଏସଆର ଭେଞ୍ଚର୍ସ ପ୍ରାଇଭେଟ ଲିମିଟେଡ୍ (VSR Ventures Private Limited), ଯାହାର ବିମାନ ଦୁର୍ଘଟଣାଗ୍ରସ୍ତ ହୋଇଛି, ଏହା ଅନେକ ବ୍ୟକ୍ତିଙ୍କୁ ପୃଷ୍ଠପୋଷକତା ଦେଉଛି। ପାୱାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଏନେଇ ଏକ ଚିଠି ଲେଖି ଦାବି କରିଛନ୍ତି ଯେ, ଜାନୁଆରୀ ୨୮ ବିମାନ ଦୁର୍ଘଟଣାର ତଦନ୍ତ ସମ୍ପୂର୍ଣ୍ଣ ନହେବା ପର୍ଯ୍ୟନ୍ତ ବେସାମରିକ ବିମାନ ଚଳାଚଳ ମନ୍ତ୍ରୀ କେ. ରାମ ମୋହନ ନାଇଡୁଙ୍କୁ କେନ୍ଦ୍ର ସରକାରଙ୍କୁ ଇସ୍ତଫା ଦେବାକୁ କୁହାଯାଉ।
ତାଙ୍କ ଚିଠିରେ ରୋହିତ ଆହୁରି ଦାବି କରିଛନ୍ତି ଯେ, ଦୁର୍ଘଟଣାଗ୍ରସ୍ତ ବିମାନର ମାଲିକାନା କମ୍ପାନୀ VSR ଏବଂ ରାମ ମୋହନ ନାଇଡୁଙ୍କ ସହ ଏହାର ସମ୍ପର୍କ ବିଷୟରେ ଗମ୍ଭୀର ପ୍ରଶ୍ନ ଉଠାଯାଉଛି। ସେ ଲେଖିଛନ୍ତି ଯେ, ଏଗୁଡ଼ିକର ତଦନ୍ତ ଏକ ସ୍ୱାଧୀନ ଏବଂ ସକ୍ଷମ କର୍ତ୍ତୃପକ୍ଷଙ୍କ ଦ୍ୱାରା କରାଯିବା ଉଚିତ।
ରୋହିତ ପାୱାର ଆଉ କ’ଣ ଲେଖିଛନ୍ତି ?
ଚିଠିରେ ରୋହିତ ପାୱାର ଲେଖିଛନ୍ତି, ଆପଣ (ପ୍ରଧାନମନ୍ତ୍ରୀ) ସର୍ବଦା ଅଜିତ ଦାଦା ଏବଂ ଦେଶ ପ୍ରତି ତାଙ୍କ ଅବଦାନ ପ୍ରତି ସମ୍ମାନ ଦେଖାଇଛନ୍ତି। ଏହି ସମୟରେ ମୁଁ ଆପଣଙ୍କୁ ଅନୁରୋଧ କରୁଛି ଯେ, ତଦନ୍ତ ସମାପ୍ତ ନହେବା ପର୍ଯ୍ୟନ୍ତ ରାମ ମୋହନ ନାଇଡୁଙ୍କୁ ତାଙ୍କ ପଦବୀରୁ ଇସ୍ତଫା ଦେବାକୁ କୁହାଯାଉ। VSR ଉପରେ DGCA ର ତଦନ୍ତରେ କୌଣସି ପ୍ରଭାବ କିମ୍ବା ହସ୍ତକ୍ଷେପ ନହେବା ନିଶ୍ଚିତ କରିବା ପାଇଁ ଏହା ଆବଶ୍ୟକ।
ଏହା ସହ ପଢନ୍ତୁ : ଯୌନ ଦୁଷ୍କର୍ମ ମାମଲାରେ ଛନ୍ଦି ହେଲେ ଶଙ୍କରାଚାର୍ଯ୍ୟ ସ୍ୱାମୀ ଅଭିମୁକ୍ତେଶ୍ୱରାନନ୍ଦ ସରସ୍ୱତୀ, କୋର୍ଟଙ୍କ ରାୟ ପରେ ବଢିଲା ଅଡୁଆ…
