ସରକାରୀ ଚାକିରି କ୍ଷେତ୍ରରେ ବଦଳି ହେବା ବା କରାଯିବା ଏକ ସୁସ୍ଥ ପରମ୍ପରା । ଏହାଦ୍ୱାରା ସରକାରୀ ଦପ୍ତରଗୁଡ଼ିକରେ କାର୍ଯ୍ୟଧାରା ସ୍ୱଚ୍ଛ ଓ ଗତିଶୀଳ ହୋଇଥାଏ । ଆର୍ଥିକ ଅନିୟମିତତା ହେବାର ଅବକାଶ ନଥାଏ । କର୍ମଚାରୀଗଣ ନିଜର ବ୍ୟକ୍ତିଗତ କାର୍ଯ୍ୟ ପରିପୂରଣ ପାଇଁ ସମୟ ପାଇନଥାନ୍ତି । ନିଜ ପଦମର୍ଯ୍ୟାଦାର ଅପବ୍ୟବହାର ସୁଯୋଗ ସୃଷ୍ଟିହେବା ପୂର୍ବରୁ ତାଙ୍କର ବଦଳି ହୋଇସାରିଥାଏ ।
ଋତୁ ଫେରବଦଳ ଭଳି ବଦଳି ଋତୁ ସରକାରୀ ବା ସାଂଗଠନିକ ପ୍ରାଶାସନିକ ପ୍ରଣାଳୀରେ ଗୋଟିଏ ଭାରି ପରିଚିତ ବାର୍ଷିକ ଘଟଣା । ଆମ ଓଡ଼ିଶାରେ ଅପ୍ରେଲରେ ଏ ଋତୁ ଆସେ, ଆଉ ମେ’ ଦେଇ ଜୁନ ମାସଯାଏଁ ଚାଲେ! ଋତୁଚକ୍ର ଯେପରି ସାରାଜଗତ ପାଇଁ କଲ୍ୟାଣକାରୀ, ଏ ବଦଳି ଋତୁ ସେପରି ଗଣତାନ୍ତ୍ରିକ ରାଷ୍ଟ୍ରରେ ପ୍ରାଶାସନିକ ସଂରଚନାରେ ପରିବର୍ତ୍ତନ ଆଣି ରାଷ୍ଟ୍ର ଓ ରାଜ୍ୟ ପାଇଁ କଲ୍ୟାଣକାରୀ ହୋଇଥାଏ ।
ଓଡ଼ିଶାରେ ସରକାରୀ କର୍ମଚାରୀଙ୍କ ବଦଳି ବି ମୁଖ୍ୟତଃ ବର୍ଷରେ ଥରେ ହୋଇଥାଏ । ଯେଉଁ କର୍ମଚାରୀ ବା ଅଧିକାରୀଙ୍କ କାର୍ଯ୍ୟକାଳ ଗୋଟିଏ ସ୍ଥାନରେ ବା ନିର୍ଦ୍ଦିଷ୍ଟ ସିଟ୍ରେ ତିନିବର୍ଷରୁ ଅଧିକ ସମୟ ଅତିକ୍ରାନ୍ତ ହୋଇଯାଇଥାଏ ତାଙ୍କୁ ଅନ୍ୟତ୍ର ବଦଳି କରାଯାଇଥାଏ । ଏଥିପାଇଁ ସରକାରଙ୍କ ଏକ ବିସ୍ତୃତ ନିୟମାବଳୀ ରହିଛି । ତାହାକୁ ଅନୁସରଣ କରି ପ୍ରତିବର୍ଷ ବଦଳି କାର୍ଯ୍ୟ ସମାପନ କରାଯାଇଥାଏ ।
