ପୁରୀ,୦୩/୦୮: ଆଜି ଶ୍ରୀମନ୍ଦିରରେ ‘ବାଡ଼ି ନୃସିଂହ ବିଜେ’ ନୀତି । ଶ୍ରୀନୃସିଂହ ମହାପ୍ରଭୁ ଶ୍ରୀମନ୍ଦିରରୁ ବାହାରି ପ୍ରସିଦ୍ଧ ଚାରି ଆଶ୍ରମକୁ ବିଜେ କରିବା ସହ ଶ୍ରୀକ୍ଷେତ୍ର ପରିକ୍ରମା କରିବେ । ଏଥିପାଇଁ ଶ୍ରୀମନ୍ଦିରରେ ସ୍ୱତନ୍ତ୍ର ନୀତି ହେବ ।
ମହାପ୍ରଭୁଙ୍କ ମଧ୍ୟାହ୍ନ ଧୂପ ସରିବା ପରେ ଦକ୍ଷିଣ ଘରେ ବିରାଜିତ ଶ୍ରୀନୃସିଂହ ମହାପ୍ରଭୁ ଆଜ୍ଞାମାଳ ପାଇ ବିମାନରେ ବିଜେ ହେବେ । ବିମାନବଡ଼ୁ ସେବକମାନେ ପଟୁଆରରେ ଠାକୁରଙ୍କୁ ବିଜେ କରାଇ ସହର ପରିକ୍ରମା କରିବେ । ଶ୍ରୀକ୍ଷେତ୍ରର ପୁରାଣ ପ୍ରସିଦ୍ଧ ଚାରି ଆଶ୍ରମକୁ ବିଜେ କରିବେ ଠାକୁରେ । ଆଶ୍ରମମାନଙ୍କରେ ଠାକୁରଙ୍କୁ ଶୀତଳ ଭୋଗ ଅର୍ପଣ କରାଯିବ । ସେଠାରୁ ଠାକୁରେ ଶ୍ରୀମନ୍ଦିରକୁ ଫେରିବେ । ଆଗ କାଳରେ ରଥଯାତ୍ରା ପରେ ଶ୍ରୀକ୍ଷେତ୍ରରେ ହଇଜା ଓ ଝାଡ଼ାବାନ୍ତି ଭଳି ରୋଗ ବ୍ୟାପୁଥିଲା । ଏଣୁ ମହାମାରୀରୁ ଭକ୍ତଙ୍କୁ ଉଦ୍ଧାର କରିବାକୁ ଠାକୁରେ ଶ୍ରୀକ୍ଷେତ୍ର ପରିକ୍ରମା କରନ୍ତି ବୋଲି ବିଶ୍ୱାସ ରହିଛି । ଶ୍ରାବଣ ମାସ ଶୁକ୍ଳପକ୍ଷ ନବମୀ ତିଥିରେ ଏହି ବିଧି ପାଳନ କରାଯାଏ ।
