ନୂଆଦିଲ୍ଲୀ,୧୫/୦୬ : ବିସିସିଆଇ ପକ୍ଷରୁ ୨୦୨୫-୨୬ ସିଜନ ପାଇଁ ଘରୋଇ କ୍ରୀଡ଼ାସୂଚୀ ଘୋଷଣା କରାଯାଇଛି । ଅଗଷ୍ଟ ୨୮ ତାରିଖରୁ ଦୁଲୀପ ଟ୍ରଫି ସହ ସିଜନ ଆରମ୍ଭ ହେବ । ସେହିପରି ପ୍ରିମିୟର ଘରୋଇ ପ୍ରଥମ ଶ୍ରେଣୀ କ୍ରିକେଟ୍ ଟୁର୍ଣ୍ଣାମେଣ୍ଟ ରଣଜୀ ଟ୍ରଫି ଅକ୍ଟୋବର ୧୫ ତାରିଖରୁ ଆରମ୍ଭ ହୋଇ ୨୦୨୬ ଫେବ୍ରୁଆର ୨୮ ତାରିଖରେ ଶେଷ ହେବ । ଏଥର ବିସିସିଆଇ କିଛି ଟୁର୍ଣ୍ଣାମେଣ୍ଟର ଫର୍ମାଟରେ ପରିବର୍ତ୍ତନ କରିଛି ।
ଶନିବାର ବିସିସିଆଇର ଆପେକ୍ସ କାଉନସିଲ୍ ବୈଠକ ବସିଥିଲା । ଏହି ବୈଠକରେ ଘରୋଇ କ୍ରୀଡ଼ାସୂଚୀ ଘୋଷଣା କରାଯାଇଥିଲା । ଏଥର ଦୁଲୀପ ଟ୍ରଫି ପାରମ୍ପରିକ ଜୋନ ସ୍ତରୀୟ ଫର୍ମାଟରେ ଖେଳାଯିବ । ଆଗାମୀ ଅଗଷ୍ଟ ୨୮ରୁ ଟୁର୍ଣ୍ଣାମେଣ୍ଟ ଆରମ୍ଭ ହୋଇ ସେପ୍ଟେମ୍ବର ୧୫ ତାରିଖରେ ଶେଷ ହେବ । ଗତ ବର୍ଷ ଦୁଲୀପ ଟ୍ରଫିରେ ୪ଟି ଦଳ (ଭାରତ ଏ, ବି, ସି, ଡି) ଭାଗ ନେଇଥିଲେ । ମାତ୍ର ଏଥର ୬ଟି ଜୋନ (ଉତ୍ତର, ଦକ୍ଷିଣ, ପୂର୍ବ, ପଞ୍ଚିମ, କେନ୍ଦ୍ର ଏବଂ ଉତ୍ତର-ପୂର୍ବ) ଦଳ ଭାଗ ନେବେ । ପୂର୍ବଭଳି ଜୋନାଲ କମିଟି ସମସ୍ତ ଦଳ ଚୟନ କରିବେ । ଏହାପରେ ଇରାନୀ କପ୍ ଅକ୍ଟୋବର ୧ରୁ ୫ତାରିଖ ମଧ୍ୟରେ ଅନୁଷ୍ଠିତ ହେବ ।
ପୂର୍ବ ସିଜନ ଭଳି ଏଥର ମଧ୍ୟ ରଣଜୀ ଟ୍ରଫି ୨ଟି ପର୍ଯ୍ୟାୟରେ ଖେଳାଯିବ । ପ୍ରଥମ ପର୍ଯ୍ୟାୟ ଲିଗ୍ ଅକ୍ଟୋବର ୧୫ରୁ ନଭେମ୍ବର ୧୯ ତାରିଖ ଏବଂ ଦ୍ୱିତୀୟ ପର୍ଯ୍ୟାୟ ଲିଗ୍ ୨୦୨୬ ଜାନୁଆରୀ ୨୨ରୁ ଫେବ୍ରୁଆରୀ ୧ ତାରିଖ ମଧ୍ୟରେ ଅନୁଷ୍ଠିତ ହେବ । ଏହାପରେ ଫେବ୍ରୁଆରୀ ୬ରୁ ୨୮ ତାରିଖ ମଧ୍ୟ ନକ୍ଆଉଟ୍ ରାଉଣ୍ଡ୍ ଖେଳାଯିବ ।
ସେହିପରି ସୟଦ ମୁସ୍ତାକ ଅଲି ଟ୍ରଫି ଏବଂ ସିନିୟର ମହିଳା ଟି-ଟ୍ୱେଣ୍ଟି ଟ୍ରଫିରେ ଏଥର ସୁପର ଲିଗ୍ ପର୍ଯ୍ୟାୟ ସାମିଲ କରାଯାଇଛି । ଗ୍ରୁପ୍ ପର୍ଯ୍ୟାୟ ପରେ ସୁପର ଲିଗ୍ ରାଉଣ୍ଡ୍ ଆରମ୍ଭ ହେବ । ସୟଦ ମୁସ୍ତାକ ଅଲି ଟ୍ରଫି ନଭେମ୍ବର ୨୬ରୁ ଆରମ୍ଭ ହୋଇ ଡିସେମ୍ବର ୧୮ ତାରିଖରେ ଶେଷ ହେବ । ସିନିୟର ମହିଳା ଟି-ଟ୍ୱେଣ୍ଟି ଟ୍ରଫି ଅକ୍ଟୋବର ୮ରୁ ଆରମ୍ଭ ହୋଇ ୩୧ ତାରିଖରେ ଶେଷ ହେବ । ଏହି ଟୁର୍ଣ୍ଣାମେଣ୍ଟ ସହ ଘରୋଇ ମହିଳା କ୍ରିକେଟ୍ ସିଜନ ଆରମ୍ଭ ହେବ ।
ବିଜୟ ହଜାରେ ଟ୍ରଫି, ସିନିୟର ମହିଳା ଦିନିକିଆ ଟ୍ରଫି ଏବଂ ପୁରୁଷ ୨୩ବର୍ଷରୁ କମ୍ ରାଜ୍ୟ ଟ୍ରଫି ଟୁର୍ଣ୍ଣାମେଣ୍ଟରେ ମଧ୍ୟ ପରିବତ୍ତର୍ନ କରାଯାଇଛି । ଉପରୋକ୍ତ ୩ଟି ଯାକ ଟୁର୍ଣ୍ଣାମେଣ୍ଟରେ ୪ଟି ଏଲିଟ୍ ଗ୍ରୁପ୍ ସମେତ ଏଥର ପ୍ଲେ ଗ୍ରୁପ୍ ସାମିଲ କରାଯାଇଛି । ବିଜୟ ହଜାରେ ଟ୍ରଫି ଡିସେମ୍ବର ୨୪ରୁ ଆରମ୍ଭ ହୋଇ ଜାନୁଆରୀ ୮ତାରିଖରେ ଶେଷ ହେବ ।
