ମେଲବର୍ଣ୍ଣ, ୨୨/୧୨: ବର୍ଡ଼ର-ଗାଭାସ୍କର ଟ୍ରଫିର ଚତୁର୍ଥ ଟେଷ୍ଟ (ବକ୍ସିଂ ଡେ’) ଆସନ୍ତା ୨୬ ତାରିଖରୁ ଆରମ୍ଭ ହେବ । ଏହି ମ୍ୟାଚ୍ ମେଲବର୍ଣ୍ଣ କ୍ରିକେଟ୍ ଗ୍ରାଉଣ୍ଡ୍ (ଏମ୍ସିଜି)ରେ ଖେଳାଯିବ । ଗତ ଗୁରବାର ଭାରତୀୟ ଦଳ ମେଲବର୍ଣ୍ଣରେ ପହଞ୍ଚି ଥିଲା । ଟିମ୍ ଇଣ୍ଡିଆ ଏମ୍ସିଜିରେ ଅଭ୍ୟାସ ଆରମ୍ଭ କରିଛି । ଦଳର ପ୍ରତ୍ୟେକ ଖେଳାଳି ଦୀର୍ଘ ସମୟ ଧରି ନେଟ୍ସରେ ଝାଳ ବୁହାଇଥିଲେ । ଚଳିତ ସିରିଜ ୧-୧ରେ ବରାବର ରହିଛି । ଫଳରେ ଏମ୍ସିଜିରେ ବିଜୟ ସହ ଉଭୟ ଦଳ ଅଗ୍ରଣୀ ହାସଲ ନେଇ ବ୍ୟାକୁଳ ରହିଛନ୍ତି ।
ଟିମ୍ ଇଣ୍ଡିଆ ଅଧିନାୟକ ରୋହିତ ଶର୍ମା ଓ ବିରାଟ କୋହଲି ନେଟ୍ସରେ ବ୍ୟାଟିଂ ତ୍ରୁଟି ସୁଧାରିବା ଉପରେ ଗୁରୁତ୍ୱ ଦେଇଥିଲେ । ବ୍ୟାଟିଂ କୋଚ୍ ଅଭିଷେକ ନାୟାର ଉଭୟଙ୍କୁ ବିଭିନ୍ନ ପରାମର୍ଶ ଦେଉଥିବା ଦେଖିବାକୁ ମିଳିଥିଲା । ରୋହିତ ପ୍ରଥମେ ସ୍ପିନରଙ୍କ ବିପକ୍ଷରେ ବ୍ୟାଟିଂ କରିଥିଲେ । ତାଙ୍କୁ ୱାସିଂଟନ୍ ସୁନ୍ଦର ଓ ରବୀନ୍ଦ୍ର ଜାଡ଼େଜା ବୋଲିଂ କରିଥିଲେ । ସ୍ପିନରଙ୍କ ବିପକ୍ଷରେ ରୋହିତ ଅଭ୍ୟାସ କରିଥିବାରୁ ଚତୁର୍ଥ ଟେଷ୍ଟରେ ମଧ୍ୟ ସେ ମଧ୍ୟକ୍ରମରେ ବ୍ୟାଟିଂ କରିବା ସ୍ପଷ୍ଟ ହୋଇଯାଇଛି । ସେହିପରି ଯଶସ୍ୱୀ ଜୈସ୍ୱାଲ ଓ ଶୁଭମନ ଗିଲ୍ ପେସ୍ ବୋଲରଙ୍କୁ ସାମ୍ନା କରିଥିଲେ । ରୋହିତ ଓ ନାୟାର ନେଟ୍ସ ପାଖରେ ରହି ଉଭୟଙ୍କ ବ୍ୟାଟିଂ ଦେଖିଥିଲେ । ଏହାପରେ ଗିଲ୍ ଓ ଜୈସ୍ୱାଲ ଥ୍ରୋଡାଉନ୍ରେ ଅଭ୍ୟାସ କରିଥିଲେ ।
କୋହଲିଙ୍କୁ ଅପେକ୍ଷା କରିଛି ରେକର୍ଡ଼: କୋହଲିଙ୍କ ନିକଟରେ କିମ୍ବଦନ୍ତୀ ବ୍ୟାଟର ସଚିନ ତେନ୍ଦୁଲକରଙ୍କ ନାମରେ ଥିବା ଆଉ ଏକ ରେକର୍ଡ଼ ଭଙ୍ଗ କରିବାର ସୁଯୋଗ ରହିଛି । ଏମ୍ସିଜିରେ ଭାରତୀୟ ବ୍ୟାଟର ଭାବେ ସଚିନ ସର୍ବାଧିକ ୪୪୯ରନ୍ (୫ଟି ଟେଷ୍ଟ) ସଂଗ୍ରହ କରିଛନ୍ତି । କୋହଲି ଇତିମଧ୍ୟରେ ୩ଟି ଟେଷ୍ଟ ଖେଳି ୩୧୬ରନ୍ କରିଛନ୍ତି । ସେ ଆଉ ୧୩୩ ରନ୍ କଲେ ସଚିନଙ୍କୁ ଟପି ପାରିବେ । ଅନ୍ୟ ପଟରେ ଅଜିଙ୍କ୍ୟ ରାହାଣେ ୩ଟି ଟେଷ୍ଟରୁ ୩୬୯ରନ୍ ସହ ଦ୍ୱିତୀୟରେ ରହିଛନ୍ତି । ଚଳିତ ସିରିଜରେ କୋହଲି ପ୍ରଥମ ୩ଟି ଟେଷ୍ଟରେ ମୋଟ ୧୨୬ରନ୍ ସଂଗ୍ରହ କରିଛନ୍ତି । ସେଥିମଧ୍ୟରେ ଗୋଟିଏ ଶତକ ସାମିଲ ରହିଛି । ଏମ୍ସିଜିରେ ସେ ଫର୍ମକୁ ଫେରିବା ନେଇ କ୍ରିକେଟ୍ପ୍ରେମୀ ଆଶା ବାନ୍ଧିଛନ୍ତି ।
ପଡ଼ିଆରେ ପଶିଲେ ଅଷ୍ଟ୍ରେଲିଆ ଗଣମାଧ୍ୟମ ପ୍ରତିନିଧି: ଭାରତୀୟ ଦଳର ଅଭ୍ୟାସ ପରେ ବିସିସିଆଇ ପକ୍ଷରୁ ଏମ୍ସିଜିରେ ଏକ ସାମ୍ବାଦିକ ସମ୍ମିଳନୀର ଆୟୋଜନ କରାଯାଇଥିଲା। ଏଥିରେ କେବଳ ଭାରତୀୟ ଗଣମାଧ୍ୟମ ପ୍ରତିନିଧିଙ୍କୁ ଅନୁମତି ଦିଆଯାଇଥିଲା । ମାତ୍ର ଅଷ୍ଟ୍ରେଲିଆର କିଛି ଗଣମାଧ୍ୟମ ପ୍ରତିନିଧି ଅନୁମତି ନଥିଲେ ମଧ୍ୟ ପଡ଼ିଆରେ ପଶି ଜାଡେଜାଙ୍କୁ ପ୍ରଶ୍ନ ପଚାରିଥିଲେ । ଜାଡେଜା ହିନ୍ଦୀ ଭାଷାରେ ଉତ୍ତର ରଖିଥିଲେ ଏବଂ ଅଷ୍ଟ୍ରେଲିଆ ଗଣମାଧ୍ୟମ ପ୍ରତିନିଧି ଅସନ୍ତୋଷ ବ୍ୟକ୍ତ କରିଥିଲେ ।
