- ସାପ କାମୁଡ଼ାର ଶିକାର ହୋଇଥିବା ରୋଗୀଙ୍କ ଠାରେ ପାର୍ଶ୍ବ ପ୍ରତିକ୍ରିୟା ଦେଖାଉଛି ଆଣ୍ଟି-ଭେନମ୍
- ICMR ସହଯୋଗରେ ୧୧ଟି ରାଜ୍ୟର ୨୫ଟି ଜିଲ୍ଲାରେ କରାଯାଇଥିଲା ସର୍ଭେ
- ୪୩ ପ୍ରତିଶତ ମୃତ୍ୟୁ ହସ୍ପିଟାଲକୁ ଯିବା ପୂର୍ବରୁ କିମ୍ବା ରାସ୍ତାରେ ଘଟିଥିଲା
- ବର୍ଷା ଋତୁରେ ୬୨.୧ ପ୍ରତିଶତ ସାପ କାମୁଡ଼ା ଘଟଣା ରେକର୍ଡ ହୋଇଥିଲା
ନୂଆଦିଲ୍ଲୀ,୨୪/୦୧: ସାପ କାମୁଡ଼ାର ଚିକିତ୍ସା ପାଇଁ ବ୍ୟବହୃତ ଆଣ୍ଟି-ଭେନମ୍ ପ୍ରତି ଛଅ ଜଣଙ୍କ ମଧ୍ୟରୁ ଜଣେ ରୋଗୀଙ୍କ ଉପରେ ପ୍ରତିକୂଳ ପ୍ରଭାବ ପକାଉଛି। ଇଣ୍ଡିଆନ୍ କାଉନସିଲ୍ ଅଫ୍ ମେଡିକାଲ୍ ରିସର୍ଚ୍ଚ (ICMR) ସହଯୋଗରେ କରାଯାଇଥିବା ଏକ ଅଧ୍ୟୟନରୁ ଏପରି କିଛି ତଥ୍ୟ ଜଣାପଡ଼ିଛି। ଅଧ୍ୟୟନରୁ ଜଣାପଡ଼ିଛି ଯେ ଭାରତରେ ସାପ କାମୁଡ଼ାର ୧୭.୨ ପ୍ରତିଶତ ରୋଗୀ ଏହି ଆଣ୍ଟି-ଭେନମ୍ ଦ୍ୱାରା ପ୍ରତିକୂଳ ପ୍ରଭାବ ଅନୁଭବ କରିଥିବା ବେଳେ ଜୀବନ ହରାଇଥିବା ରୋଗୀଙ୍କ ମଧ୍ୟରୁ ଅଧା ସମୟ ମଧ୍ୟରେ ଡାକ୍ତରଖାନାରେ ପହଞ୍ଚି ପାରି ନାହାଁନ୍ତି।
ଏହି ପୀଡ଼ିତମାନଙ୍କ ମଧ୍ୟରୁ ପ୍ରାୟ ଅଧା ଦାରିଦ୍ର୍ୟ ସୀମାରେଖା ତଳେ ବାସ କରୁଥିବା ଜଣାପଡ଼ିଥିଲା। ସାପ କାମୁଡ଼ା ଯୋଗୁଁ ପୀଡ଼ିତମାନଙ୍କୁ ହାରାହାରି ୬,୫୦୦ ଟଙ୍କା ଖର୍ଚ୍ଚ କରିବାକୁ ପଡ଼ିଥିଲା। ଏହି ୧୭.୨% ରୋଗୀଙ୍କ ମଧ୍ୟରୁ, ୬.୩% ପ୍ରଭାବିତ ରୋଗୀଙ୍କ ପାଇଁ ଔଷଧ ବନ୍ଦ କରିବାକୁ ପଡ଼ିଥିଲା। ଏହି ଔଷଧର ଦୀର୍ଘକାଳୀନ ପ୍ରଭାବ ଭିନ୍ନ ଥିଲା, ୨.୩% ରୋଗୀଙ୍କ ଠାରେ ସ୍ନାୟୁଗତ ସମସ୍ୟା ସବୁଠାରୁ ସାଧାରଣ କାରଣ ଥିଲା।
ଅଧିକ ପଢ଼ନ୍ତୁ: କୁକୁର ମୁକ୍ତ ଗାଁ ନା କରୁଣା ମୁକ୍ତ ସମାଜ, ନିଜର ପୁରୁଣା ବନ୍ଧୁକୁ ହତ୍ୟା କରି ସମାଧାନର ବାଟ ଖୋଜୁଛି ମଣିଷ
