ନୂଆଦିଲ୍ଲୀ: କେନ୍ଦ୍ର ସରକାରଙ୍କ ଅଧିନରେ କାର୍ଯ୍ୟ କରୁଥିବା କର୍ମଚାରୀଙ୍କ ଦରମା ଓ ପେନଶନ ବୃଦ୍ଧି କରୁଥିବା ବେତନ କମିଶନ ବୋର୍ଡ ବର୍ତ୍ତମାନ ସୁଦ୍ଧା ଗଠନ କରାଯାଇ ନଥିବା ଜଣାପଡିଛି। ତେବେ ଏହି ମାମଲା ସାମ୍ନାକୁ ଆସିବା ପରେ ଦେଶର କେତେକ କର୍ମଚାରୀ ସଂଗଠନ ଏହା କେବେଠୁ ଆରମ୍ଭ ହେବ ତାହାର ତାରିଖ ଜାଣିବାକୁ କେନ୍ଦ୍ର ସରକାରଙ୍କ ନିକଟରେ ଅପିଲ କରିଥିବା ଜାଣିବାକୁ ମିଳିଛି। ଏହି ପରିପ୍ରେକ୍ଷିରେ ଏକ କର୍ମଚାରୀ ସଂଗଠନର ମୁଖ୍ୟ ଶିବ ଗୋପାଲ ମିଶ୍ର ଆସନ୍ତା ବର୍ଷ ଜାନୁଆରି ୧ ତାରିଖ ସୁଦ୍ଧା କମିଶନ ଗଠନ କରିବାକୁ ସରକାରଙ୍କୁ ଜଣାଇଥିବା ସୂଚନା ମିଳିଛି। 

ଜାତୀୟ ଗଣମାଧ୍ୟମ ଏନଡିଟିଭିକୁ ସାକ୍ଷାତକାର ଦେଇ ଶ୍ରୀ ମିଶ୍ର କହିଛନ୍ତି ଯେ “ସରକାର ପ୍ରତି ୧୦ ବର୍ଷରେ ଥରେ ବେତନ କମିଶନ ଗଠନ କରିଥାନ୍ତି। ଏହା ପୂର୍ବରୁ ଗତ ୨୦୧୬ ମସିହା ଜାନୁଆରୀ ୧ ତାରିଖରେ ସରକାର ସପ୍ତମ ବେତନ କମିଶନ ଗଠନ କରିଥିଲେ। ତେଣୁ ଆସନ୍ତା ବର୍ଷ ଜାନୁଆରୀ ୧ ତାରିଖ ସୁଦ୍ଧା ଅଷ୍ଟମ ବେତନ କମିଶନ ଗଠନ ହେବ ବୋଲି ଆମେ ଅନୁମାନ କରୁଛୁ। ତେବେ ଯଦି ଏହି ପ୍ରକ୍ରିୟାରେ ବିଳମ୍ୱ ହୁଏ ତେବେ ସରକାର କର୍ମଚାରୀମାନଙ୍କୁ ବକେୟା ରାଶି ଦେବାର ବ୍ୟବସ୍ଥା କରିବା ଦରକାର।” 

କେନ୍ଦ୍ର ଇଲେକ୍ଟ୍ରୋନିକ୍ସ ଓ ଆଇଟି ମନ୍ତ୍ରୀ ଅଶ୍ୱୀନି ବୌଷ୍ଣବ ଅଷ୍ଟମ ବେତନ କମିଶନକୁ ନେଇ ନିକଟରେ ଏକ ବଡ ଘୋଷଣା କରିଥିଲେ। ସେ କହିଥିଲେ ଯେ ଆସନ୍ତା ୨୦୨୬ ଜାନୁଆରୀ ମାସ ସୁଦ୍ଧା କମିଶନ ଆରମ୍ଭ ହେବାକୁ ଯାଉଛି। ତେବେ ଏହି କମିଶନ ଆରମ୍ଭ ହେବା ପରେ କେନ୍ଦ୍ର ସରକାର କେତେକ ବଡ ବିତ୍ତିୟ ପରିବର୍ତ୍ତନ କରିବାକୁ ଯାଉଛନ୍ତି। ଯାହା ନିମ୍ନରେ ଆଲୋଚନା କରାଯାଇଛି:-

୧. କେନ୍ଦ୍ର ସରକାରଙ୍କ ଅଧିନରେ କାର୍ଯ୍ୟ କରୁଥିବା କର୍ମଚାରୀଙ୍କ ସର୍ବନିମ୍ନ ମାସିକ ଦରମା ୩୪,୫୦୦-୪୧,୦୦୦କୁ ବୃଦ୍ଧି ପାଇବ।

୨. ଫିଟମେଣ୍ଟ ଫ୍ୟାକ୍ଟର ୨.୮୬ କୁ ବୃଦ୍ଧି ପାଇବାର ସମ୍ଭାବନା ଅଛି, ଯାହା ବିଭିନ୍ନ ପେ ଗ୍ରେଡରେ ଦରମା ବୃଦ୍ଧି କରିବ।

୩. ଏହାସହ ନୂତନ କମିଶନ ମୁଦ୍ରାସ୍ଫୀତି ସହିତ ସମାୟୋଜିତ ହେବା ପାଇଁ ମହଙ୍ଗା ଭତ୍ତା (DA), ଘରଭଡ଼ା ଭତ୍ତା (HRA) ଏବଂ ଯାତ୍ରା ଭତ୍ତା (TA) ବୃଦ୍ଧି କରିବ।

୪. ପେନସନକୁ ନେଇ ତିଆରି ହେବାକୁ ଥିବା ନୂଆ ନିୟମ ଦେୟ ରାଶିକୁ ତତ୍କାଳ ଓ ନିୟମିତ କରିବ। ଏହାସହ ପେନସନ ନୂଆ ପେ ସ୍କେଲ ସହ ସ୍ୱୟଂଚାଳିତ ଭାବେ ଆଡଜେଷ୍ଟ ହୋଇଯିବ।

୫. କର୍ମଚାରୀମାନଙ୍କୁ ସେମାନଙ୍କ କାର୍ଯ୍ୟ ଆଧାରରେ ଅଧିକ ଦରମା ମିଳିବାର ସମ୍ଭାବନା ରହିଛି।

ପାଖାପାଖି ୪୯ ଲକ୍ଷ କର୍ମଚାରୀ ଓ ୬୫ ଲକ୍ଷ ପେନସନ ଧାରକ ଅଷ୍ଟମ ବେତନ କମିଶନ ପାଇଁ ସିଧାସଳଖ ଲାଭବାନ ହେବେ। ସରକାର ଏଯାଏ ଏଥି ନିମନ୍ତେ କୌଣସି ସ୍ପଷ୍ଟ ସୂଚନା ଦେଇନଥିବା ବେଳେ କର୍ମଚାରୀ ସଂଗଠନ ଗୁଡିକ ଏନେଇ ବହୁ ଆଶାବାଦୀ ରହିଛନ୍ତି।