ପାଟନା,୦୫/୦୭: ବିହାର ରାଜଧାନୀ ପାଟନାରେ ଚାଞ୍ଚଲ୍ୟ । ଗାନ୍ଧୀ ମୈଦାନ ଥାନା ଅଞ୍ଚଳରେ ପ୍ରତିଷ୍ଠିତ ବ୍ୟବସାୟୀ ତଥା ବିଜେପି ନେତା ଗୋପାଳ ଖେମକାଙ୍କୁ ଗୁଳି କରି ହତ୍ୟା କରାଯାଇଛି । ଶୁକ୍ରବାର ବିଳମ୍ବିତ ରାତିରେ ଦୁର୍ବୃତ୍ତ ଏହି ହତ୍ୟାକାଣ୍ଡ ଘଟାଇଛନ୍ତି । ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଆଲୋଡନ ସୃଷ୍ଟି ହୋଇଛି । ୬ ବର୍ଷ ପୂର୍ବେ ତାଙ୍କ ପୁଅଙ୍କୁ ମଧ୍ୟ ହତ୍ୟା କରାଯାଇଥିଲା ।
କାର୍ରୁ ଓହ୍ଲାଇବାବେଳେ ଗୁଳିମାଡ଼- ଶୁକ୍ରବାର ରାତି ୧୧ଟାରେ ଗାନ୍ଧୀ ମୈଦାନ ଥାନା ଅଞ୍ଚଳରେ ପ୍ରତିଷ୍ଠିତ ବ୍ୟବସାୟୀ, ମଗଧ ଡାକ୍ତରଖାନା ମାଲିକ ତଥା ବିଜେପି ନେତା ଗୋପାଳ ଖେମକାଙ୍କୁ ଗୁଳି କରିଥିଲେ ଦୁର୍ବୃତ୍ତ । ପାଟନାରେ ଥିବା ତାଙ୍କ ଘର ପାଖ ହୋଟେଲରୁ କାର୍ରୁ ଓହ୍ଲାଇବା ସମୟରେ ତାଙ୍କ ମୁଣ୍ଡକୁ ଗୁଳିମାଡ଼ ହୋଇଥିଲା । ଘଟଣାସ୍ଥଳରେ ହିଁ ଟଳିପଡିଥିଲେ ଗୋପାଳ ଖେମକା । କ୍ରାଇମ ସ୍ପଟରୁ ଗୁଳି ଜବତ ହୋଇଛି । ପୁଲିସ ମୃତଦେହ ଉଦ୍ଧାର କରି ପୋଷ୍ଟମର୍ଟମ ପାଇଁ ପଠାଇଛି । ହତ୍ୟାକାଣ୍ଡର କାରଣ ଜଣାପଡିନାହିଁ । ହତ୍ୟା ଘଟଣାର ତଦନ୍ତ ନେଇ ଏସଆଇଟ୍ ଗଠନ ହୋଇଛି । ସିଟି ସେଣ୍ଟ୍ରୋଲ ଏସ୍ପି ଏସ୍ଆଇଟିର ନେତୃତ୍ୱ ନେବେ । ଏ ନେଇ ସୂଚନା ଦେଇଛନ୍ତି ଡିଜିପି ବିନୟ କୁମାର ।
୬ ବର୍ଷ ତଳେ ପୁଅ ଏବେ ବାପା- ଖେମକା ପରିବାରରେ ଏହା ଦ୍ୱିତୀୟ ହତ୍ୟାକାଣ୍ଡ । ୨୦୧୮ରେ ଅର୍ଥାତ ୬ ବର୍ଷ ତଳେ ଗୋପାଳ ଖେମାନଙ୍କ ପୁଅ ଗୁଞ୍ଜନ ଖେମକାଙ୍କୁ ଗୁଳି କରି ହତ୍ୟା କରାଯାଇଥିଲା । ପୁଅ ହତ୍ୟାର ନ୍ୟାୟ ମିଳିନଥିବାବେଳେ ବାପାଙ୍କୁ ଗୁଳିକରି ହତ୍ୟା କରିଛନ୍ତି ଦୁର୍ବୃତ୍ତ ।
