ଭୁବନେଶ୍ୱର,୨୫/୦୯: ଏକାମ୍ରକ୍ଷେତ୍ରର ଅନନ୍ୟ ତଥା ଏକମାତ୍ର ପଶ୍ଚିମମୁଖା ବିଷ୍ଣୁ ମନ୍ଦିର ଅନନ୍ତ ବାସୁଦେବ ମନ୍ଦିରର ସ୍ଥିତି ସଂକଟରେ । ବେଢ଼ା ଭିତରେ ଅନଧିକାର ଭାବେ ଚାଲିଥିବା ରୋଷ ଘରୁ କ୍ରମାଗତ ଭାବେ ବାହାରୁଥିବା ଉତ୍ତାପ ସହିତ ମାତ୍ରାଧିକ ଜଳର ବ୍ୟବହାର ଏହାର ମୂଳଦୁଆକୁ ଦୁର୍ବଳ କରିଚାଲିଛି । ଉକ୍ତ ରୋଷଘର ସେଠାରୁ ସ୍ଥାନାନ୍ତର ନହେଲେ ଆଗାମୀ ୫୦ ବର୍ଷ ଭିତରେ ଭୁଶୁଡ଼ିଯିବ ବୋଲି ଉଦ୍ବେଗ ପ୍ରକାଶ କରିଛି ପ୍ରମୁଖ ସେବାୟତ ସଂଗଠନ ପୂଜାପଣ୍ଡା ନିଯୋଗ । ତା’ ସହିତ ମନ୍ଦିର ବେଢ଼ା କଡ଼ରୁ ଭାରି ଯନ୍ତ୍ରପାତି ମାଧ୍ୟମରେ ଚାଲିଥିବା ମାଟି ପଥର ତଡ଼ା ବିପଦକୁ ଆହୁରି ବଢ଼ାଉଛି ବୋଲି ଐତିହ୍ୟପ୍ରେମୀମାନେ ଆଶଙ୍କା ପ୍ରକାଶ କରିଛନ୍ତି ।
୧୨୭୮ ମସିହାରେ ରାଣୀ ଚନ୍ଦ୍ରିକା ଦେବୀ ଏକାମ୍ରକ୍ଷେତ୍ରର ଶୈବ ପୀଠ ସମାହାର ଭିତରେ ବିନ୍ଦୁସାଗର ପୂର୍ବ ଊପକୂଳରେ ଅନନ୍ତ ବାସୁଦେବ ମନ୍ଦିର ପ୍ରତିଷ୍ଠା କରିଥିଲେ । କ୍ଷେତ୍ରାଧିପତି ଭାବେ ଖ୍ୟାତ ଠାକୁର ଅନନ୍ତ ବାସୁଦେବ ପଶ୍ଚିମ ଦିଗକୁ ମୁହଁ କରି ବିରାଜିତ ହୋଇଥିବା ବେଳେ ମନ୍ଦିର ସାମନାରେ ମହାବୀର ହନୁମାନ ପ୍ରଣିପାତ ମୁଦ୍ରାରେ ଠାକୁରଙ୍କୁ ଆଡ଼କୁ ମୁହଁ କରି ପ୍ରତିଷ୍ଠିତ । ମନ୍ଦିରର ଅନନ୍ୟ ଭାସ୍କର୍ଯ୍ୟର ସଂରକ୍ଷଣ ପାଇଁ ଭାରତୀୟ ପ୍ରତ୍ନତତ୍ତ୍ୱ ବିଭାଗ ୬୦ ଦଶକରେ ଏହି ମନ୍ଦିରର ରକ୍ଷଣାବେକ୍ଷଣ ଦାୟିତ୍ୱ ନେଇଥିଲା । ପୂଜାପଣ୍ଡା ନିଯୋଗର ଅଭିଯୋଗ ମୁତାବକ, ରାଜାଙ୍କ ଅମଳରୁ ପୂଜାପଣ୍ଡାଗଣ ବଂଶାନୁକ୍ରମେ ଅନନ୍ତ ବାସୁଦେବଙ୍କ ରୀତିନୀତି, ପୂଜାବିଧି ଆଦି ନିର୍ବାହ କରି ଆସୁଥିଲେ ।
ଏଥିପାଇଁ ସେମାନଙ୍କ ନାମରେ ରାଜା ଚାଷ ଜମି ଖଞ୍ଜା କରିଛନ୍ତି । ଠାକୁରଙ୍କ ନିକଟରେ ଖଇ, ଲଡ଼ୁ ଆଦି ଭୋଗ ଲାଗି ହେବାର ବିଧି ରହିଆସିଛି । ହେଲେ ଆଜକୁ ପ୍ରାୟ ୫୦ ବର୍ଷ ହେବ ଏହି ମନ୍ଦିରରେ ମୁଷ୍ଟିମେୟ ବ୍ରାହ୍ମଣ ନିଯୋଗ ସେବାୟତମାନେ ଏହି ମନ୍ଦିର ବେଢ଼ାରେ ଅନଧିକାର ଭାବେ ରୋଷଶାଳ ନିର୍ମାଣ କରି ସେଠାରେ ଅନ୍ନଭୋଗ ପ୍ରସ୍ତୁତ କରି ଠାକୁରଙ୍କୁ ଲାଗି