ବଦଳି କହିଲେ ସାଧାରଣ ଭାଷାରେ କର୍ମଚାରୀଙ୍କ ଫେରବଦଳକୁ ବୁଝାଇଥାଏ- ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ବା ଗୋଟିଏ ବିଭାଗରୁ ଆଉ ଗୋଟିଏ ବିଭାଗକୁ । ଏହି ସ୍ଥାନାନ୍ତରଣ ସ୍ୱାଭାବିକ ଭାବେ ଆବଶ୍ୟକତା ଦୃଷ୍ଟିରୁ କରାଯାଇଥାଏ । ସରକାରୀ ବ୍ୟବସ୍ଥାରେ ଏହା ଏକ ପ୍ରାଶାସନିକ ପ୍ରକ୍ରିୟା । ଏହାକୁ ସରକାର ଏକ ନିୟମିତ କାର୍ଯ୍ୟର ଅଂଶ ରୂପେ ଗ୍ରହଣ କରି କାର୍ଯ୍ୟକାରୀ କରିଥାନ୍ତି । କାହିଁକିନା, ନିୟମିତ ସମୟ ବ୍ୟବଧାନରେ ବଦଳି, କର୍ମଚାରୀଙ୍କ କାର୍ଯ୍ୟଦକ୍ଷତା ବୃଦ୍ଧି କରିବା ସହିତ ସେମାନେ ବହୁ ଅଭିଜ୍ଞତା ହାସଲ କରିବାରେ ସୁଯୋଗ ସୃଷ୍ଟି କରିଥାଏ । ଏହାଦ୍ୱାରା ଉଭୟ ଜନସାଧାରଣ ଓ ସରକାର ସୁଫଳ ପାଇଥାନ୍ତି । ଗୋଟିଏ ନିର୍ଦ୍ଦିଷ୍ଟ ପରିବେଶ, ନିର୍ଦ୍ଦିଷ୍ଟ ସ୍ଥାନ, ନିର୍ଦ୍ଦିଷ୍ଟ ଆସନରେ ଲଗାତାର କାମ କଲେ ଜଣେ ଅଧିକାରୀ ବା କର୍ମଚାରୀଙ୍କ ଦାୟିତ୍ୱ ନିର୍ବାହ ପ୍ରତି ଆଗ୍ରହ କମିଯାଇଥାଏ ଓ ତାର କର୍ମନିପୁଣତାରେ ଅବକ୍ଷୟ ବି ଘଟିଥାଏ । କର୍ମଚାରୀ ଜଣକ ଗୋଟିଏ ସ୍ଥାନ ବା ବିଭାଗରେ ଦୀର୍ଘଦିନ ରହିବା ଦ୍ୱାରା ପ୍ରଭାବଶାଳୀ ହୋଇଯାଇ ନିଜ ପଦ ମର୍ଯ୍ୟାଦାର ଅପବ୍ୟବହାର କରିବା ଓ ମନମାନି ଆଚରଣ ଦେଖାଇବାର ସମ୍ଭାବନାକୁ ଏଡ଼ାଇ ଦିଆଯାଇନପାରେ! ଗୋଟିଏ ନିର୍ଦ୍ଦିଷ୍ଟ ଜାଗା ଓ ନିର୍ଦ୍ଦିଷ୍ଟ କର୍ମରେ ବାହାଲ ଥିବା ବ୍ୟକ୍ତି ଜଣକ କାର୍ଯ୍ୟରେ ବା ଚିନ୍ତାରେ କିଛି ସୃଜନଶୀଳତା ଓ ନୂତନତା ପ୍ରଦର୍ଶନ କରିପାରେନାହିଁ । ଫଳରେ ବ୍ୟବସ୍ଥାଟିରେ ଗୋଟେ ସ୍ଥାଣୁତ୍ୱ ଆସିଯାଏ । ଏହା ଉଭୟ ସରକାର ଓ ଜନସାଧାରଣଙ୍କର ଘୋର କ୍ଷତି ପହଞ୍ଚାଇଥାଏ । ଏହି ସମସ୍ୟା ଆଖିରେ ରଖି ଶ୍ରମ ଆଇନରେ ବଦଳି ବ୍ୟବସ୍ଥାକୁ ଅନ୍ତର୍ଭୁକ୍ତ କରାଯାଇଛି ।
