ନୂଆଦିଲ୍ଲୀ: ବଡୋଦରା ସହରରେ ପୁଲିସ ଏକ ବଡ଼ ଧରଣର ଅଭିଯାନ ଚଳାଇ ୫.୨୫୨ କିଲୋଗ୍ରାମ ଆମ୍ବରଗ୍ରୀସ (ତିମି ବାନ୍ତି) ଜବତ କରିଛି। ଯାହାର ଆନୁମାନିକ ମୂଲ୍ୟ ପ୍ରାୟ ୧.୫୮ କୋଟି ଟଙ୍କା ହେବ ବୋଲି ଅନୁମାନ କରାଯାଉଛି। ଏହି ଘଟଣାରେ ପଲିସ ଛଅ ଜଣଙ୍କୁ ଗିରଫ କରିଛି। ବଡୋଦରା ସହର ପୁଲିସର ଲୋକାଲ କ୍ରାଇମ ବ୍ରାଞ୍ଚ (LCB) ଜୋନ ୨ ଟିମ ଗୁପ୍ତ ସୂଚନା ଆଧାରରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଥିଲା।

ଖବର ମୁତାବକ, ପୁଲିସ ସୂଚନା ପାଇଥିଲା ଯେ ବିଲ ଅଟଲାଦରା ଅଞ୍ଚଳ ଦେଇ ଏକ ହାଚବ୍ୟାକ କାରରେ ଆମ୍ବରଗ୍ରୀସ ଚୋରାଚାଲାଣ ହେଉଛି। LCB ଟିମ ତୁରନ୍ତ ସେହି ଅଞ୍ଚଳରେ ନିରୀକ୍ଷଣ ବ୍ୟବସ୍ଥା କରି କାରଟିକୁ ଅଟକାଇ ତଲାସୀ କରିଥିଲେ। ତଲାସୀ ସମୟରେ ଉକ୍ତ କାରରୁ ୫.୨୫୨ କିଲୋଗ୍ରାମ ଆମ୍ବରଗ୍ରୀସ ଜବତ ହୋଇଥିଲା। ଗିରଫ ଅଭିଯୁକ୍ତମାନେ ହେଲେ ବଡୋଦରାର ସୁରେନ୍ଦ୍ରସିଂହ ଚାଭଡା (୨୫), ଗୌତମ ବସାଭା (୨୨), ସିଦ୍ଧାର୍ଥ ତଡଭୀ (୨୩), ସୁରଜସିଂହ କାମ୍ବୋଜ (୨୪), ରାଜୁ ଭାରୱାଡ (୨୩) ଏବଂ ନର୍ମଦା ଜିଲ୍ଲାର ଦୀପକ ରବାରୀ (୨୬)।

ଆମ୍ବରଗ୍ରୀସ, ଯାହାକୁ ତିମି ବାନ୍ତି ବା ‘ଫ୍ଲୋଟିଂ ଗୋଲ୍ଡ’ ମଧ୍ୟ କୁହାଯାଏ। ସ୍ପର୍ମ ତିମିର ପାଚନ ତନ୍ତ୍ରରୁ ଉତ୍ପନ୍ନ ଏକ ମୂଲ୍ୟବାନ ମହମ ଜାତୀୟ ପଦାର୍ଥ। ଏହା ବିଭିନ୍ନ ସୁଗନ୍ଧି ଉଦ୍ୟୋଗରେ ବ୍ୟବହୃତ ହୁଏ ଏହାଛଡା ଏହା ନିଜର ଔଷଧୀୟ ଗୁଣ ପାଇଁ ମଧ୍ୟ ବେଶ ଜଣାଶୁଣା। ଭାରତରେ ଏହାର ବ୍ୟବସାୟ ଏବଂ ଅଧିକାର ବନ୍ୟଜନ୍ତୁ ସୁରକ୍ଷା ଆଇନ, ୧୯୭୨ ଅନୁଯାୟୀ ନିଷିଦ୍ଧ କରାଯାଇଛି। ଜବତ ଆମ୍ବରଗ୍ରୀସକୁ ଫରେନସିକ ପରୀକ୍ଷା ପାଇଁ ପଠାଯିବା ସହ ଏହି ମାମଲାରେ ବନ ବିଭାଗକୁ ମଧ୍ୟ ସାମିଲ କରାଯାଇଛି।

ଅଭିଯୁକ୍ତମାନେ ଏହି ପଦାର୍ଥକୁ ଅବୈଧ ଭାବେ ବିକ୍ରୟ କରିବା ଉଦ୍ଦେଶ୍ୟରେ ବହନ କରୁଥିବା ପୁଲିସ ଅନୁମାନ କରୁଛି। ଏହି ଘଟଣା ଦେଶରେ ଆମ୍ବରଗ୍ରୀସର ଅବୈଧ ବ୍ୟବସାୟର ଚିନ୍ତାଜନକ ପରିସ୍ଥିତି ଉପରେ ଆଲୋକପାତ କରିଛି। ପୁଲିସ ଏବଂ ବନ ବିଭାଗ ଏହି ମାମଲାର ତଦନ୍ତ ଜାରି ରଖିଛନ୍ତି।