ଭୁବନେଶ୍ୱର,୧୧/୧୧: ରିୟଲ ଇଷ୍ଟେଟ ପ୍ରୋଜେକ୍ଟ କ୍ଲୋଜର ବା ପ୍ରକଳ୍ପ ଶେଷ କରିବା ବେଳେ ଏଣିକି ବିଲ୍ଡର ସଂସ୍ଥାର ମନମାନି ଚଳିବ ନାହିଁ । ଏ ନେଇ ବିଭିନ୍ନ ଅଭିଯୋଗ ମିଳିବା ପରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି ଓଡ଼ିଶା ରିୟଲ ଇଷ୍ଟେଟ ଉନ୍ନତିକରଣ କର୍ତ୍ତୃପକ୍ଷ (ଓରେରା) । ଏସମ୍ପର୍କିତ ବିଭିନ୍ନ ନିୟମରେ ହୋଇଛି ସଂଶୋଧନ । ଏହା ଦ୍ୱାରା ଘର କ୍ରେତା ସଂଘକୁ ଅଧିକ କ୍ଷମତା ମିଳିଛି ।
ନିକଟରେ ରେରା ପ୍ରୋଜେକ୍ଟ କ୍ଲୋଜର ସମ୍ପର୍କିତ ଏକ ଏକ ଫର୍ମ ଆଣିଛି । ଏଥିରେ ଆସୋସଏସନ ଅଫ୍ ଆଲଟି ବା ଘର କ୍ରେତାଙ୍କ ସଂଘକୁ ଅଧିକ କ୍ଷମତା ମିଳିଛି । ପ୍ରୋଜେକ୍ଟ କ୍ଲୋଜର କରିବା କ୍ଷେତ୍ରରେ ବିଲ୍ଡର ଏହି ଫର୍ମ ବ୍ୟବହାର କରିବେ । ତେବେ ନୂଆ ସଂଶୋଧନରେ ବିଭିନ୍ନ ଗୁରୁତ୍ୱପୂର୍ଣ୍ଣ ଦିଗ ରହିଛି ।
ବିଲ୍ଡର ସବୁ ଦସ୍ତାବିଜ ଦେଇଥିବା ଘର କ୍ରେତା ସଂଘ ଏକ ସତ୍ୟପାଠ ଦେବ । ଏହା ମଧ୍ୟରେ ପ୍ରକଳ୍ପଟି ଅକ୍ୟୁପାନ୍ସି ପ୍ରମାଣପତ୍ର ନିଶ୍ଚିତ ପକ୍ଷେ ପାଇଥିବା ଜରୁରୀ । ସେହିଭଳି ଘର କେତ୍ରାଙ୍କ ସଂଘର ପଞ୍ଜୀକରଣ, ଏ ସମ୍ପର୍କିତ ଦସ୍ତାବିଜ ହସ୍ତାନ୍ତର କରିବାକୁ ହେବ । ଘର କ୍ରେତା ଯେଉଁ କର୍ପସ ପାଣ୍ଠି ଦେଇଥିଲେ ତାହା ସେମାନଙ୍କ ପାଖକୁ ହସ୍ତାନ୍ତର କରାଯାଇଛି ବୋଲି ବିଲ୍ଡର ସତ୍ୟପାଠ ଦେବେ ।
ସେହିଭଳି ସଂଘକୁ କମନ ଏରିଆ ସ୍ଥାନାନ୍ତର ସମ୍ପର୍କିତ ପ୍ରମାଣପତ୍ର ମଧ୍ୟ ଦେବାକୁ ପଡିବ । ପୂର୍ବରୁ ଘର କ୍ରେତା ଦେଇଥିବା ଅର୍ଥ ପ୍ରୋଜେକ୍ଟ ବ୍ୟାଙ୍କ ଖାତାରେ ୫ ବର୍ଷ ରହିବା ନେଇ ରେରା କହିଥିଲେ । ଏହାକୁ କ୍ରେଡାଇ ଭଳି ସଂଘ ଗୁଡ଼ିକ ବିରୋଧ କରିବା ପରେ ଏହି ନିୟମରେ ମଧ୍ୟ ପରିବର୍ତ୍ତନ କରାଯାଇଛି । ସଂଶୋଧିତ ନିୟମ ମୁତାବକ, ପ୍ରକଳ୍ପ ଖର୍ଚ୍ଚର ୧% ଏହି ଆକାଉଣ୍ଟରେ ରହିବ । ଏହି ଅର୍ଥକୁ ୫ ବର୍ଷ ମଧ୍ୟରେ ପ୍ରକଳ୍ପରେ କୌଣସି ସମସ୍ୟା ରହିଲେ ବିନିଯୋଗ କରାଯିବ । ବାକି ଅର୍ଥକୁ ବିଲ୍ଡର ନେଇ ପାରିବେ ।
