ଭୁବନେଶ୍ୱର, ୦୬/୦୯: ପ୍ରେମୀଯୁଗଳ ନୟାଗଡ଼ସ୍ଥିତ ଗାଁକୁ ଯିବା ବେଳେ ଯୋଜନା କଲେ, ଓଡ଼ିଶାର କାଶ୍ମୀର ତଥା ଖୋର୍ଦ୍ଧାର ନିଷିଦ୍ଧ ଖଣି ଅଞ୍ଚଳ ‘ତାପଙ୍ଗ’ ବୁଲିବାକୁ ଯିବେ । ବୁଲିଲେ ବି । କିନ୍ତୁ କିଛି ସମୟ ପରେ ପ୍ରେମିକାର ଚରିତ୍ରକୁ ସନ୍ଦେହ କରି ଭୀଷଣ ଝଗଡ଼ା କଲା ପ୍ରେମିକ । ଆଉ ରାଗରେ ଜର୍ଜରିତ ହୋଇ କଳିଙ୍ଗ ମୁଣ୍ଡିଆର ଅକାତ କାତ ଖାଲକୁ ଠେଲି ମାରିଦେଲା । ଦୀର୍ଘ ୮ ମାସ ତଳେ ଘଟିଥିବା ଏଭଳି ଏକ ଚାଞ୍ଚଲ୍ୟକର ହତ୍ୟାକାଣ୍ଡର ପର୍ଦ୍ଦାଫାଶ କରିଛି ଭରତପୁର ଥାନା ପୁଲିସ । ମୃତକ ନିରୁପମା ପରିଡ଼ା ଓରଫ୍ ମିତା(୨୪)ଙ୍କ କଙ୍କାଳ କଳିଙ୍ଗ ମୁଣ୍ଡିଆର ଖାଲରୁ ଉଦ୍ଧାର କରିଛି ପୁଲିସ । ହତ୍ୟାକାରୀ ପ୍ରେମିକ ଦେବାଶିଷ ବିଶୋଇ(୨୮)କୁ ଗିରଫ କରିଛି । ଆଜି ତାକୁ କୋର୍ଟଚାଲାଣ କରାଯିବ । ୮ ମାସ ଧରି ଚୁପ୍ ବସିଥିବା କମିସନରେଟ୍ ପୁଲିସ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ନିର୍ଦ୍ଦେଶ ପାଇବା ପରେ ତତ୍ପରତା ଦେଖାଇଥିଲା । ଦେବାଶିଷକୁ ପଚରାଉଚରା କରିବା ପରେ ହତ୍ୟାକାଣ୍ଡର ପୂରା ଘଟଣାବଳୀ ପଦାକୁ ଆସିଛି ।
ଘଟଣାଟି ଏମିତି... ନୟାଗଡ଼ ରଣପୁର ଥାନା ଅଧୀନ ହରିପୁର ବାଉଁଶଗଡ଼ାର ଶରତ ପରିଡ଼ାଙ୍କ ଝିଅ ନିରୁପମା ପାତ୍ରପଡ଼ାର ଶ୍ରୀକ୍ଷେତ୍ର ଗ୍ରୀନଉଡ୍ ଆପାର୍ଟମେଣ୍ଟର ଏ-୧୦୮ ଫ୍ଲାଟ୍ରେ ରହୁଥିବା ସମରଜିତ୍ ଜେନାଙ୍କ ଘରେ ଘରୋଇ ସହାୟିକା ଭାବେ କାର୍ଯ୍ୟ କରୁଥିଲେ । ନୟାଗଡ଼ ରଣପୁର ଥାନା ମଝିଁଆଖଣ୍ଡ ଅଞ୍ଚଳର ଦେବାଶିଷ ମଧ୍ୟ ଇଲେକ୍ଟ୍ରିସିଆନ୍ ଭାବରେ ଭୁବନେଶ୍ୱରରେ କାମ କରୁଥିଲା । ତମାଣ୍ଡୋ ଅଞ୍ଚଳରେ ଭଡ଼ାରେ ରହୁଥିଲା । ନୟାଗଡ଼ରେ କଲେଜରେ ପଢ଼ିବା ବେଳଠୁ ଉଭୟଙ୍କ ଭିତରେ ପ୍ରେମ ସମ୍ପର୍କ ଗଢ଼ି ଉଠିଥିଲା । ଉଭୟେ ଭୁବନେଶ୍ୱରରେ ରହିବା ପରେ ଉଭୟ ସମ୍ପର୍କ ନିବିଡ଼ ହୋଇଥିଲା । କିନ୍ତୁ ନିରୁପମା ଅନ୍ୟ କାହାରିକୁ ପ୍ରେମ କରୁଛନ୍ତି ବୋଲି ଦେବାଶିଷ ସନ୍ଦେହ କରୁଥିଲା । ଯେଉଁଥିପାଇଁ ପ୍ରେମୀଯୁଗଳଙ୍କ ଭିତରେ ଅନେକଥର ଝଗଡ଼ା ହୋଇଛି ।
