ନୂଆଦିଲ୍ଲୀ,୨୮।୧: ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଅଜିତ ପାୱାରଙ୍କ ମୃତ୍ୟୁ ହୋଇଥିବା ବିମାନ ଦୁର୍ଘଟଣା ଉପରେ ବେସାମରିକ ବିମାନ ଚଳାଚଳ ମନ୍ତ୍ରଣାଳୟ ଏକ ବିସ୍ତୃତ ରିପୋର୍ଟ ପ୍ରକାଶ କରିଛି। ଏହି ରିପୋର୍ଟରେ ଚାର୍ଟର୍ଡ ବିମାନ ଦୁର୍ଘଟଣା ପୂର୍ବରୁ ଘଟିଥିବା ପ୍ରତି ମିନିଟର ବିବରଣୀ ପ୍ରଦାନ କରାଯାଇଛି। ପ୍ରାରମ୍ଭିକ ତଦନ୍ତରୁ ଜଣାପଡିଛି ଯେ ଖରାପ ପାଗ ଏବଂ କମ୍ ଦୃଶ୍ୟମାନ୍ ଦୁର୍ଘଟଣାର କାରଣ ଥିଲା।
କେନ୍ଦ୍ର ବିମାନ ଚଳାଚଳ ମନ୍ତ୍ରୀ ରାମମୋହନ ନାଇଡୁ ଦୁର୍ଘଟଣା ଉପରେ ଦୁଃଖ ପ୍ରକାଶ କରି କହିଛନ୍ତି , ପ୍ରାରମ୍ଭିକ ସୂଚନା ଅନୁଯାୟୀ, ସକାଳ ପ୍ରାୟ ୮ଟା ୪୮ ମିନିଟ୍ରେ ରେ ଅବତରଣ ସମୟରେ ଭିଜିବିଲିଟି କମ୍ ଥିଲା। ଡିଜିସିଏ ଏବଂ ଏଏଆଇବି ଟିମ୍ ତଦନ୍ତ କରୁଛନ୍ତି। ଅବତରଣ ପୂର୍ବରୁ, ଯେତେବେଳେ ଏଟିସି ବାରାମତି ସହିତ ଯୋଗାଯୋଗ କରାଯାଇଥିଲା, ପାଇଲଟ୍ କହିଥିଲେ, ରନୱେ ଦେଖାଯାଉନାହିଁ। ରନୱେ ସ୍ପଷ୍ଟ ଭାବରେ ଦେଖାଯାଉ ନଥିବାରୁ ବିମାନଟି ଆକାଶରେ ଘୂରି ବୁଲୁଛି। ଦ୍ୱିତୀୟ ଥର ପାଇଁ ମଧ୍ୟ ଅବତରଣ ଚେଷ୍ଟା କରାଯାଇଥିଲା, କିନ୍ତୁ ଭିଜିବିଲିଟି ନଥିଲା। କିଛି ସମୟ ପରେ, ପାଇଲଟ୍ ପୁଣି ଅବତରଣ ଚେଷ୍ଟା କରିଥିଲେ। ଏଟିସି ପଚାରିଥିବା ପ୍ରଶ୍ନର ଉତ୍ତର ପାଇଲଟଙ୍କ ପଟୁ କିଛି ଆସିନଥିଲା , କିନ୍ତୁ କିଛି ସମୟ ପରେ, ପାଇଲଟ୍ କହିଥିଲେ ଯେ ରନୱେ ସ୍ପଷ୍ଟ ଭାବରେ ଦେଖାଯାଉଛି, ଯାହା ପରେ ATC ଅବତରଣ ପାଇଁ ଅନୁମତି ଦେଇଥିଲା। ତଥାପି, କିଛି ସମୟ ପରେ, ବିମାନ ଦୁର୍ଘଟଣାର ଖବର ଆସିଲା। ସମ୍ପୂର୍ଣ୍ଣ ଘଟଣାର ବିସ୍ତୃତ ତଦନ୍ତ କରାଯାଉଛି।
ମନ୍ତ୍ରଣାଳୟ ରିପୋର୍ଟ ପ୍ରକାଶ କରିଛି
ମନ୍ତ୍ରଣାଳୟ ଅନୁଯାୟୀ, ବିମାନବନ୍ଦରର ଜଣେ ଏଟିସି ସର୍ଭିସ କର୍ମଚାରୀଙ୍କ ବୟାନ ଆଧାରରେ ଏହି ରିପୋର୍ଟ ପ୍ରସ୍ତୁତ କରାଯାଇଥିଲା। ବାରାମତୀ ଏକ ଅନିୟନ୍ତ୍ରିତ ବିମାନବନ୍ଦର, ଯେଉଁଥିରେ ପୂର୍ଣ୍ଣାଙ୍ଗ ଏୟାର ଟ୍ରାଫିକ୍ ନିୟନ୍ତ୍ରଣ (ATC) ୟୁନିଟ୍ ନାହିଁ। କେବଳ ଉଡ଼ାଣ ତାଲିମ ସଂଗଠନର ପ୍ରଶିକ୍ଷକ କିମ୍ବା ପାଇଲଟ୍ ଟ୍ରାଫିକ୍ ସୂଚନା ପ୍ରଦାନ କରନ୍ତି। ବିମାନଟି VI-SSK ଭାବରେ ଚିହ୍ନଟ ହୋଇଛି।
ଦୁର୍ଘଟଣା ପୂର୍ବରୁ କ’ଣ ଘଟିଥିଲା?
