ଢାକା : ବାଂଲାଦେଶ ବୈଦେଶିକ ମନ୍ତ୍ରଣାଳୟ ଭାରତର କାର୍ଯ୍ୟକାରୀ ହାଇକମିଶନର ପବନ ବାଧେଙ୍କୁ କରିଛି ସମନ। ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମାଙ୍କ କିଛି ମନ୍ତବ୍ୟକୁ ନେଇ ବାଂଲାଦେଶ ଏକ ଆନୁଷ୍ଠାନିକ ବିରୋଧ ପ୍ରଦର୍ଶନ କରିଥିବା ଏକ ଗଣମାଧ୍ୟମ ରିପୋର୍ଟରୁ ଜଣାପଡିଛି।
ୟୁଏନବି (UNB) ନ୍ୟୁଜ୍ ସର୍ଭିସର ସୂଚନା ଅନୁଯାୟୀ, ଦକ୍ଷିଣ ଏସିଆ ମହାନିର୍ଦ୍ଦେଶକ ଇଶ୍ରାତ୍ ଜାହାନ ଗୁରୁବାର ଦିନ ଭାରତୀୟ କୂଟନୀତିଜ୍ଞଙ୍କୁ ବାଂଲାଦେଶର ଆଭିମୁଖ୍ୟ ବିଷୟରେ ଜଣାଇଛନ୍ତି। ଗତ ସପ୍ତାହରେ ଏକ ସୋସିଆଲ ମିଡିଆ ପୋଷ୍ଟରେ ଶର୍ମା କହିଥିଲେ ଯେ, ଆସାମରେ ୨୦ ଜଣ ବିଦେଶୀ ନାଗରିକଙ୍କୁ ଅଟକ ରଖାଯାଇ ବାଂଲାଦେଶକୁ ଫେରାଇ ଦିଆଯାଇଛି।
ଆହୁରି ମଧ୍ୟ ପଢନ୍ତୁ : ପଞ୍ଜାବ ବିଧାନସଭାରେ ଖୁବ୍ ହଙ୍ଗାମା , ସିଏମ୍ ଭଗୱନ୍ତ ମାନ ମଦ ପିଇ ଆସି ଥିବାର ଅଭିଯୋଗ
ଶର୍ମା କହିଥିଲେ "ଅଭଦ୍ର ଲୋକମାନେ କୋମଳ ଭାଷା ବୁଝନ୍ତି ନାହିଁ। ଯେତେବେଳେ ଆମେ ଆସାମରୁ ଅନୁପ୍ରବେଶକାରୀମାନଙ୍କୁ ବାହାର କରୁ, ଯେଉଁମାନେ ନିଜେ ଯାଆନ୍ତି ନାହିଁ, ସେତେବେଳେ ଆମେ ନିଜକୁ ଏହି ଭବିଷ୍ୟବାଣୀ ମନେ ପକାଇ ଦେଇଥାଉ। ଉଦାହରଣ ସ୍ୱରୂପ, ଏହି ୨୦ ଜଣ ବେଆଇନ ବାଂଲାଦେଶୀଙ୍କୁ ଗତକାଲି ରାତିରେ ବାହାରକୁ ବାହାର କରି ଦିଆଯାଇଛି,"।
ଇଶ୍ରାତ୍ ଭାରତୀୟ କୂଟନୀତିଜ୍ଞଙ୍କୁ କହିଛନ୍ତି ଯେ, ଏଭଳି ମନ୍ତବ୍ୟ ଦୁଇ ଦେଶ ମଧ୍ୟରେ ଥିବା ବନ୍ଧୁତ୍ୱପୂର୍ଣ୍ଣ ସମ୍ପର୍କର ଭାବନାକୁ କ୍ଷୁର୍ଣ୍ଣ କରୁଛି। ଅଧିକାରୀ ଜଣକ ଏହି ମନ୍ତବ୍ୟକୁ ବାଂଲାଦେଶ-ଭାରତ ସମ୍ପର୍କ ପାଇଁ "ଅପମାନଜନକ" ବୋଲି ବର୍ଣ୍ଣନା କରିଛନ୍ତି ଏବଂ ଢାକାର ଅସନ୍ତୋଷ ପ୍ରକାଶ କରିଛନ୍ତି। ସମ୍ବେଦନଶୀଳ ଦ୍ୱିପାକ୍ଷିକ ପ୍ରସଙ୍ଗରେ କହିବା ସମୟରେ ସଂଯମତା ଅବଲମ୍ବନ କରିବା ଉପରେ ଇଶ୍ରାତ୍ ଗୁରୁତ୍ୱାରୋପ କରିଛନ୍ତି।
୨୦୨୪ରେ ହାସିନା ସରକାରଙ୍କ ପତନ ପରେ ମହମ୍ମଦ ୟୁନୁସଙ୍କ ନେତୃତ୍ୱରେ ମଧ୍ୟବର୍ତ୍ତୀକାଳୀନ ସରକାର କ୍ଷମତାକୁ ଆସିବା ପରେ ଭାରତ ଓ ବାଂଲାଦେଶ ମଧ୍ୟରେ ସମ୍ପର୍କରେ ବଡ଼ ଧରଣର ଅବନତି ଦେଖା ଦେଇଥିଲା। ଫେବ୍ରୁଆରୀ ସଂସଦୀୟ ନିର୍ବାଚନରେ ବାଂଲାଦେଶ ନ୍ୟାସନାଲିଷ୍ଟ ପାର୍ଟି (BNP) ର ବିଜୟ ପରେ ତାରିକ୍ ରହମାନ ପ୍ରଧାନମନ୍ତ୍ରୀ ହେବା ପରେ ଭାରତ ଏବଂ ବାଂଲାଦେଶ ଦ୍ୱିପାକ୍ଷିକ ସମ୍ପର୍କକୁ ପୁନର୍ବାର ସଜାଡିବା ପାଇଁ ଉଦ୍ୟମ କରୁଛନ୍ତି।