ଦେବାଶିଷ ପୁଲିସକୁ ଦେଇଥିବା ସୂଚନା ମୁତାବକ ଗତ ଜାନୁଆରୀ ୨୪ରେ ନିରୁପମା ଗାଁକୁ ବାହାରିଥିଲେ । ପାତ୍ରପଡ଼ା ଛକରୁ ତାଙ୍କୁ ବାଇକ୍ରେ ବସାଇ ଦେବାଶିଷ ନୟାଗଡ଼ ଅଭିମୁଖେ ବାହାରିଥିଲା । ଗାଁକୁ ଯିବା ପୂର୍ବରୁ ଉଭୟେ ତାପଙ୍ଗସ୍ଥିତ ଖଣିକୁ ବୁଲିବାକୁ ଯାଇଥିଲେ । ସେଠାରେ ପୁଣି ନିରୁପମାଙ୍କ ଚରିତ୍ରକୁ ନେଇ ଉଭୟଙ୍କ ଭିତରେ ଝଗଡ଼ା ହୋଇଥିଲା । ଦେବାଶିଷ ରାଗିଯାଇ ତାଙ୍କୁ ଖଣି ତଳକୁ ଠେଲି ଦେଇଥିଲା । ପ୍ରାୟ ୬୦ ଫୁଟ୍ ତଳକୁ ଖସିବା ପରେ ନିରୁପମାଙ୍କ ଶରୀର ଏକ ବିରାଟ ପଥରରେ ଛେଚି ହୋଇଯାଇଥିଲା ।
ପ୍ରେମିକା ଜଣକ ମରିଗଲା କି ନାହିଁ, ଜାଣିବାକୁ ଦେବାଶିଷ ଖଣି ତଳକୁ ଯାଇଥିଲା । ସେତେବେଳକୁ ନିରୁପମା ଦରମରା ହୋଇ ବଞ୍ଚାଅ ବଞ୍ଚାଅ ବୋଲି ଚିତ୍କାର କରୁଥିଲେ। ଦେବାଶିଷ ଏକ ପଥର ବାନ୍ଧି ନିରୁପମାଙ୍କୁ ଗଭୀର ଖଣି ପାଣି ଭିତରକୁ ଗଡ଼େଇ ଦେଇଥିଲା । ଆଉ କଳିଙ୍ଗ ମୁଣ୍ଡିଆରୁ ଚୁପ୍ଚାପ୍ ପଳାଇ ଆସିଥିଲା । ଜାନୁଆରୀ ୨୭ରେ ସମରଜିତ୍ ଭରତପୁର ଥାନାରେ ନିରୁପମାଙ୍କ ନିଖୋଜ ନେଇ ଏତଲା ଦେଇଥିଲେ । ପୁଲିସ ନିଖୋଜ ମାମଲା ରୁଜୁ କରି କାମ ତୁଟାଇ ଦେଇଥିଲା ।
ନିକଟରେ ମୃତକଙ୍କ ବାପା ଶରତ ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠରେ ନ୍ୟାୟ ପାଇଁ ଗୁହାରି କରିଥିଲେ । ତା’ ପରେ ପୁଲିସ ତଦନ୍ତ ଆଗେଇଥିଲା । ନିରୁପମାଙ୍କ ମୋବାଇଲ୍ର କଲ୍ ଡିଟେଲ୍ସ ରେକର୍ଡ(ସିଡିଆର) ରିପୋର୍ଟ ଯାଞ୍ଚ ପରେ ପୁରୁଷବନ୍ଧୁ ଦେବାଶିଷ ସନ୍ଦେହ ଘେରକୁ ଆସିଥିଲା । ଦେବାଶିଷକୁ ଆଣି ୩ ଦିନ ଧରି ଥାନାରେ ଜେରା କରିବା ପରେ ଶେଷରେ ସେ ସତ ମାନିଥିଲା ।
ଭରତପୁର ଥାନା ପୁଲିସ ଶୁକ୍ରବାର ହତ୍ୟା ଅଭିଯୁକ୍ତକୁ ସାଙ୍ଗରେ ଧରି ତାପଙ୍ଗ ନିଜିଗଡ଼କୁ ଯାଇଥିଲା । ସ୍ଥାନୀୟ ପୁଲିସ ବି ଉପସ୍ଥିତ ଥିଲା । ସେଠାରେ ମୃତକଙ୍କ ବାପା ଏବଂ ଭାଇ କଙ୍କାଳରେ ଥିବା ଚିରା ଛିଣ୍ଡା ପୋଷାକରୁ ଝିଅକୁ ଚିହ୍ନଟ କରିଥିଲେ । ପୁଲିସ କଙ୍କାଳକୁ ବ୍ୟବଚ୍ଛେଦ ପାଇଁ ଭୁବନେଶ୍ୱର ଏମ୍ସକୁ ପଠାଇଛି