ନିୟମିତ ସମୟ ବ୍ୟବଧାନରେ ଜଣେ କର୍ମଚାରୀର ସ୍ଥାନାନ୍ତରଣ ବା କାର୍ଯ୍ୟାନ୍ତରର ବିଧି ଏଥିରେ ସନ୍ନିବିଷ୍ଟ କରାଯାଇଛି । ଆଜି ଏ ବଦଳି ଋତୁ ଆସିଲେ ଏସବୁ ମହତ ଓ ମଙ୍ଗଳକାରୀ ଉଦ୍ଦେଶ୍ୟ କ’ଣ ଅମଳ କରିହେଉଛି ସତରେ! ଗତ କେତେବର୍ଷ ଧରି ଏହି ବଦଳିକୁ ନେଇ ଶାସନ ବ୍ୟବସ୍ଥାରେ ନାନାଦି ସମସ୍ୟା ସୃଷ୍ଟିହେବା ଦେଖିବାକୁ ମିଳୁଛି । କିଛି ଅସାଧୁ କର୍ମଚାରୀ ସରକାରଙ୍କ ଏହି ବଦଳି ନିୟମ ନମାନିବାକୁ ନାନାଦି ଫନ୍ଦିଫିକର କରିବା, ଲାଞ୍ଚ ମିଛ ଦେବା ଓ ଧରାଧରି କରିବା ଭଳି ଅସାଧୁ ଉପାୟ ଅବଲମ୍ବନ କରି ସରକାରଙ୍କ ଏହି ପ୍ରକ୍ରିୟାଟିକୁ ଗୋଟିଏ ଉପହସିତ ଖେଳରେ ପରିଣତ କରି ଦେଇଛନ୍ତି! ଫଳରେ ଶାସନ ବ୍ୟବସ୍ଥାରେ ଗୋଟିଏ କୁପରମ୍ପରା ସୃଷ୍ଟି ହୋଇଯାଇଛି । ଏଥିରେ କିଛି ସଚ୍ଚୋଟ ଅଧିକାରୀ ଓ ନିମ୍ନ କର୍ମଚାରୀ ବଳି ପଡୁଥିବାବେଳେ କିଛି ବଡ଼ବଡ଼ିଆ ଓ ମାଧ୍ୟମ ସାଜିଥିବା ଦଲାଲଙ୍କ ହାତଚିକ୍କଣ ହୋଇପାରୁଛି । ବଦଳି କ୍ଷେତ୍ରରେ ଏପରି ଅନିୟମିତତା ଦେଖି ଓଡ଼ିଶାର ମୁଖ୍ୟ ଶାସନ ସଚିବ ଏକ ମାର୍ଗଦର୍ଶିକା ଜାରି କରି ଏଥିରେ ସୁଧାର ଆଣିବାକୁ ଉଦ୍ୟମ କରିଥିଲେ ।
ସେହି ମାର୍ଗଦର୍ଶିକାରେ କୁହାଯାଇଥିଲା ଯେ, ନିୟମ ଆଧାରିତ ବଦଳିକୁ କର୍ମଚାରୀମାନେ ଯଥାସାଧ୍ୟ ମାନିବେ ଓ ଏହାକୁ ଉଲ୍ଲଙ୍ଘନ କରିବେନାହିଁ । ମୁଖ୍ୟ ସଚିବଙ୍କ ଚିଠି ନଂ.୩୩୯୩୯ ତା ୧୧/୧୧/୨୦୨୪ରେ ମାର୍ଗଦର୍ଶିକା ଜାରି କରି କ୍ଷୋଭ ପ୍ରକାଶ କରିଛନ୍ତି ଯେ, ସରକାରଙ୍କ ଦୃଷ୍ଟିକୁ ଆସିଛି କେତେକ ସରକାରୀ କର୍ମଚାରୀ ବଦଳି ଓ ପୋଷ୍ଟିଂରେ ଉପରିସ୍ଥ ଅଧିକାରୀଙ୍କୁ ପ୍ରଭାବିତ କରିବାକୁ ଚେଷ୍ଟା କରୁଛନ୍ତି ଓ ନିଜ ମନ ମୁତାବକ ଜାଗାରେ ରହିବାକୁ ଚାପ ପକାଉଛନ୍ତି । ଏହି କାର୍ଯ୍ୟ ସରକାରୀ କର୍ମଚାରୀଙ୍କ ବ୍ୟବହାର ନିୟମାବଳୀ ୧୯୫୯କୁ ଉଲ୍ଲଙ୍ଘନ କରୁଅଛି । ସେଥିପାଇଁ କୌଣସି କର୍ମଚାରୀ ନିଜର ପୋଷ୍ଟିଂ, ପଦୋନ୍ନତି ବା ବଦଳିରେ ଉପରିସ୍ଥ ଅଫିସରଙ୍କ ଉପରେ ଚାପ ପକାଇବା ବା ନାନାଦି ପ୍ରଲୋଭନ ଦେଖାଇବା ଆଇନତଃ ଅପରାଧ । ଏହା ଓଡ଼ିଶା ସରକାରଙ୍କ ସେବା ନିୟମ-୨୩ ଅନୁଯାୟୀ ଏକ ଦଣ୍ଡନୀୟ କାର୍ଯ୍ୟ ଅଟେ ।
ତାଙ୍କ ମାର୍ଗଦର୍ଶିକା ଏହା ମଧ୍ୟ ଦର୍ଶାଇ ଦେଇଛି ଯେ, ସରକାରଙ୍କ ଦ୍ୱାରା ହେଉଥିବା ବଦଳି, ପଦୋନ୍ନତି ଓ ପୋଷ୍ଟିଂ ଅତ୍ୟନ୍ତ ସ୍ୱଚ୍ଛ ଓ ମେଧା ଭିତ୍ତିରେ ହେଉଥିବାରୁ ଏଥିରେ କୌଣସି ପ୍ରକାର ଅନୁପ୍ରବେଶ ଓ ଏଥିପ୍ରତି ଆଗ୍ରହ ପ୍ରକାଶ କରିବା ଅନୁଚିତ । ଏହି ବ୍ୟବହାରକୁ ସମ୍ପୃକ୍ତ କର୍ମଚାରୀଙ୍କ ଅତ୍ୟନ୍ତ ଅସଦାଚରଣ ଭାବେ ଗ୍ରହଣ କରାଯିବ, ତେଣୁ ସମସ୍ତ କର୍ମଚାରୀ ଚାକିରି କାଳ ମଧ୍ୟରେ ଏଭଳି ଉଦ୍ୟମରୁ ବିରତ ରହିବା ଉଚିତ । ଏହି ଆଦେଶନାମା ରାଜ୍ୟ ପ୍ରଧାନ କାର୍ଯ୍ୟାଳୟ, ଜିଲ୍ଲାପାଳ କାର୍ଯ୍ୟାଳୟଗୁଡ଼ିକରେ କଡ଼ାକଡ଼ି ପାଳନ କରାଯିବା ଉଚିତ୍ । ଏହି ନିୟମ ଉଲ୍ଲଙ୍ଘନ କଲେ ବା ସେପରି ଚେଷ୍ଟା କଲେ ତାହା ଦଣ୍ଡନୀୟ ବୋଲି ବିଚାର କରାଯିବ । ଯେଉଁ ବ୍ୟକ୍ତି ବା ଦଲାଲ କର୍ମଚାରୀଙ୍କ ବଦଳି ବାତିଲ ପାଇଁ ଲାଞ୍ଚ ମିଛ ବା ଧରାଧରି କରିବେ ସେମାନଙ୍କୁ କଠୋର ଦଣ୍ଡରେ ଦଣ୍ଡିତ କରାଯିବ ।