ଏହି ପରିପ୍ରେକ୍ଷୀରେ ରିୟଲ ଇଷ୍ଟେଟ କର୍ମୀ ବିମଳେନ୍ଦୁ ପ୍ରଧାନ କହିଛନ୍ତି, ରେରା ଆଣିଥିବା ଏହି ସଂଶୋଧନ ଦ୍ୱାରା ଘରକ୍ରେତା ସଂଘ ଅଧିକ ଶସକ୍ତ ହେବେ । ପ୍ରୋଜେକ୍ଟ କ୍ଲୋଜର କ୍ଷେତ୍ରରେ ପୂର୍ବରୁ ବିଲ୍ଡରଙ୍କ ବହୁତ ମନମାନି ରହିଥିଲା । ବର୍ତ୍ତମାନର ନୁଆ ନିୟମ ଯୋଗୁ ସେମାନଙ୍କ ମନମୁଖି କାର୍ଯ୍ୟ ଉପରେ ଲଗାମ ଲାଗିବ ।
ଉଲ୍ଲେଖଯୋଗ୍ୟ, ପ୍ଲାନ ମଞ୍ଜୁରୀ କର୍ତ୍ତୃପକ୍ଷଙ୍କ କ୍ଷେତ୍ରରେ ପ୍ରୋଜେକ୍ଟ କ୍ଲୋଜର ହେଉଛି ଓକ୍ୟୁପାନ୍ସି ପ୍ରମାଣପତ୍ର । ତେବେ କୌଣସି ପ୍ରକଳ୍ପ ଦୀର୍ଘ ସମୟ ଧରି ଚାଲୁଥିବାରୁ ଏହା ଅଟକି ଗଲା ଚାଲିଛି ସେ ଦିଗରେ ଘର କ୍ରେତାଙ୍କ ସ୍ୱାର୍ଥ ରକ୍ଷା ଲାଗି ରେରା ବିଲ୍ଡରଙ୍କ ଲାଗି ଏକ ନିୟମ ଆଣିଛନ୍ତି । ବିଲ୍ଡର ପ୍ରତି ୩ ମାସରେ ପ୍ରକଳ୍ପ ସମ୍ପର୍କିତ ଅଗ୍ରଗତି ରିପୋର୍ଟ (କ୍ୟୁପିଆର୍) ପ୍ରଦାନ କରିଥାନ୍ତି । ପ୍ରୋଜେକ୍ଟ କ୍ଲୋଜର ରିପୋର୍ଟ ଦେବା ପରେ ବିଲ୍ଡରଙ୍କୁ ଏହି କ୍ୟୁପିଆର୍ ଦେବାରୁ ଆଶ୍ୱସ୍ତି ମିଳିଥାଏ ।
ତେବେ ଓରେରାର ଏହି ନିୟମକୁ ନେଇ କ୍ରେଡାଇ ଅସନ୍ତୋଷ ପ୍ରକଟ କରିଛି । ସିକ୍ୟୁରିଟି ଦେୟ ୫ ବର୍ଷ ଯାଏ ବ୍ୟାଙ୍କ ଖାତାରେ ରହିବା ଯୋଗୁ ରିୟଲ ଇଷ୍ଟେଟ କମ୍ପାନିଗୁଡିକ କ୍ଷତିଗ୍ରସ୍ତ ହେବେ । ଉଲ୍ଲେଖଯୋଗ୍ୟ ପୂର୍ବରୁ ବିଲ୍ଡର ଘର କିଣିବା ବେଳେ ଓକ୍ୟୁପାନ୍ସି ପ୍ରମାଣପତ୍ର ଦେଉନ ଥିଲେ । ଫଳରେ ଘର କିଣୁଥିବା ଲୋକମାନେ ଏହା ଦ୍ୱାରା ଠକାମୀର ଶିକାର ହେଉଥିଲେ । ସେହିଭଳି ଘର ହସ୍ତାନ୍ତର ପରେ ମଧ୍ୟ ଏହାର ମରାମତି କରୁ ନ ଥିଲେ ବିଲ୍ଡର ।
