ଭୁବନେଶ୍ୱର, ୧୭/୦୫ : କଂଗ୍ରେସ ଆଡ଼କୁ ଢଳୁଛନ୍ତି କି ବରିଷ୍ଠ ବିଜେଡି ନେତା ଭୂପିନ୍ଦର ସିଂ ? ଘର ବାହୁଡ଼ିବେ କି ଭୂପିନ୍ଦର ? ବିଜେଡି ନେତାଙ୍କ ଆଇପିଏଲ୍ ଉଦାହରଣକୁ ନେଇ ରାଜ୍ୟ ରାଜନୀତିରେ ଜୋର ଧରିଲା ଚର୍ଚ୍ଚା। ସେ କହିଛନ୍ତି ଯେ, ଏବେ IPL ଚାଲିଛି, ଭଲ ପ୍ଲେୟାର୍‌ଙ୍କୁ ସମସ୍ତେ ନେବାକୁ ଚାହିଁବେ। ମୁଁ ଗୋଟେ ଭଲ ପ୍ଲେୟାର୍, ମୋ ପାଖରେ ସମର୍ଥନ ଅଛି। ଏବେ ମୋତେ କଂଗ୍ରେସରୁ ଅଫର୍ ଆସିଲାଣି। ୨୪ ନର୍ବାଚନରେ ବିଜେପି ଅଫର୍ ଦେଇଥିଲା, ଏବେବି ଦେଉଛନ୍ତି। ତେବେ କଂଗ୍ରେସକୁ ଫେରିବା ନେଇ ପଚାରିବାରୁ ସେ ସିଧା ଉତ୍ତର ନଦେଇ କହିଛନ୍ତି ଯେ ଭବିଷ୍ୟତକୁ କାହିଁକି ଯାଉଛ, ଆଜିରେ ବିଶ୍ୱାସ କର ? 

ବିଜେଡି ସାଙ୍ଗଠନିକ କମିଟିରୁ ଭୂପିନ୍ଦର ବାଦ ପଡିବା ପରେ ଅସନ୍ତୁଷ୍ଟ ଥିବା କୁହାଯାଉଛି। ଏନେଇ ପଚାରିବାରୁ ସେ କହିଛନ୍ତି ଯେ, ମୋତେ କାହିଁକି କମିଟିରେ ନେଲେନି ସେ କଥା ଦଳ କହିପାରିବ, ମୁଁ ଜାଣିନି ପଦ ପାଇଁ ବି କିଛି ନେତା ଅସନ୍ତୁଷ୍ଟ ଥିବା ଗଣମାଧ୍ୟମରେ କୁହାଯାଉଛି। ମୁନ୍ନା ଖାଁ ପଦକୁ ନେଇ ଖପ୍ପା ଥିବା ଗଣମାଧ୍ୟମରୁ ଶୁଣିବାକୁ ପାଇଲି। ବିଜେଡିରେ ଢାଞ୍ଚାଗତ ପରିବର୍ତ୍ତନ ହୋଇନଥିବା ଲୋକଙ୍କ ମଧ୍ୟରେ ଧାରଣା ସୃଷ୍ଟି ହୋଇଛି। 

ଭୂପିନ୍ଦର କହିଛନ୍ତି ଯେ, ମୁଁ ସବୁବେଳେ ଖୁସି। ଲୋକଙ୍କ ଆଶୀର୍ବାଦ ସବୁବେଳେ ମୋ ପାଖେ ଅଛି। ବିଧାୟକ ନଥିଲେ ବି ଅଧିକ ସମ୍ମାନ ପାଉଛି। ବରିଷ୍ଠ ନେତା କଣ ମେଳି କରି କଣ ଦଳ ବିରୋଧୀ କାର୍ଯ୍ୟ କରିଥିଲେ କି ? ସେମାନଙ୍କ ଭିତରୁ ବି ଅନେକ କମିଟିରେ ଅଛନ୍ତି। ସବୁ ନିଷ୍ପତ୍ତି ନବୀନ ବାବୁ ନିଅନ୍ତୁ ବୋଲି ଆମେ ପରାମର୍ଶ ଦେଇଥିଲୁ। ସାଧାରଣରେ ଅନେକ ଚର୍ଚ୍ଚା ହେଉଛି। ବିଜେଡିରେ ବିଶେଷ କିଛି ଢାଞ୍ଚାଗତ ପରିବର୍ତ୍ତନ ହୋଇନାହିଁ ବୋଲି ବିଜେଡିର ଧାରଣା ରହିଛି। ଏହା ଉପରେ ଯଦି ସମ୍ପୂର୍ଣ୍ଣ ଭାବେ ଦଳ ବିଚାର ନକରେ ତେବେ ଆସନ୍ତା ଦିନରେ ଦଳ ପାଇଁ ଭଲ ହେବନି। 

କଂଗ୍ରେସ ଯୋଗାଯୋଗରେ ଅନେକ ନେତା

ସେପଟେ ବରିଷ୍ଠ କଂଗ୍ରେସ ନେତା ଜୟଦେବ ଜେନା ବଡ଼ ବୟାନ ଦେଇଛନ୍ତି। ସେ କହିଛନ୍ତି ଯେ, କଂଗ୍ରେସ ବର୍ତ୍ତମାନ ଏକମାତ୍ର ବିକଳ୍ପ। କାରଣ ବିଜେଡି ଓ ବିଜେପି ଏକ। ଆମେ ଦଳ ଛାଡିଥିବା ପୁରୁଖା ନେତାଙ୍କୁ ଘରକୁ ଫେରିବାକୁ ଆହ୍ଵାନ ଦେଇଛୁ। ଭୂପିନ୍ଦର ସିଂହ ନିଜେ ଅନୁଭବ କଲେଣି ଯେ କଂଗ୍ରେସ ପ୍ରସଙ୍ଗକୁ ନେଇ ଲଢେଇ କରୁଛି। ଭବିଷ୍ୟତରେ ଓଡ଼ିଶାରେ କଂଗ୍ରେସ ସରକାର କରିବ। ଆମେ ଅନେକ ନେତାଙ୍କୁ ଯୋଗାଯୋଗ କରିଛୁ। ଅନେକ ବି ଆମ ସମ୍ପର୍କରେ ଅଛନ୍ତି।