କରୁଛନ୍ତି । ବେଢ଼ା ଉପରେ ନିର୍ମିତ ଚୁଲିରୁ ବର୍ଷ ବର୍ଷ ଧରି ନିର୍ଗତ ଉତ୍ତାପ ମନ୍ଦିରର ମୂଳଦୂଆର ସ୍ଥିତିକୁ ବିପନ୍ନ କରିଚାଲିଛି । ରୋଷଶାଳରୁ ବାହାରୁଥିବା ପ୍ରବଳ ଧୂଆଁରେ ମନ୍ଦିର ଭାସ୍କର୍ଯ୍ୟ ମଳିନ ପଡ଼ିଗଲାଣି । ଏ ସମ୍ପର୍କରେ ପୂଜାପଣ୍ଡା ନିଯୋଗ ପକ୍ଷରୁ ଭାରତୀୟ ପ୍ରତ୍ନତତ୍ତ୍ୱ ବିଭାଗ, ଶ୍ରୀଲିଙ୍ଗରାଜ ମନ୍ଦିର ପ୍ରଶାସନକୁ ଲିଖିତ ଅଭିଯୋଗ ଦିଆଯାଇଛି ।
ଅନୁରୂପ ଭାବେ ଏକାମ୍ର ପ୍ରକଳ୍ପ ଚାଲିଥିବା ବେଳେ ଅନନ୍ତ ବାସୁଦେବ ମନ୍ଦିର ପଛପାଶ୍ୱର୍ରେ ବ୍ୟାପକ ଖୋଳାତଡ଼ା ହୋଇଥିଲା । ମନ୍ଦିରକୁ ଲାଗି ରହିଥିବା ମାଟିଗଦାକୁ ହଟାଇ ଦିଆଯାଇଥିଲା । ଯାହାକୁ ପ୍ରତ୍ନତତ୍ତ୍ୱ ବିଭାଗ ଓ ଐତିହ୍ୟପ୍ରେମୀମାନେ ବିରୋଧ କରିଥିଲେ । ମନ୍ଦିର ମୂଳଦୁଆକୁ ସୁଦୃଢ଼ କରିଥିବା ଏହି ମାଟି ଉଠିଯିବା ଫଳରେ କୀର୍ତ୍ତିରାଜି ପ୍ରଭାବିତ ହେବ ବୋଲି ଆଶଙ୍କା କରାଯାଇଥିଲା । ଅବଶ୍ୟ ବର୍ତ୍ତମାନ ମନ୍ଦିର ପଛପାଶ୍ୱର୍ରେ ଖୋଳାତଡ଼ା ବନ୍ଦ ହୋଇ ସେଠାରେ ପାର୍କ ନିର୍ମାଣ ହୋଇଛି । ଯାହାକି ଐତିହ୍ୟପ୍ରେମୀଙ୍କୁ ଆଶ୍ୱସ୍ତ କରିଛି ।
ଅନନ୍ତ ବାସୁଦେବ ମନ୍ଦିରର ଏହି ବିପନ୍ନ ଅବସ୍ଥା ସମ୍ପର୍କରେ ଭାରତୀୟ ପ୍ରତ୍ନତତ୍ତ୍ୱ ବିଭାଗ ଅଧୀକ୍ଷଣ ପ୍ରତ୍ନତତ୍ତ୍ୱବିତ୍ ଡା. ନନ୍ଦକିଶୋର ସ୍ୱାଇଁଙ୍କୁ ଅବଗତ କରାଯାଇଥିଲା । ଶ୍ରୀ ସ୍ୱାଇଁ କହିଛନ୍ତି, ଅନନ୍ତ ବାସୁଦେବ ମନ୍ଦିର ବେଢ଼ାରେ ରୋଷଘର ନଥିଲା । ଉକ୍ତ ରୋଷଘର ସ୍ଥାନାନ୍ତର ହେବା ନିହାତି ଆବଶ୍ୟକ । ଏ ବିଷୟରେ ଆମ ପକ୍ଷରୁ ବାରମ୍ବାର ଶ୍ରୀଲିଙ୍ଗରାଜ ମନ୍ଦିର ପ୍ରଶାସନକୁ ଜଣା ଦିଆଯାଇଛି । ସମସ୍ତଙ୍କ ସହମତିରେ ରୋଷଘର ସ୍ଥାନାନ୍ତର ହେବା ଉଚିତ । ସେହିଭଳି ବ୍ରାହ୍ମଣ ନିଯୋଗର ସଭାପତି ନାରାୟଣ ମହାପାତ୍ର ସମସ୍ତ ଅଭିଯୋଗକୁ ଖଣ୍ଡନ କରି କହିଛନ୍ତି, ମୋତେ ୬୪ ବର୍ଷ ହେଲାଣି । ମୋ ପିଲାଦିନୁ ମୁଁ ଦେଖିଆସିଛି ଅନନ୍ତ ବାସୁଦେବ ମନ୍ଦିର ବେଢ଼ାରେ ରୋଷଘର ଥିଲା । ବାପା, ଅଜାଙ୍କ ଠାରୁ ଶୁଣିଆସିଛୁ ରୋଷଘର ସେହିଠାରେ ରହିଛି । ତେଣୁ ରୋଷଘର ସ୍ଥାନାନ୍ତର ପ୍ରଶ୍ନ ଉଠୁନାହିଁ ।
