ତିଗିରିଆ, ୨୬/୫: ଦେବଦୂତ ସାଜି ନିଜ ଜୀବନକୁ ବାଜି ଲଗାଇ ବୁଡି ଯାଉଥିବାବେଳେ ଦୁଇ ଜଣଙ୍କୁ ପାଣିରୁ ଉଦ୍ଧାର କରିଛନ୍ତି ପ୍ରଣତି l ଘଟଣାରୁ ପ୍ରକାଶ ଯେ ଆଜି ପୂର୍ବାହ୍ନରେ କୁମ୍ଭିପୁଟ ଗ୍ରାମର ଜନୈକ ବ୍ୟକ୍ତିଙ୍କ ବାଡିରେ ଥିବା ଏକ ପୋଖରୀରେ ଗାଧୋଉଥିବା ବେଳେ ଅସାବଧାନତା ହେତୁ ଗୋଡ ଖସିଯିବାରୁ ନାତୁଣୀ ଲକ୍ଷ୍ମୀ ସେଠୀ ବୁଡି ଯାଇଥିଲେ l ତେବେ ନାତୁଣୀକୁ ପାଣିରୁ ଉଦ୍ଧାର କରିବାକୁ ଯାଇ  ଜେଜେମା ଶଶୀ ସେଠୀ ମଧ୍ୟ ପାଣିରେ ବୁଡି ଯାଇଥିଲେ । 

ତେବେ ନିକଟରେ ଥିବା ସେହି ଗ୍ରାମର ମହିଳା ପ୍ରଣତୀ ମହାପାତ୍ର ନିଜ ଜୀବନକୁ ବାଜି ଲଗାଇ ପାଣିକୁ ଡେଇଁ ନାତୁଣୀକୁ ଟେକି ଧରିବା ସହିତ  ଜେଜେମା ଶଶୀଙ୍କ ଚୁଟି ଧରି ଉଠାଇ ଧରିଥିଲେ। ଏହି ସମୟରେ ନିକଟରେ ଯାଉଥିବା ତପୁ ବେହେରା ଉଭୟଙ୍କୁ କୂଳକୁ ଆଣିଥିବା ବେଳେ ପ୍ରଣତିଙ୍କ ସାହସିକତା ପାଇଁ ଦୁଇଟି ମୂଲ୍ୟବାନ ଜୀବନ ରକ୍ଷା ପାଇଯାଇଛି l ଏନେଇ ପ୍ରଣତିଙ୍କୁ ପ୍ରଶଂସାର ସୁଅ ଛୁଟିଛି l