ଏହା ସହିତ, କାମୁଡ଼ିଥିବା ସ୍ଥାନରେ ୧.୧ ପ୍ରତିଶତ ଲୋକଙ୍କର ଚର୍ମରେ କ୍ଷତ ହୋଇଥିଲା। ଅନ୍ୟାନ୍ୟ ଜଟିଳତା ମଧ୍ୟରେ ମାନସିକ ପ୍ରଭାବ, ସ୍ଥାନୀୟ ପ୍ରତିକ୍ରିୟା, କିଡନୀ ଏବଂ ହୃଦ୍ ସମସ୍ୟା ସହିତ କିଛି ବିରଳ କ୍ଷେତ୍ରରେ ଅଙ୍ଗପ୍ରତ୍ୟଙ୍ଗ କାଟିବା କିମ୍ବା ଅକ୍ଷମତା ଭଳି ପରିସ୍ଥିତି ଦେଖିବାକୁ ମିଳିଥିଲା। ଭାରତରେ ସାପକାମୁଡ଼ା ମୃତ୍ୟୁର ଏକ ପ୍ରମୁଖ କାରଣ, କିନ୍ତୁ ନିର୍ଭରଯୋଗ୍ୟ ତଥ୍ୟ ରଣନୀତି ପ୍ରସ୍ତୁତ କରିବା ପାଇଁ ସୀମିତ। ଏହି ସମସ୍ୟାର ସମାଧାନ ପାଇଁ, ICMR ସହଯୋଗରେ ୧୧ଟି ରାଜ୍ୟର ୨୫ଟି ଜିଲ୍ଲାରେ ଏକ ସର୍ଭେ କରାଯାଇଥିଲା। ଏହି ସର୍ଭେରେ ଏହି ଜିଲ୍ଲାଗୁଡ଼ିକର ୬ କୋଟି ଲୋକଙ୍କୁ ସାମିଲ କରାଯାଇଥିଲା। ଏହି ସମୁଦାୟ-ଭିତ୍ତିକ ଅଧ୍ୟୟନ ଫ୍ରଣ୍ଟଲାଇନ୍ ସ୍ୱାସ୍ଥ୍ୟ କର୍ମୀଙ୍କ ଦ୍ୱାରା କରାଯାଇଥିବା ବେଳେ ଅନ୍ୟ ଏକ ଦଳ ସାପକାମୁଡ଼ା, ସାପର ପ୍ରକାର, ପ୍ରାପ୍ତ ଚିକିତ୍ସା ଏବଂ ଖର୍ଚ୍ଚ ବିଷୟରେ ସୂଚନା ସଂଗ୍ରହ କରିଥିଲା।
ପ୍ରାୟ ଗୋଟିଏ ବର୍ଷ ଧରି ଚାଲିଥିବା ଏହି ସର୍ଭେରେ ୭,୦୯୪ ଜଣଙ୍କ ଠାରେ ସାପ କାମୁଡ଼ା ମାମଲା ରେକର୍ଡ କରାଯାଇଥିଲା। ମୃତ୍ୟୁହାର ପ୍ରତି ଏକ ଲକ୍ଷ ଜନସଂଖ୍ୟାରେ ୦.୩୩ ଥିଲା। ଚିନ୍ତାର ବିଷୟ ହେଉଛି, ୪୩ ପ୍ରତିଶତ ମୃତ୍ୟୁ ହସ୍ପିଟାଲକୁ ଯିବା ପୂର୍ବରୁ କିମ୍ବା ରାସ୍ତାରେ ଘଟିଥିଲା। ଏହା ଚିକିତ୍ସା ସେବାର ଅଭାବକୁ ପ୍ରତିଫଳିତ କରେ। ଅଧ୍ୟୟନରୁ ଜଣାପଡ଼ିଛି ଯେ ସାପ କାମୁଡ଼ା ରୋଗୀଙ୍କ ମଧ୍ୟରୁ ୬୪.୧ ପ୍ରତିଶତ ପୁରୁଷ ଥିଲେ।
ସର୍ବାଧିକ ପ୍ରଭାବିତ ହୋଇଥିଲେ ୩୦ ରୁ ୩୯ ବୟସ ବର୍ଗର ଲୋକମାନେ। ବର୍ଷା ଋତୁରେ ୬୨.୧ ପ୍ରତିଶତ ସାପ କାମୁଡ଼ା ଘଟଣା ରେକର୍ଡ କରାଯାଇଥିଲା। ଏହି ଘଟଣାଗୁଡ଼ିକ ସାଧାରଣତଃ ଚାଷ କରିବା କିମ୍ବା ବାହାରେ କାମ କରିବା ସମୟରେ ରିପୋର୍ଟ କରାଯାଇଥିଲା। ତଥାପି, ୮୬.୪ ପ୍ରତିଶତ ସାପ କାମୁଡ଼ା ପୀଡ଼ିତଙ୍କୁ ହସ୍ପିଟାଲରେ ଚିକିତ୍ସା କରାଯାଇଥିଲା। ଏହି ମାମଲାରେ ୬୦.୨ ପ୍ରତିଶତରେ ଆଣ୍ଟି-ସ୍ନେକ୍ ଭେନମ୍ ଦିଆଯାଇଥିଲା। ଏଥିମଧ୍ୟରୁ ୧୭.୨ ପ୍ରତିଶତ ରୋଗୀ ଆଣ୍ଟି-ଭେନମର ପ୍ରତିକୂଳ ପ୍ରଭାବ ଅନୁଭବ କରିଥିଲେ।
ଆହୁରି ପଢ଼ନ୍ତୁ: ଦିବ୍ୟାଙ୍ଗ କୋଟାରେ ଚାକିରି ପାଇବେ ବୋଲି କାଟିଦେଲେ ଗୋଡ଼, ଏମିତି ଧରିଲା ପୁଲିସ..
