ରାୟଗଡ଼ା,୨୯/୦୬: ମାଓ ସଂଗଠନ ଛାଡ଼ିଛନ୍ତି ବଂଶଧାରା-ଘୁମୁସର ନାଗାବଳୀ(ବାଘୁନା) ଡିଭିଜନର ଟପ୍ ମାଓନେତା ନିଖିଲ ଓ ତାଙ୍କ ପତ୍ନୀ ଇନ୍ଦୁ । ସେମାନଙ୍କ ସମେତ ଆହୁରି ୧୫ ଜଣ ଆତ୍ମସମର୍ପଣ କରି ମୁଖ୍ୟସ୍ରୋତକୁ ଫେରିଛନ୍ତି । ଏହାପରେ ଅନ୍ୟମାନେ ଆତ୍ମସମର୍ପଣ କରିବାକୁ ଯୋଜନା ଥିଲେ ବି ତାହା ଫେଲ୍ ମାରିଛି । ଏବେ ବି ୧୨ ଜଣ କ୍ୟାଡର ମାଓବାଦୀ ସକ୍ରିୟ ଅଛନ୍ତି । ସେମାନଙ୍କ ସମ୍ପର୍କରେ ପୁଲିସ୍ ନିକଟରେ କୌଣସି ଖବର ନାହିଁ। ୨୦୨୬ ମାର୍ଚ୍ଚ ୩୧ ସୁଦ୍ଧା ସରକାର ଆତ୍ମସମର୍ପଣ ପାଇଁ ଯେଉଁ ଘୋଷଣା କରିଥିଲେ ସେଥିପ୍ରତି ଧ୍ୟାନ ଦେଇ ନ ଥିବା ଏଥିରୁ ସ୍ପଷ୍ଟ ହୋଇଛି । ସେମାନେ ରାୟଗଡ଼ା, କନ୍ଧମାଳ ଓ ଗଞ୍ଜାମ ଜିଲ୍ଲା ସୀମାନ୍ତରେ ବର୍ତ୍ତମାନ ରହିଥିବା ଆଲୋଚନା ହେଉଛି । ଆତ୍ମସମର୍ପଣ କରିବା ଲାଗି ନିଖିଲ ସେମାନଙ୍କୁ ଅପିଲ୍ କରିଥିଲେ । ଏହାକୁ ସେମାନେ କର୍ଣ୍ଣପାତ କରିନାହାନ୍ତି । ଗୁଇନ୍ଦା ଆଖି ସେମାନଙ୍କୁ ଧରିବାକୁ ଘୂରି ବୁଲୁଛି । ବିଭିନ୍ନ ସମୟରେ ସର୍ଚ୍ଚ ଅପରେସନ ଜାରି ରହିଛି ।
ବାଘୁନା ଡିଭିଜନରେ ମୋଟ ୨୫ରୁ ୨୭ ଜଣ ମାଓବାଦୀ ଥିଲେ । ଗତ ଫେବୃଆରୀ ୬ ତାରିଖରେ ୧୫ ଜଣ ଆତ୍ମସମର୍ପଣ କରିଥିଲେ । ବର୍ତ୍ତମାନ ଆହୁରି ୧୨ ଜଣ ରହିଛନ୍ତି । ସେମାନଙ୍କୁ ଆତ୍ମସମର୍ପଣ କରିବା ଲାଗି ଅପିଲ୍ ପରେ ମଧ୍ୟ ନଶୁଣି ବାରମ୍ବାର ସ୍ଥାନ ପରିବର୍ତ୍ତନ କରି ଜଙ୍ଗଲରେ ଲୁଚିରହିଛନ୍ତି । ଏଭଳିକି ନିଖିଲ ଅଡିଓ ଜାରି କରି ସଶସ୍ତ୍ର ଆନ୍ଦୋଳନ ଛାଡ଼ି ପାଇଁ ନିବେଦନ କରିଥିଲେ । ସାମାଜିକ, ଆଥି ର୍କ ଓ ରାଜନୈତିକ ପରିସ୍ଥିତିରେ ସଶସ୍ତ୍ର ବିପ୍ଲବ କରିବା କଷ୍ଟକର ବୋଲି ବୁଝାଇଥିଲେ ।
ଅଧିକ ପଢ଼ନ୍ତୁ :- ଚୌଦ୍ୱାର ଜେଲ୍ ଅଧୀକ୍ଷକଙ୍କୁ ଅନୁକମ୍ପା କାହିଁକି ? ଭଦ୍ରକ ଜେଲ୍ରେ ବି ଅର୍ଥ ହେର୍ଫେର୍ କରିଥିଲେ!
