ଭଦ୍ରକ, ୨୭/୦୪: ବେଆଇନ୍ ଗୋରୁ ଚାଲାଣ ବେଳେ ଭାରସ୍ୟାମ ହରାଇ ପିକଅପ୍ ଗାଡ଼ି ଦୁର୍ଘଟଣା ଗ୍ରସ୍ତ । ଏହି ଦୁର୍ଘଟଣାରେ ୩ ଟି ଗୋରୁ ପ୍ରାଣ ହରାଇଥିବା ବେଳେ ଗାଡ଼ିର ଡ୍ରାଇଭର ଗୁରୁତର ହୋଇଛନ୍ତି । ତାଙ୍କପୁ ଗୁରୁତର ଅବସ୍ଥାରେ ଭଦ୍ରକ ମେଡିକାଲକୁ ସ୍ଥାନାନ୍ତର କରାଯାଇଛି । ଭଦ୍ରକ ଜିଲ୍ଲା ଅସୁରାଳି ବଜ଼ାର ନିକଟରେ ଏଭଳି ଘଟଣା ଘଟିଛି ।
ସୂଚନା ମୁତାବକ, ରବିବାର ଭୋରୁ ଦୁଇଟି ପିକଅପ୍ ଭ୍ୟାନ୍ ୫୦ରୁ ଉର୍ଦ୍ଧ୍ୱ ଗୋରୁ ନେଇ ଦ୍ରୁତ ଗତିରେ ଯାଉଥିବା ବେଳେ ଭାରସ୍ୟାମ ହରାଇ ଗୋଟିଏ ଗାଡ଼ି ଅସୁରାଳି ବଜାର ନିକଟରେ ଦୁର୍ଘଟଣା ଗ୍ରସ୍ତ ହୋଇଥିଲା । ଦୁର୍ଘଟଣାରେ ତିନୋଟି ଗୋରୁ ମୃତ୍ୟୁ ବରଣ କରିଥିବା ବେଳେ ଜଣେ ପିକଅପ୍ ଡ୍ରାଇଭର ଗୁରୁତର ଅବସ୍ଥାରେ ଭଦ୍ରକ ମେଡିକାଲକୁ ସ୍ଥାନାନ୍ତର ହୋଇଛନ୍ତି । ଖବର ପାଇ ଧାମନଗର ଅଗ୍ନିଶମ ବାହିନୀର ଅଧିକାରୀ ଓ ଷ୍ଟାଫ୍ ମାନେ ଆସି ଗୋରୁ ଗୁଡିକୁ ଉଦ୍ଧାର କରିଛନ୍ତି । ଘଟଣା ସମ୍ପର୍କରେ ଖବର ପାଇ ଧୁଷୁରୀ ପୋଲିସ ଦୁର୍ଘଟଣା ସ୍ଥଳରେ ପହଞ୍ଚି ତଦନ୍ତ ଚଳାଇଛି।
