ଭୁବନେଶ୍ୱର: କେନ୍ଦ୍ରୀୟ ଅନୁସନ୍ଧାନ ବ୍ୟୁରୋ (ସିବିଆଇ) ଚିଟ୍ ଫଣ୍ଡ ଦୁର୍ନୀତି ମାମଲାର ମାଷ୍ଟରମାଇଣ୍ଡ ସିବାକୁମାର ଗଙ୍ଗାଧରନ ଓରଫ ଜି. ସିବାକୁମାରଙ୍କୁ ଗିରଫ କରିଛି। ଅଭିଯୁକ୍ତ ସିବାକୁମାର ରାଇଟମାକ୍ସ ଟେକ୍ନୋଟ୍ରେଡ ଇଣ୍ଟରନ୍ୟାସନାଲ ଲିମିଟେଡର ନିର୍ଦ୍ଦେଶକ ଥିଲେ ଏବଂ ୨୦୧୮ ମସିହାରୁ ନିଜର ଅବସ୍ଥାନ ବାରମ୍ବାର ବଦଳାଇ ଗିରଫଦାରୀକୁ ଏଡାଇ ଚାଲିଥିଲେ।
ସୂଚନା ମୁତାବକ, ରାଇଟମାକ୍ସ ଟେକ୍ନୋଟ୍ରେଡ ଇଣ୍ଟରନ୍ୟାସନାଲ ଲିମିଟେଡ ୨୦୧୦ ମସିହା ଅପ୍ରେଲ ୧ ତାରିଖରେ ବେଙ୍ଗାଲୁରୁରେ ଆରମ୍ଭ ହୋଇଥିଲା। ଏହି ସଂସ୍ଥା ଉଚ୍ଚ ରିଟର୍ନର ପ୍ରତିଶ୍ରୁତି ଦେଇ ନିବେଶକମାନଙ୍କଠାରୁ କୋଟି କୋଟି ଟଙ୍କା ସଂଗ୍ରହ କରିଥିଲା। ହେଲେ ଅନେକ ବର୍ଷ ଧରି ଅପେକ୍ଷା କରିବା ପରେ ବି ଲୋକମାନେ ରିଟର୍ଣ୍ଣ ନପାଇବାରୁ ଚିଟ୍ ଫଣ୍ଡ ଦୁର୍ନୀତିରେ ଫସିଥିବା ଜାଣି ଅଭିଯୋଗ ଦାୟର କରିଥିଲେ।
ଏହି ମାମଲାଟି ପ୍ରଥମେ ୨୦୧୪ ମସିହାରେ ପଞ୍ଜୀକୃତ ହୋଇଥିଲା। ଯେଉଁଥିରେ ଠକେଇ, ଅପରାଧିକ ଷଡଯନ୍ତ୍ର ଏବଂ ପ୍ରାଇଜ ଚିଟ୍ସ ଆଣ୍ଡ ମନି ସର୍କୁଲେସନ ସ୍କିମ୍ସ (ବ୍ୟାନିଂ) ଆକ୍ଟ, ୧୯୭୮ର ଉଲ୍ଲଙ୍ଘନ ନେଇ ଅଭିଯୋଗ ହୋଇଥିଲା। ୨୦୧୯ ମସିହାରେ ସିବାକୁମାରଙ୍କୁ ଘୋଷିତ ଅପରାଧୀ ଭାବେ ଘୋଷଣା କରାଯାଇଥିଲା। ସିବିଆଇ ତାଙ୍କୁ ତାମିଲନାଡୁର କରୁରରେ ଟେକନିକାଲ ଓ ସୂଚନା ସୂତ୍ର ମାଧ୍ୟମରେ ଖୋଜି ବାହାର କରିଥିଲା।
ଭୁବନେଶ୍ୱରରୁ ଏକ ସିବିଆଇ ଦଳ ଅଗଷ୍ଟ ୩ ତାରିଖରେ ତାଙ୍କୁ ଗିରଫ କରି ସ୍ୱତନ୍ତ୍ର ମୁଖ୍ୟ ବିଚାରପତି ଅଦାଲତ (ସ୍ପେସିଆଲ ସିଜେଏମ କୋର୍ଟ)ରେ ହାଜର କରିଥିଲେ। ଅଦାଲତ ତାଙ୍କୁ ୧୪ ଦିନ ପାଇଁ ନ୍ୟାୟିକ ହାଜତରେ ରଖିବାକୁ ନିର୍ଦ୍ଦେଶ ଦେଇଛନ୍ତି। ଯେଉଁଠି ସେ ଆସନ୍ତା ଅଗଷ୍ଟ ୧୮ ତାରିଖ ପର୍ଯ୍ୟନ୍ତ ରହିବେ ବୋଲି ସୂଚନା ମିଳିଛି।
