ଢାକା,୨୫/୦୩: ଶେଖ୍ ହସିନା ସରକାରର ପତନ ପରେ ବାଂଲାଦେଶର କପଡ଼ା ଶିଳ୍ପ କ୍ଷେତ୍ରକୁ ଭୟଙ୍କର ସଂକଟ ମାଡ଼ିବସିଛି । କମ୍ପାନିମାନେ ଦେଶରେ ନିବେଶ ପାଇଁ ମୁହଁ ମୋଡ଼ୁଛନ୍ତି । ଏମିତି କି ପୂର୍ବରୁ ବିପୁଳ ପୁଞ୍ଜି ଖଟାଇ ଲାଭବାନ ହୋଇଥିବା ସଂସ୍ଥାମାନେ ବାଂଲାଦେଶକୁ ଅଲ୍ବିଦା କହିବା ଆରମ୍ଭ କରିଦେଇଛନ୍ତି ।
ପୂର୍ବତନ ପ୍ରଧାନମନ୍ତ୍ରୀ ହସିନାଙ୍କ ଗାଦିଚ୍ୟୁତ ହେବାର ୭ ମାସ ପରେ ୧୪୦ରୁ ଅଧିକ କପଡ଼ା ଫ୍ୟାକ୍ଟ୍ରିରେ ତାଲା ପଡ଼ିସାରିଲାଣି । ଏହାଯୋଗୁ ୧ ଲକ୍ଷରୁ ଅଧିକ ଲୋକ ବେରୋଜଗାର ହୋଇଯାଇଛନ୍ତି । କେବଳ ଗାଜିପୁର, ସାୱର, ନାରାୟଣଗଞ୍ଜ ଓ ନର୍ସିନ୍ଦିରେ ୫୦ରୁ ଅଧିକ ପୋଷାକ କାରଖାନା ସମ୍ପୂର୍ଣ୍ଣ ଭାବେ ବନ୍ଦ ହୋଇଯାଇଛି । ପ୍ରାୟ ୪୦ଟି କାରଖାନା ଅସ୍ଥାୟୀ ଭାବେ ବନ୍ଦ ହୋଇଛି ।
ଅନ୍ୟ କେତେକ କମ୍ପାନିରେ କାର୍ଯ୍ୟରତ ଶ୍ରମିକଙ୍କ ୨ ମାସରୁ ୧୪ ମାସର ବେତନ ବାକି ରହିଛି । ଏହାଯୋଗୁ ହାହାକାର ସ୍ଥିତି ସୃଷ୍ଟି ହୋଇଛି। ଲୋକମାନେ ରାସ୍ତାକୁ ଓହ୍ଲାଇ ଆନ୍ଦୋଳନ କରିଛନ୍ତି । ଇଦ୍ ପରେ ଆହୁରି ଅନେକ ଫ୍ୟାକ୍ଟ୍ରି ବନ୍ଦ ହୋଇପଡ଼ିବା ଆଶଙ୍କା ଉପୁଜିଛି । ଏହାସତ୍ତେ୍ୱ ସରକାର ଓ ପୋଷାକ ଶିଳ୍ପ ସଂସ୍ଥାଙ୍କ ତରଫରୁ କୌଣସି ପଦକ୍ଷେପ ଗ୍ରହଣ କରାଯାଉ ନାହିଁ ।
ବାଂଲାଦେଶ ପୋଷାକ ନିର୍ମାତା ଓ ରପ୍ତାନିକାରୀ ସଂଘ (ବିଜିଏମ୍ଇଏ)ର ସୂତ୍ର ମୁତାବକ, ୨୦% ଅର୍ଡର ଦେଶରୁ ଅନ୍ୟତ୍ର ସ୍ଥାନାନ୍ତର ହୋଇଯାଇଛି । ଏବେ ଏହା ପଡ଼ୋଶୀ ଭାରତ, ଭିଏତନାମ, ଶ୍ରୀଲଙ୍କା, ଇଣ୍ଡୋନେସିଆ ଓ ପାକିସ୍ତାନକୁ ଚାଲିଯାଇଛି ।
