ନୂଆଦିଲ୍ଲୀ,୧୦/୫ : ଭୋପାଳରେ ଜଣେ MBBS ଛାତ୍ରୀଙ୍କ ମୃତ୍ୟୁ ପରେ ଆଉ ଏକ ଦୁଃଖଦ ଘଟଣା ସାମ୍ନାକୁ ଆସିଛି। ଛାତ୍ରୀଙ୍କୁ ଘର ଭଡ଼ା ଦେଇଥିବା ଘର ମାଲିକ ଆତ୍ମହତ୍ୟା କରିଥିବା ଅଭିଯୋଗ ହୋଇଛି । ଏହି ଘଟଣା ପରେ ମାମଲା ଏବେ ଏକ ନୂତନ ମୋଡ଼ ନେଇଛି । ଘର ମାଲିକଙ୍କ ସ୍ତ୍ରୀ ଛାତ୍ରୀଙ୍କ ପରିବାର ଏବଂ ପୋଲିସ ବିରୋଧରେ ଗମ୍ଭୀର ଅଭିଯୋଗ ଆଣିଛନ୍ତି । ସେ କହିଛନ୍ତି ଯେ, ଛାତ୍ରୀଙ୍କ ମୃତ୍ୟୁ ପରେ ତାଙ୍କ ସ୍ୱାମୀ ନିରନ୍ତର ମାନସିକ ଚାପରେ ଥିଲେ ଏବଂ ତାଙ୍କୁ ମିଥ୍ୟା ମାମଲାରେ ଫସାଇବା ଲାଗି ଦିଆଯାଉଥିଲା ।
ପତ୍ନୀଙ୍କ କହିବା ଅନୁଯାୟୀ, MBBS ଛାତ୍ରୀ ରୋଶନି ପ୍ରାୟ ଚାରି ମାସ ପୂର୍ବରୁ କୋହେଫିଜା ଅଞ୍ଚଳରେ ଭଡା ଘରେ ରହିଥିଲେ । ଛାତ୍ରୀଙ୍କ ସନ୍ଦେହଜନକ ମୃତ୍ୟୁ ପରେ, ପୋଲିସ ତଦନ୍ତ ଆରମ୍ଭ ହୋଇଥିଲା ଏବଂ ମାମଲାର ଗମ୍ଭୀରତାକୁ ଦୃଷ୍ଟିରେ ରଖି ଏକ SIT ଗଠନ କରାଯାଇଥିଲା । ଏହି ସମୟ ମଧ୍ୟରେ, ପୋଲିସ ତାଙ୍କ ସ୍ୱାମୀଙ୍କୁ ବୟାନ ପାଇଁ ବାରମ୍ବାର ଥାନାକୁ ଡକାଇ ଘଣ୍ଟା ଘଣ୍ଟା ଧରି ସେଠାରେ ରଖିଥିଲା । ପରିବାର ଅଭିଯୋଗ କରିଛନ୍ତି ଯେ, ଛାତ୍ରୀଙ୍କ ପରିବାର ମଧ୍ୟ ନିରନ୍ତର ଚାପ ପ୍ରୟୋଗ କରୁଥିଲେ, ଫଳରେ ତାଙ୍କ ସ୍ୱାମୀ ମାନସିକ ଭାବେ ଭାଙ୍ଗି ପଡ଼ିଥିଲେ।
ପତ୍ନୀ କହିଛନ୍ତି ଯେ, ଆତ୍ମହତ୍ୟା କରିବା ପୂର୍ବରୁ ତାଙ୍କ ସ୍ୱାମୀ ବାରମ୍ବାର ଅଯଥା ହଇରାଣ ହେଉଥିବା ଅଭିଯୋଗ କରିଥିଲେ। ସେ କ୍ରମଶଃ ହତାଶ ହୋଇଯାଉଥିଲେ ଏବଂ ଚାପଗ୍ରସ୍ତ ଦେଖାଯାଉଥିଲେ। ପରିବାର ସଦସ୍ୟମାନେ କହିଛନ୍ତି ଯେ, ମାନସିକ ନିର୍ଯାତନା ତାଙ୍କୁ ଏହି ଚରମ ପଦକ୍ଷେପ ନେବାକୁ ବାଧ୍ୟ କରିଥିଲା । ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି । ଏବେ ପୋଲିସ ଏହା ଜାଣିବାକୁ ପ୍ରୟାସ କରୁଛି କି ଆତ୍ମହତ୍ୟା ପଛରେ ବାସ୍ତବିକ କାରଣ କ’ଣ ଥିଲା । ମାମଲାର ଉଭୟ ଦିଗକୁ ସ୍ୱତନ୍ତ୍ର ତଦନ୍ତ ଦଳ (SIT) ଏବଂ ପୋଲିସ ଦଳ ତଦନ୍ତ କରୁଛନ୍ତି।