ସଶସ୍ତ୍ର ଆନ୍ଦୋଳନ ତ୍ୟାଗ କରି ଭାରତୀୟ ସମ୍ବିଧାନ ଅନୁଯାୟୀ ରାସ୍ତା ଆପଣାଇବାକୁ ପରାମର୍ଶ ଦେଇଥିଲେ ସୁଦ୍ଧା ଏହି ୧୨ ଜଣଙ୍କ ଉପରେ କୌଣସି ପ୍ରଭାବ ପଡ଼ି ନାହିଁ । ଏହି ୧୨ ଜଣିଆ ଗୋଷ୍ଠୀର ନେତୃତ୍ୱ ନେଉଛନ୍ତି ଶିଲା । ତାଙ୍କ ସହ ରହିଛନ୍ତି ମାଙ୍ଗୁ, ସୁଷମା, ରଜିତା, ସନ୍ତୋଷ, ଜିବିନି ଓ ସସ୍ମିତା । ଅନ୍ୟମାନଙ୍କ ପରିଚୟ ହସ୍ତଗତ ହୋଇ ନାହିଁ। ପୂର୍ବରୁ ଓଡ଼ିଶା, ଆନ୍ଧ୍ରପ୍ରଦେଶ, ତେଲଙ୍ଗାନା, ଛତିଶଗଡ଼ରେ ଅନେକ ମାଓବାଦୀଙ୍କ ମୃତ୍ୟୁ ଘଟିଛି । ଅନେକ ପୁଲିସ୍ ନିକଟରେ ଆତ୍ମସମର୍ପଣ କରିଛନ୍ତି । ବର୍ତ୍ତମାନ ମଧ୍ୟ ବାଘୁନା ଡିଭିଜନ କାର୍ଯ୍ୟ କରୁଛି ବୋଲି ସ୍ପଷ୍ଟ ହୋଇଛି । ଶିଲାଙ୍କ ନେତୃତ୍ୱରେ ରାୟଗଡ଼ା, କନ୍ଧମାଳ ଓ ଗଞ୍ଜାମ ଜିଲ୍ଲା ସୀମାନ୍ତରେ ସେମାନେ ରହିଥିବା ଗୁଇନ୍ଦା ବିଭାଗ ଖବର ପାଇଛି । ସେମାନେ ଆତ୍ମସମର୍ପଣ ପାଇଁ ବାଟ ଖୋଜୁଥିବା ଜଣାପଡ଼ିଛି ବୋଲି ଆଲୋଚନା ହେଉଛି । ସେଥିରେ କେତେ ସତ୍ୟତା ଅଛି ତାହା ଜଣାପଡ଼ିନି। ଏହି ମାଓ ଗୋଷ୍ଠୀକୁ ଧରିବା ପାଇଁ ପୁଲିସ୍ ପକ୍ଷରୁ କମ୍ବିଂ ଅପରେସନ ଚାଲିଛି । ୩ ଜିଲ୍ଲା ପୁଲିସ୍ ପକ୍ଷରୁ ଉଦ୍ୟମ ଜାରି ରହିଥିବା ବିଶେଷ ସୂତ୍ରରୁ ଜଣାପଡ଼ିଛି । କିଛିଦିନ ପୂର୍ବରୁ ପୁଲିସ୍ ଡିଜି ୱାଇ.ବି ଖୁରାନିଆ ମଧ୍ୟ ଆତ୍ମସମର୍ପଣ କରିବା ପାଇଁ ମାଓବାଦୀଙ୍କୁ ଅପିଲ କରିଥିଲେ । ପୂର୍ବରୁ ଏ ସମ୍ପର୍କରେ ଏଡିଜି ସଞ୍ଜୀବ ପଣ୍ଡା କହିଥିଲେ, ସମସ୍ତ ମାଓବାଦୀ ଆତ୍ମସମର୍ପଣ କରିବା ପାଇଁ ଆମେ ଲଗାତାର ଅପିଲ୍ କରୁଛୁ । ସେମାନଙ୍କୁ ସରକାର ସ୍ୱାଗତ ମଧ୍ୟ କରୁଛନ୍ତି ବୋଲି କହିଥିଲେ ।
