ଭୁବନେଶ୍ୱର,୧୦/୦୬: ବିଜେଡି ସଜାଡ଼ିବାକୁ ନୂଆ ରଣନୀତି ପ୍ରସ୍ତୁତ କରୁଛନ୍ତି ଦଳର ମୁଖିଆ ନବୀନ ପଟ୍ଟନାୟକ । ୨୦୨୪ ସାଧାରଣ ନିର୍ବାଚନରେ ହାରିଥିବା ନେତାଙ୍କୁ ଉତ୍ସାହିତ କରିବେ । ଆଗକୁ ପଞ୍ଚାୟତ ଓ ପୌର ନିର୍ବାଚନ ଥିବାରୁ ସେମାନଙ୍କୁ ପୁଣି ଫର୍ମକୁ ଫେରିବାକୁ ପ୍ରେରଣା ଦେବେ । ସେମାନଙ୍କୁ ବିଭିନ୍ନ ପ୍ରକାରର ସଞ୍ଜିବନୀ ମନ୍ତ୍ର ଦେଇ ପୁଣି ସକ୍ରିୟ୍ କରାଇବେ । ପଞ୍ଚାୟତ ଓ ପୌର ଦଖଲ କରିପାରିଲେ ହିଁ ପୁଣି ୨୦୨୯ରେ ଆମେ ଭଲ କରିବା କହି ପୁଣି ନେତାଙ୍କୁ ଟ୍ରାକ୍କୁ ଫେରାଇ ଆଣିବେ । ତେବେ ତା’ ପୂର୍ବରୁ ବୁଥ୍ ଜଗିବା ପାଇଁ କହିବେ । ଭୋଟର ତାଲିକାର ସ୍ୱତନ୍ତ୍ର ସଘନ ସଂଶୋଧନ (ଏସ୍ଆଇଆର୍) ବେଳେ ଯେମିତି ଯୋଗ୍ୟ ଭୋଟରମାନଙ୍କ ନାମ ରହିବ, ତାହା ଜଗିବାକୁ ତାଗିଦ୍ କରିବେ । ବିଶେଷ କରି ଦଳୀୟ କର୍ମୀମାନଙ୍କର ନାମ କେମିତି ନ କଟିବ, ସେ ନେଇ ଜଗିବାକୁ କହିବେ ।
୨୦୨୪ରେ ବିଜେଡି ଟିକେଟରେ ଲଢି ହାରିଥିବା ପ୍ରାର୍ଥୀମାନଙ୍କର ଗୁରୁତ୍ୱପୂର୍ଣ୍ଣ ବୈଠକ ଶଙ୍ଖ ଭବନରେ ବୁଧବାର ଅପରାହ୍ନ ୪ଟାରେ ଆରମ୍ଭ ହେବ । ନବୀନ ଏହି ବୈଠକରେ ଅଧ୍ୟକ୍ଷତା କରିବେ । ଦଳୀୟ ସାଙ୍ଗଠନିକ ପରିଚାଳନା ଓ ଏସ୍ଆଇଆର ସମ୍ପର୍କିତ କାର୍ଯ୍ୟକ୍ରମ ସମ୍ପର୍କରେ ବିସ୍ତୃତ ଆଲୋଚନା କରିବା ସହ ରାଜ୍ୟ ସରକାରଙ୍କ ପ୍ରଶାସନିକ ପରିଚାଳନାରେ ବିଫଳତା, ବିପର୍ଯ୍ୟସ୍ତ ଆଇନଶୃଙ୍ଖଳା ଓ ନାରୀ ନିର୍ଯାତନା ଉପରେ ଦଳୀୟ ନେତୃବୃନ୍ଦଙ୍କ ସହିତ ବିସ୍ତୃତ ଆଲୋଚନା କରିବେ ବୋଲି ବିଜେଡିର ବରିଷ୍ଠ ଉପସଭାପତି ଦେବୀ ମିଶ୍ର ସୂଚନା ଦେଇଛନ୍ତି । ସୋମବାର ଅନୁଷ୍ଠିତ ସାମ୍ୱାଦିକ ସମ୍ମିଳନୀରେ ବିଜେଡିର ବରିଷ୍ଠ ଉପସଭାପତି ଶ୍ରୀ ମିଶ୍ରଙ୍କ ସମେତ ଉପସଭାପତି ସଞ୍ଜୟ କୁମାର ଦାସବର୍ମା, ପ୍ରତାପ ଜେନା, ଉପସଭାପତି ଅତନୁ ସବ୍ୟସାଚୀ ନାୟକ ପ୍ରମୁଖ ଉପସ୍ଥିତ ଥିଲେ । ସେହିପରି ପୂର୍ବତନ ବିଧାୟକ ପ୍ରଶାନ୍ତ ମୁଦୁଲି କହିଛନ୍ତି, ଶାସନରେ ଅବ୍ୟବସ୍ଥା ନେଇ ବୈଠକ ହେଉଛି । ଏହା ସହ ଦାୟିତ୍ୱବାନ ବିରୋଧୀ ଦଳ ହିସାବରେ ସାଙ୍ଗଠନିକ ବ୍ୟବସ୍ଥା କିଭଳି ଠିକ୍ ଭାବେ କରାଯାଇ ପାରିବ ସେ ନେଇ ଆଲୋଚନା ହେବ ବୋଲି ଶ୍ରୀ ମୁଦୁଲି କହିଛନ୍ତି ।
ଅଧିକ ପଢ଼ନ୍ତୁ :- NDA Chief Ministers Meeting: ଆଜି ଏନ୍ଡିଏ ମୁଖ୍ୟମନ୍ତ୍ରୀଙ୍କ ବୈଠକ, କାଲି ନୀତି ଆୟୋଗ ବୈଠକ ସାମିଲ ହେବେ ମୁଖ୍ୟମନ୍ତ୍ରୀ ମୋହନ ମାଝୀ