ଗାର୍ମେଣ୍ଟ ଫ୍ୟାକ୍ଟ୍ରି ଅଚାନକ ବନ୍ଦ ହୋଇଯିବା ପଛରେ ଦୁଇଟି ବଡ଼ କାରଣ ଥିବା କୁହାଯାଉଛି । ସୂତ୍ର ମୁତାବକ, ଦେଶରେ ଦେଖାଦେଇଥିବା ଏହି ମାନ୍ଦାବସ୍ଥା ସମ୍ପୂର୍ଣ୍ଣ ରାଜନୈତିକ । ଏ ପର୍ଯ୍ୟନ୍ତ ବନ୍ଦ ହୋଇପଡ଼ିଥିବା କପଡ଼ା ଫ୍ୟାକ୍ଟ୍ରି ମଧ୍ୟରୁ ଅଧିକାଂଶ ପୂର୍ବତନ ପ୍ରଧାନମନ୍ତ୍ରୀ ହସିନାଙ୍କ ଦଳ ଆୱାମି ଲିଗ୍ର ନେତାଙ୍କ ସହ ଜଡ଼ିତ ରହିଛି । ହସିନାଙ୍କ ବିଦେଶୀ ନିବେଶ ପରାମର୍ଶଦାତା ସଲମାନ ଏଫ୍ ରହମାନଙ୍କ ବେକ୍ସିମ୍କୋ କମ୍ପାନି ବି ବନ୍ଦ ହୋଇଯାଇଛି ।
ଗତ ୭ ମାସ ମଧ୍ୟରେ ବେକ୍ସିମ୍କୋର ୧୫ଟି କାରଖାନା ସମ୍ପୂର୍ଣ୍ଣ ଭାବେ ବନ୍ଦ ହୋଇଯାଇଛି । ଏହାଛଡ଼ା, ଆୱାମି ଲିଗ୍ର ନେତା ଗାଜି ଦସ୍ତଗିରଙ୍କର ଅନେକ କାରଖାନା ବି ବନ୍ଦ ହୋଇଛି । ଲେବର ନେତା ମହମ୍ମଦ ମିଣ୍ଟୁ କହିଛନ୍ତି, ବେକ୍ସିମ୍କୋ ଗାର୍ମେଣ୍ଟ କମ୍ପାନି ଦେଶର ଏକ ପ୍ରମୁଖ କମ୍ପାନି ଥିଲା । ଏଠାରେ କାମ କରୁଥିବା ଶ୍ରମିକମାନେ ବେତନ ସାଙ୍ଗକୁ ବୋନସ୍ ପାଇ ଲାଭବାନ ହେଉଥିଲେ । ଏହା ବନ୍ଦ ହୋଇପଡ଼ିବା ଯୋଗୁ ସମସ୍ୟା ଉପୁଜିଛି । ଅନେକ ବଡ଼ କପଡ଼ା ବେପାରୀ ଦେଶ ଛାଡ଼ି ପଳାଇଲେଣି । ଏହାଯୋଗୁ ଆଗକୁ ଆହୁରି ଗମ୍ଭୀର ସମସ୍ୟା ଉପୁଜିବ ।
ପୋଷାକ କ୍ଷେତ୍ରକୁ ବାଂଲାଦେଶ ଅର୍ଥ ବ୍ୟବସ୍ଥାର ମେରୁଦଣ୍ଡ କୁହାଯାଇଥାଏ । ଏହି ଶିଳ୍ପ ପ୍ରତିବର୍ଷ ଦେଶର ୮୪% ବିଦେଶୀ ମୁଦ୍ରା ହାସଲ କରିଥାଏ । ଏଥିସହ ସିଧାସଳଖ ଭାବେ ୫୦ ଲକ୍ଷ ଓ ପରୋକ୍ଷରେ ୧.୫ କୋଟି ଲୋକଙ୍କୁ ରୋଜଗାର ଦେଇଥାଏ । ବିଶେଷକରି ମହିଳାମାନେ ବହୁ ସଂଖ୍ୟାରେ ଏହି ଶିଳ୍ପରେ କାର୍ଯ୍ୟ କରୁଛନ୍ତି । କିନ୍ତୁ ବର୍ତ୍ତମାନର ସଂକଟ ଅର୍ଥ ବ୍ୟବସ୍ଥାକୁ ଦୋହଲାଇ ଦେଇଛି ।
