ମୁମ୍ବାଇ: ବଲିଉଡ୍ ଅଭିନେତ୍ରୀ ନର୍ଗିସ୍ ଫଖରିଙ୍କ ଭଉଣୀଙ୍କୁ ଗିରଫ କରିଛି ପୋଲିସ । ପୂର୍ବତନ ପ୍ରେମିକଙ୍କୁ ହତ୍ୟା କରିଥିବା ଅଭିଯୋଗରେ ଆଲିୟା ଫଖରିଙ୍କୁ ନ୍ୟୁୟର୍କ ପୋଲିସ ଗିରଫ କରିଥିବା ଜଣାପଡ଼ିଛି । ନ୍ୟୁୟର୍କର କ୍ବିନ୍ସରେ ଆଲିୟା ଏକ ଦୁଇ ମହଲା ଗ୍ୟାରେଜ୍ରେ ନିଆଁ ଲଗାଇ ଦେଇଥିଲେ । ଏଥିରେ ଥିବା ତାଙ୍କ ପୂର୍ବତନ ପ୍ରେମିକ ୩୫ ବର୍ଷୀୟ ଏଡଓ୍ବାର୍ଡ ଜାକୋବସ୍ ଏବଂ ତାଙ୍କର ନୂଆ ବାନ୍ଧବୀ ୩୩ ବର୍ଷୀୟ ଅନସ୍ତାସିଆ ଜୀବନ୍ତଦଗ୍ଧ ହୋଇଥିଲେ । ଇର୍ଷାପରାୟଣ ହୋଇ ଆଲିୟା ଡବଲ୍ ମର୍ଡର କରିଥିବା ଅଭିଯୋଗ ହୋଇଥିଲା ।
ଏବେ ତାଙ୍କୁ ପୋଲିସ ଗିରଫ କରିଥିବା ବେଳେ ସେ ଜେଲ୍ରେ ରହିବେ । ମିଳିଥିବା ସୂଚନା ଅନୁସାରେ, ଏକ ଗ୍ୟାରେଜ ଭିତରେ ଦୁଇ ଜଣ ଥିବା ବେଳେ ଆଲିୟା ନିଆଁ ଲଗାଇ ଦେଇଥିଲେ । ବିଷାକ୍ତ ଧୂଆଁ ଏବଂ ନିଆଁରେ ପୋଡ଼ି ଜୀବନ ହରାଇଥିଲେ ଏଡଓ୍ବାର୍ଡ ଏବଂ ଅନସ୍ତାସିଆ । ଆଲିୟାଙ୍କ ଏହି କାର୍ଯ୍ୟକୁ ‘ବର୍ବର କାଣ୍ଡ’ର ଆଖ୍ୟା ଦେଇଛନ୍ତି ଜଜ୍ ମେଲିଣ୍ଡା କାଜ୍ । ସେପଟେ ଆଲିୟାଙ୍କ ଜାମିନ ଆବେଦନ କ୍ବିନ୍ସର ଏକ କୋର୍ଟ ଖାରଜ କରିଦେଇଛନ୍ତି ।
ସେପଟେ ୨୦୨୨ ହିନ୍ଦୀ ଚଳଚ୍ଚିତ୍ର ‘ରକ୍ଷ୍ଟାର’ରୁ ବଲିଉଡ୍ରେ ଡେବ୍ୟୁ କରିଥିବା ନର୍ଗିସ ତାଙ୍କ ଭଉଣୀଙ୍କ ମାମଲା ସଂପର୍କରେ କୌଣସି ପ୍ରତିକ୍ରିୟା ଦେଇନାହାନ୍ତି । କିନ୍ତୁ ତାଙ୍କ ମା’ କହିଛନ୍ତି ଯେ, ଆଲିୟା କାହାକୁ ହତ୍ୟା କରିବା ଅସମ୍ଭବ । ସେ ସମସ୍ତଙ୍କ ଯତ୍ନ ନେବାକୁ ଭଲ ପାଏ ଏବଂ ସାହାଯ୍ୟ କରିବାକୁ ସର୍ବଦା ଚେଷ୍ଟା କରେ । ଏହା ବ୍ୟତୀତ ଆଲିୟା ଏକ ଗୁରୁତର ରୋଗରେ ପୀଡ଼ିତ ଥିବା କଥା କହିଛନ୍ତି ତାଙ୍କ ମା’ । ମୃତ ଏଡଓ୍ବାର୍ଡଙ୍କ ମା’ କହିଛନ୍ତି ଯେ, ‘ତାଙ୍କ ପୁଅ ଏବଂ ଆଲିୟାଙ୍କ ମଧ୍ୟରେ ଗୋଟିଏ ବର୍ଷ ହେଲା କୌଣସି ସଂପର୍କ ନଥିଲା । ହେଲେ ଆଲିୟା ତାଙ୍କ ପୁଅ ସହ କଥା ହେବାକୁ ସବୁ ବେଳେ ଚାହୁଁଥିଲେ । ଏଡଓ୍ବାର୍ଡ ନିଜ ଗ୍ୟାରେଜ୍କୁ ଏକ ଆପାର୍ଟମେଣ୍ଟ ଭାବେ ଗଢ଼ି ତୋଳିବାକୁ ଲାଗିଥିଲା । ହେଲେ ଏବେ ଏଡଓ୍ବାର୍ଡ ଆଉ ନାହିଁ । ’