ଅଧ୍ୟୟନରୁ ଜଣାପଡ଼ିଛି ଯେ, ସାପ କାମୁଡ଼ା ପରେ ହସ୍ପିଟାଲରେ ପହଞ୍ଚିଥିବା ରୋଗୀମାନେ ହାରାହାରି ୨.୨୪ ଦିନ ପର୍ଯ୍ୟନ୍ତ ଭର୍ତ୍ତି ହୋଇ ରହୁଥିଲେ। ସାପ କାମୁଡ଼ା ସମସ୍ୟା ଗରିବ ଲୋକଙ୍କ ଉପରେ ଏକ ବଡ଼ ଆର୍ଥିକ ବୋଝ ପକାଉଛି। ଅଧ୍ୟୟନରୁ ଜଣାପଡ଼ିଛି ଯେ ଏହା ଯୋଗୁଁ ରୋଗୀଙ୍କ ପକେଟ ଉପରେ ହାରାହାରି ୬୫୦୦ ଟଙ୍କାର ବୋଝ ପଡୁଛି। ଦେଖାଯାଇଛି ଯେ ଘରୋଇ ହସ୍ପିଟାଲକୁ ଚିକିତ୍ସା ପାଇଁ ଯାଉଥିବା ରୋଗୀଙ୍କୁ ୨୭,୪୦୦ ଟଙ୍କା ପର୍ଯ୍ୟନ୍ତ ଖର୍ଚ୍ଚ କରିବାକୁ ପଡୁଛି। ଏହି ପରିପ୍ରେକ୍ଷିରେ ସରକାରୀ ହସ୍ପିଟାଲକୁ ଚିକିତ୍ସା ପାଇଁ ଯାଉଥିବା ରୋଗୀଙ୍କୁ ୩୯୦୦ ଟଙ୍କା ପର୍ଯ୍ୟନ୍ତ ଖର୍ଚ୍ଚ କରିବାକୁ ପଡୁଛି। ଅଧ୍ୟୟନରୁ ଜଣାପଡ଼ିଛି ଯେ, ସାପ କାମୁଡ଼ା ଦ୍ୱାରା ପ୍ରଭାବିତ ପରିବାରର ୪୭.୫ ପ୍ରତିଶତ ଦାରିଦ୍ର୍ୟ ସୀମାରେଖା ତଳେ ଥିବା ବେଳେ ପ୍ରଭାବିତ ଲୋକଙ୍କ ମଧ୍ୟରୁ ୮୭.୭ ପ୍ରତିଶତଙ୍କ ପାଖରେ କୌଣସି ସ୍ୱାସ୍ଥ୍ୟ ବୀମା ନାହିଁ।
ଏହି ଅଧ୍ୟୟନରୁ ଜଣାପଡ଼ିଛି ଯେ ରାଜସ୍ଥାନର ଜୈସଲମେର ଜିଲ୍ଲାରେ ସର୍ପାଘାତ ଜନିତ ମାମଲା ସର୍ବାଧିକ ଥିବାବେଳେ ହିମାଚଳ ପ୍ରଦେଶର କାଙ୍ଗଡ଼ା ଜିଲ୍ଲାରେ ମୃତ୍ୟୁହାର ସର୍ବାଧିକ ଥିଲା। ଗବେଷକମାନେ କହିଛନ୍ତି ଯେ ରୋଗୀମାନଙ୍କୁ ହସ୍ପିଟାଲକୁ ଶୀଘ୍ର ଏବଂ ସୁରକ୍ଷିତ ପରିବହନ ସୁନିଶ୍ଚିତ କରିବା, ଉନ୍ନତ ଗୁଣବତ୍ତାର ଆଣ୍ଟି-ଭେନମ୍ ପ୍ରଦାନ କରିବା ଏବଂ ସ୍ୱାସ୍ଥ୍ୟ ବୀମା କଭରେଜ୍ ବୃଦ୍ଧି କରିବା ଦ୍ୱାରା ଏହି ସମସ୍ୟା ଦୂର ହୋଇପାରିବ। ଏହା ୨୦୩୦ ସୁଦ୍ଧା ସାପକାମୁଡ଼ା ମୃତ୍ୟୁକୁ ଅଧା କରିବା ପାଇଁ ବିଶ୍ୱ ସ୍ୱାସ୍ଥ୍ୟ ସଂଗଠନର ଲକ୍ଷ୍ୟ ହାସଲ କରିବାରେ ସାହାଯ୍ୟ କରିବ।
ପ୍ରମେୟ ପୃଷ୍ଠାର ପ୍ରମୁଖ ଖବର: ୮ମ ବେତନ କମିଶନ: ପିଅନଙ୍କଠାରୁ ଆରମ୍ଭ କରି ଅଫିସରଙ୍କ ପର୍ଯ୍ୟନ୍ତ;କାହାର ବଢ଼ିବ କେତେ ଦରମା?
