ନୂଆଦିଲ୍ଲୀ, ୦୪/୦୬ : ଚୀନ୍ର ସାଙ୍ଘାତିକ ଷଡ଼ଯନ୍ତ୍ର। ଆମେରିକାରେ ଖେଳାଇବାକୁ ଚାହୁଁଛି କୃଷି ଆତଙ୍କବାଦ ! ଜୈବିକ ଜୀବାଣୁ ପ୍ରୟୋଗ କରି ଆତଙ୍କ ଖେଳାଇବାକୁ ଚାହୁଁଛି ଆତଙ୍କୀସ୍ତାନର ଭାଇ ଚୀନ। ଆମେରିକାରୁ ସାଙ୍ଘାତିକ ବାୟୋ ଅସ୍ତ୍ର ସହ ଧରାପଡ଼ିଲେ ଚୀନ ନାଗରିକ। ଫସଲ ନଷ୍ଟ କରିବାକୁ କରୁଥିଲେ ବଡ଼ ପ୍ଲାନିଂ। ଏବେ ଏଫବିଆଇ ରାଡାର୍ରେ ଚୀନ ପ୍ରେମୀଯୁଗଳ। ଏନେଇ ସୂଚନା ଦେଇଛନ୍ତି ଏଫବିଆଇ ନିର୍ଦ୍ଦେଶକ କାଶ ପଟେଲ।
ଏଫବିଆଇ ଅଧିକାରୀଙ୍କ ସୂଚନା ଅନୁଯାୟୀ, ୨୦୨୪ ଜୁଲାଇ ମାସରେ ଜୁନୟୋଙ୍ଗ ଲିୟୁ ନାମକ ଜଣେ ଚୀନ ଯୁବକ ଏକ ବିଷାକ୍ତ କବକ ଆଣି ଆମେରିକା ଆସିଥିଲେ। ଡେଟ୍ରୋଏଟ୍ ବିମାନ ବନ୍ଦରରେ ତାଙ୍କ ବ୍ୟାଗ୍ରୁ ଏହି କବକ ଜବତ ହୋଇଥିଲା। ପଚରାଉଚରାରୁ ଜଣାପଡ଼ିଥିଲା ଯେ, ସେ ଏହାକୁ ମିଶିଗନ ୟୁନିଭରସିଟିର ଏକ ପ୍ରୟୋଗଶାଳାରେ କାମ କରୁଥିବା ତାଙ୍କ ପ୍ରେମିକା ୟୁନକିଙ୍ଗ ଜିୟାନଙ୍କୁ ଦେବାକୁ ଆଣିଥିଲେ। ଏହାପରେ ଲିୟୁଙ୍କୁ ବିମାନ ବନ୍ଦରରୁ ଚୀନ ପଠାଇ ଦିଆଯାଇଥିଲା। ଏଫବିଆଇ ମାମଲାର ତଦନ୍ତ ଆରମ୍ଭ କରିଥିଲା। ଦୁଇ ପ୍ରେମୀଯୁଗଳଙ୍କ ବିରୋଧରେ ଷଡ଼ଯନ୍ତ୍ର, ଜୀବାଣୁ ତସ୍କରୀ, ମିଥ୍ୟା ବୟାନ ଏବଂ ଫର୍ଜି ଭିସା ଅଭିଯୋଗ ଆଣିଥିଲା। ଏହି ମାମଲାର ତଦନ୍ତ ବେଳେ ସାଙ୍ଘାତିକ ତଥ୍ୟ ସାମ୍ନାକୁ ଆସିଥିଲା। ଉକ୍ତ ମହିଳା ଜଣଙ୍କ ଚୀନର କମ୍ୟୁନିଷ୍ଟ ପାର୍ଟି ସହ ଜଡ଼ିତ ଥିଲେ। ଏହି ଜୀବାଣୁ ଉପରେ କାମ କରିବାକୁ ଚୀନ ସରକାର ଫଣ୍ଡିଂ ଦେଉଥିଲେ। ଖାଲି ସେତିକି ନୁହେଁ ଲିୟୁଙ୍କ ଫୋନରୁ ଏକ ମେସେଜ୍ ମିଳିଥିଲା। ଯାହାର ଶୀର୍ଷକ ଥିଲା ଜଳବାୟୁ ପରିବର୍ତ୍ତନ ପରିସ୍ଥିତିରେ ପାଦପ ରୋଗଜନିତ ଯୁଦ୍ଧ। ତେଣୁ ଚୀନର ଏହା ସମ୍ଭାବ୍ୟ କୃଷି ଆତଙ୍କବାଦ ଅସ୍ତ୍ର ବୋଲି ସନ୍ଦେହ ବଢିଛି। ସେପଟେ ଚୀନ୍ ସରକାର ଆମେରିକୀୟ ପ୍ରତିଷ୍ଠାନଗୁଡ଼ିକରେ ଅନୁପ୍ରବେଶ କରିବାକୁ ଏବଂ ଖାଦ୍ୟ ଯୋଗାଣକୁ ପ୍ରଭାବିତ କରିବାକୁ ତାର ଏଜେଣ୍ଟ ଏବଂ ଗବେଷକମାନଙ୍କୁ ନିୟୋଜିତ କରୁଥିବା ନେଇ ଏଫବିଆଇ ନିର୍ଦ୍ଦେଶକ ଚେତାବନୀ ଦେଇଛନ୍ତି।
ଏହି ଜୀବାଣୁର ନାମ ଫ୍ୟୁଜେରିୟମ ଗ୍ରେମିନିରମ୍। ଏହା ଗହମ, ମକା ଏବଂ ଧାନ ଫସଲରେ ହେଡ ବ୍ଲାଇଟ୍ ରୋଗ ସୃଷ୍ଟି କରିପାରେ। ଏହା ମଣିଷ ଏବଂ ଜୀବଜନ୍ତୁଙ୍କ ମଧ୍ୟରେ ବି ରୋଗ ସୃଷ୍ଟି କରିପାରେ। ଏହି ଜୀବାଣୁ ବ୍ୟାପିଲେ ପ୍ରତିବର୍ଷ ଅରବ ଡଲାରର ଆର୍ଥିକ କ୍ଷତି ହେବ। ଯାହାକି ଆମେରିକା ନାଗରିକ ଏବଂ ଅର୍ଥବ୍ୟବସ୍ଥା ଉପରେ ଗମ୍ଭୀର ପ୍ରଭାବ ପକାଇବ। ତେବେ ଚୀନର ଏଭଳି ଷଡ଼ଜନ୍ତ୍ରର ଖୁଲାସା ହେବା ପରେ ଏବେ ଆମେରିକାର ରାଷ୍ଟ୍ରୀୟ ସୁରକ୍ଷା ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି। ଜିୟାନକୁ ଜେଲ୍ ପଠାଇ ଦିଆଯାଇଛି।