ମାତ୍ର ଦୁଃଖର ବିଷୟ ଏହି ଯେ, ମୁଖ୍ୟ ସଚିବଙ୍କ ଏହି ଆଦେଶନାମାକୁ ମଧ୍ୟ ଅମାନ୍ୟ କରାଯାଉଥିବା ଦେଖିବାକୁ ମିଳୁଛି । ଫଳରେ ରାଜ୍ୟ ସରକାରଙ୍କ ବଦଳି ବ୍ୟବସ୍ଥା ଏକ କିମ୍ଭୂତ କିମାକାର ରୂପ ଧାରଣ କରିଛି । ଦଳେ ଟାଉକା, ଧୂର୍ତ୍ତ କର୍ମଚାରୀ ନିଜର ଅପବୁଦ୍ଧି ଦ୍ୱାରା ବର୍ଷ ବର୍ଷ ଧରି ଗୋଟିଏ ଜାଗାରେ ଗାଦି ମାଡ଼ିବସିଥିବା ବେଳେ ଦକ୍ଷ ଓ ସାଧୁ କର୍ମଚାରୀମାନେ ଦଣ୍ଡିତ ହେଉଛନ୍ତି । ଯେଉଁ ବଦଳି ପ୍ରକ୍ରିୟା କାର୍ଯ୍ୟଦକ୍ଷତା ବୃଦ୍ଧିପାଇଁ ଉଦ୍ଦିଷ୍ଟ ତାହା ଏକ ପ୍ରହସନରେ ପରିଣତ ହୋଇଯାଇଛି, ଶାସନ କାର୍ଯ୍ୟରେ ସ୍ଥାଣୁତ୍ୱ ସ୍ୱାଭାବିକ ହୋଇଯାଇଛି ।
ସରକାରୀ ଚାକିରି କ୍ଷେତ୍ରରେ ବଦଳି ହେବା ବା କରାଯିବା ଏକ ସୁସ୍ଥ ପରମ୍ପରା । ଏହାଦ୍ୱାରା ସରକାରୀ ଦପ୍ତରଗୁଡ଼ିକରେ କାର୍ଯ୍ୟଧାରା ସ୍ୱଚ୍ଛ ଓ ଗତିଶୀଳ ହୋଇଥାଏ । ଆର୍ଥିକ ଅନିୟମିତତା ହେବାର ଅବକାଶ ନଥାଏ । କର୍ମଚାରୀଗଣ ନିଜର ବ୍ୟକ୍ତିଗତ କାର୍ଯ୍ୟ ପରିପୂରଣ ପାଇଁ ସମୟ ପାଇନଥାନ୍ତି । ନିଜ ପଦମର୍ଯ୍ୟାଦାର ଅପବ୍ୟବହାର ସୁଯୋଗ ସୃଷ୍ଟିହେବା ପୂର୍ବରୁ ତାଙ୍କର ବଦଳି ହୋଇସାରିଥାଏ । ଫଳରେ ଶାସନକଳରେ ଏକ ସ୍ୱଚ୍ଛ ଓ ଗଣତାନ୍ତ୍ରିକ ମୂଲ୍ୟବୋଧ ପ୍ରତିଷ୍ଠା ହୋଇପାରେ ଓ ଏହା ଆଗାମୀ ଦିନପାଇଁ ଉଦାହରଣ ପାଲଟିଯାଏ । ସାଧାରଣ ଜନତା ଏଥିରୁ ସୁଫଳ ପାଇବା ସହିତ ଦେଶ ବିକାଶ ଦିଗରେ ଅଗ୍ରସର ହୋଇଥାଏ । ଗୋଟିଏ ସାଧାରଣ ସାର୍ବଜନୀକ ନିଷ୍ପତ୍ତିରେ ବଦଳି କରାଯିବାଟା ଗୋଟିଏ ସୁଶାସନର ପ୍ରତୀକ । ବଦଳିକୁ ରୋକି ଦିଆଯିବା ବିକାଶର ପରିପନ୍ଥୀ । ସେଥିପାଇଁ ବର୍ଷ ବର୍ଷ ଧରି ବଦଳି ପ୍ରକ୍ରିୟା ଚାଲିଆସୁଅଛି । ଏହାକୁ ସରଳ ଓ ସଚଳ କରାଯିବାକୁ ନାନାଦି ବିଧିବିଧାନ ପ୍ରଣୟନ କରାଯାଉଛି । ମାତ୍ର ଦଳେ ଅସାଧୁ ବ୍ୟକ୍ତିବିଶେଷ ଓ କେତେକ ଅର୍ଥଲୋଭୀ ଦଲାଲ ଏହି ବ୍ୟବସ୍ଥାକୁ ନମାନିବାକୁ ଯତ୍ପରୋନାସ୍ତି ଉଦ୍ୟମ କରୁଛନ୍ତି ଓ ସମୟକ୍ରମେ ସଫଳ ବି ହେଉଛନ୍ତି । ଏହାଦ୍ୱାରା ଦେଶର ଗଣତାନ୍ତ୍ରିକ ମୂଲ୍ୟବୋଧରେ କାଳିମା ଲାଗୁଛି । ଶାସନ ବ୍ୟବସ୍ଥା ଓ ସରକାରଙ୍କ ପ୍ରତି ଲୋକଙ୍କର ବିଶ୍ୱାସ ହଟିଯାଉଛି । ଏଣୁ ବଦଳି ପ୍ରକ୍ରିୟାକୁ ସୁଚାରୁ ରୂପେ ପାଳନ କରାଯିବାର ଆବଶ୍ୟକତା ରହିଛି ।
ଅନେକ ବଦଳି ପ୍ରକ୍ରିୟାକୁ ମାନିବା ଚାକିରିର ଏକ ବୈଶିଷ୍ଟ୍ୟ ଭାବେ ଗ୍ରହଣ ନକରି ଗୋଟିଏ ଦଣ୍ଡ ବା ତିରସ୍କାର ବୋଲି ବି ଧରିଥାନ୍ତି । ଏମିତି ଭାବିବାରେ ଯଥେଷ୍ଟ କାରଣ ବି ରହିଛି । କାରଣ ସାମ୍ପ୍ରତିକ ଦଳୀୟ ରାଜନୀତିରେ ନିଜ ଦଳର ଅନୁଗାମୀ ଓ ଚାଟୁକାରଙ୍କ କଥାରେ ଦଳୀୟ ଏମ.ପି, ଏମ.ଏଲ.ଏ. ବଦଳିରେ ହସ୍ତକ୍ଷେପ କରିଥାନ୍ତି । ଏହାଫଳରେ ବଦଳି ଆଇନର ଉଲ୍ଲଙ୍ଘନ ହୁଏ ଓ ସାଧୁ କର୍ମଚାରୀମାନେ ହତୋତ୍ସାହିତ ହୁଅନ୍ତି । ଏହା ସରକାରଙ୍କ ବିକାଶ କାର୍ଯ୍ୟରେ ବାଧା ସୃଷ୍ଟିକରେ । ବଦଳି ପ୍ରକ୍ରିୟା ସ୍ୱଚ୍ଛ ଓ ନିୟମାନୁଯାୟୀ କରାଯିବାକୁ ରାଜନୈତିକ ନେତାମାନଙ୍କର ସହଯୋଗ ଓ ବଦଳିରେ ସମ୍ପୃକ୍ତ ନହେବା ବ୍ୟବସ୍ଥା ରହିବା ଉଚିତ । ହେଲେ ବିଡମ୍ବନା ଏହି ଯେ, ନେତାମାନଙ୍କର ଅନୀତି ଓ ଦୁର୍ନୀତିକୁ ସହାୟତା କରୁଥିବା କର୍ମଚାରୀଙ୍କୁ ପୁରସ୍କାର ସ୍ୱରୂପ ତାଙ୍କ ବଦଳିକୁ ସ୍ଥଗିତ କରାଯାଏ ବା ଟାଳି ଦିଆଯାଇଥାଏ ।