ମନ୍ତ୍ରଣାଳୟ ଅନୁଯାୟୀ, VI-SSK ବିମାନଟି ପ୍ରଥମେ ବୁଧବାର ସକାଳ ୮ଟା ୧୮ ମିନିଟ୍ରେ ବାରାମତୀ ସହିତ ଯୋଗାଯୋଗ କରିଥିଲା। ବିମାନଟି ବାରାମତୀଠାରୁ ୩୦ ନଟିକାଲ୍ ମାଇଲ୍ ଦୂରରେ ଥିବା ସମୟରେ ପୁଣି ଥରେ କନେକ୍ସନ ହୋଇଥିଲା। ସେହି ସମୟରେ, ପାଇଲଟ୍ଙ୍କୁ ତାଙ୍କର ଭିଜୁଆଲ ମେଟ୍ରୋଲଜିକାଲ କଣ୍ଡିସନ୍ ବ୍ୟବହାର କରି ଅବତରଣ କରିବାକୁ ପରାମର୍ଶ ଦିଆଯାଇଥିଲା।ଏହାର ତୁରନ୍ତ ପରେ ପାଇଲଟ୍ ପବନର ଗତି ଏବଂ ଭିଜିବିଲିଟି ବିଷୟରେ ପଚାରିଲେ। ତାଙ୍କୁ କୁହାଗଲା ଯେ ପବନ ଶାନ୍ତ ଥିଲା ଏବଂ ଭିଜିବିଲିଟି ପ୍ରାୟ ୩୦୦୦ ମିଟର ଥିଲା। ତା’ପରେ ବିମାନଟି ରନୱେ ୧୧ ରେ ଅନ୍ତିମ ଲ୍ୟାଣ୍ଡିଂର ପ୍ରସ୍ତୁତି ସୂଚନା ଦେଇଥିଲା, କିନ୍ତୁ ଏହା ମଧ୍ୟ କୁହାଯାଇଥିଲା ରନୱେ ଦେଖାଯାଉ ନାହିଁ। ପାଇଲଟ୍ ତା’ପରେ ଲ୍ୟାଣ୍ଡିଂ ନକରି ବିମାନକୁ ପୁନର୍ବାର ଉପରକୁ ନେଇ ଯାଇଥିଲେ।
ଦ୍ୱିତୀୟ ଅବତରଣ ଚେଷ୍ଟା ପରେ ଦୁର୍ଘଟଣା
ଯେତେବେଳେ ବିମାନଟି ଦ୍ବିତୀୟ ଥର ରନୱେ ୧୧ରେ ଅବତରଣ କରୁଥିବାର ସୂଚନା ଦିଆଯାଇଥିଲା। ତାଙ୍କୁ ରନୱେ ଦେଖି ଜଣାଇବାକୁ କୁହାଯାଇଥିଲା। ପାଇଲଟ୍ ଉତ୍ତର ଦେଇଥିଲେ, ‘ମୁଁ ଏବେ ରନୱେ ଦେଖିପାରୁନାହିଁ। ମୁଁ ଦେଖିଲା ପରେ ଆପଣଙ୍କୁ ଜଣାଇବି।’ କିଛି ସେକେଣ୍ଡ ପରେ, ସେ ରିପୋର୍ଟ କରିଥିଲେ ଯେ ସେ ରନୱେ ଦେଖିଛନ୍ତି। ସକାଳ ୮:୪୩ ରେ, ବିମାନକୁ ରନୱେ ୧୧ ରେ ଅବତରଣ କରିବା ପାଇଁ ଅନୁମତି ଦିଆଯାଇଥିଲା।
ମନ୍ତ୍ରଣାଳୟ କହିଛି ଯେ ପାଇଲଟ୍ ଅବତରଣ କ୍ଲିୟରାନ୍ସ ସମ୍ପର୍କରେ କୌଣସି ସୂଚନା ଦେଇ ନାହାଁନ୍ତି। ଠିକ୍ ଗୋଟିଏ ମିନିଟ୍ ପରେ, ସକାଳ ୮:୪୪ ରେ, ବିମାନବନ୍ଦର କର୍ମଚାରୀମାନେ ରନୱେ ୧୧ ନିକଟରେ ନିଆଁ ଲାଗିଥିବା ଦେଖିଥିଲେ। ଜରୁରୀକାଳୀନ ସେବାକୁ ତୁରନ୍ତ ଦୁର୍ଘଟଣାସ୍ଥଳକୁ ପଠାଯାଇଥିଲା। ରନୱେର ବାମ ପାର୍ଶ୍ୱରେ ବିମାନର ଭଗ୍ନାବଶେଷ ମିଳିଥିଲା। ଦୁର୍ଘଟଣାରେ ଅଜିତ ପାୱାର ଏବଂ ତାଙ୍କର ଦୁଇ ଜଣ କର୍ମଚାରୀ, ଜଣେ ବ୍ୟକ୍ତିଗତ ସୁରକ୍ଷା ଅଧିକାରୀ ଏବଂ ଜଣେ ସହାୟକଙ୍କ ସମେତ ପାଞ୍ଚ ଜଣଙ୍କ ମୃତ୍ୟୁ ହୋଇଥିଲା। ବିମାନ ଦୁର୍ଘଟଣା ତଦନ୍ତ ବ୍ୟୁରୋ (AAIB) ତଦନ୍ତ ଦାୟିତ୍ୱ ନେଇଛି।
ଆହୁରି ପଢନ୍ତୁ :ଅଜିତ ପାୱାରଙ୍କ ମୃତ୍ୟୁ ଖବର ପାଇ ଭାଙ୍ଗି ପଡିଲେ ଭଉଣୀ ସୁପ୍ରିୟା ସୁଲେ, ଭାଉଜ ସୁନେତ୍ରା ପାୱାରଙ୍କୁ ଦେଖି ଭୋ ଭୋ ହୋଇ କାନ୍ଦିଲେ