ବଦଳି ବା ସ୍ଥାନାନ୍ତର ପ୍ରକ୍ରିୟାରେ ଦୁର୍ନୀତିକୁ ରୋକିବା ପାଇଁ କେତେଗୁଡ଼ିଏ ପଦକ୍ଷେପ ନିଷ୍ଠାର ସହିତ ନିଆଗଲେ ଏ ସମସ୍ୟାର ସମାଧାନ ହୋଇପାରନ୍ତା । ସ୍ଥାନାନ୍ତର ନୀତି ଏବଂ ପ୍ରକ୍ରିୟାଗୁଡ଼ିକରେ କେବଳ ଅଧିକ ସ୍ୱଚ୍ଛତା ରହିଲେ ଏବଂ ତାହା ଜନସାଧାରଣଙ୍କ ଅନୁଧ୍ୟାନ ପାଇଁ ସୁଗମ କରାଗଲେ ଏଥିରେ ଦୁର୍ନୀତିକୁ ରୋକାଯାଇପାରିବ । ସ୍ଥାନାନ୍ତର ପ୍ରକ୍ରିୟା ତଦାରଖ କରିବା ପାଇଁ ସ୍ୱାଧୀନ ତଦାରଖ ସଂସ୍ଥାଟିଏ ପ୍ରତିଷ୍ଠା କରାଗଲେ ଏଥିରେ ନିରପେକ୍ଷତା ଏବଂ ଉତ୍ତରଦାୟିତ୍ୱ ସୁନିଶ୍ଚିତ କରାଯାଇପାରିବ । ଏଥିସହିତ ଲାଞ୍ଚ ଏବଂ କ୍ଷମତାର ଅପବ୍ୟବହାର ସମେତ ଦୁର୍ନୀତି ଆଦି ଅପରାଧ ପାଇଁ କଠୋର ଦଣ୍ଡ ଲାଗୁ କରାଗଲେ ଏହା ଏକ ପ୍ରତିରୋଧକ ଭାବରେ ନିଶ୍ଚୟ କାର୍ଯ୍ୟ କରିପାରିବ ।
ଏତଦ୍ଭିନ୍ନ ସରକାରୀ କର୍ମଚାରୀମାନଙ୍କ ମଧ୍ୟରେ ନୈତିକ ଆଚରଣ ଓ ସଚ୍ଚୋଟତାର ସଂସ୍କୃତିକୁ ପ୍ରୋତ୍ସାହିତ କରାଗଲେ ବଦଳିରେ ହେଉଥିବା ଦୁର୍ନୀତିକୁ ରୋକାଯାଇପାରିବ । ସର୍ବୋପରି ଏ କ୍ଷେତ୍ରରେ ହେଉଥିବା ଦୁର୍ନୀତି ସମ୍ପର୍କରେ ରିପୋର୍ଟ କରୁଥିବା ହ୍ୱିସଲ ବ୍ଲୋୟରମାନଙ୍କୁ ସୁରକ୍ଷା ପ୍ରଦାନ କରାଗଲେ ନିଶ୍ଚୟ ବର୍ଷକୁ ବର୍ଷ ଆସୁଥିବା ଏ ବଦଳି ଋତୁରେ ଆମେ ଉଚିତ ପଦକ୍ଷେପ ଗ୍ରହଣ କରିପାରିବା। ମନରେ ଏଇଠି ପ୍ରଶ୍ନ ଆସେ- ସତରେ କ’ଣ ଏମିତି ସବୁ ହୋଇପାରିବ? ହଁ ହୋଇପାରିବ । ଯଦି ଦୃଢ଼ ରାଜନୈତିକ ଇଚ୍ଛାଶକ୍ତି ଥାଏ । ଆଗରୁ ସମୟ ଓ ସରକାର କ'ଣ ଥିଲା ଭିନ୍ନ କଥା, ଆଜି ମୋହନ ସରକାର ଆସି ୱାର୍କ-ପାସ୍ବୁକ ଭଳି ଅନେକ ଅଭିନବ ସଂସ୍କାରମୂଳକ ପଦକ୍ଷେପ ନେଇସାରିଛନ୍ତି ।
ଏହି ବଦଳି ପ୍ରକ୍ରିୟାରେ ଯଦି ଦୃଢ଼ତାର ସହିତ ସେ ସେମିତି କିଛି ସଂସ୍କାର ଆଣନ୍ତେ, ତେବେ ଏ ଓଡ଼ିଶା ମାଟି ଓ ଏ ମାଟିର ମଣିଷମାନଙ୍କ ପାଇଁ ମଙ୍ଗଳକାରୀ ହୋଇପାରନ୍ତା ।
