କଟକ,୩୧/୦୧: ବାରବାଟୀ ଷ୍ଟାଡିୟମ୍ ଠାରେ ଆସନ୍ତା ଫେବ୍ରୁଆରୀ ୯ତାରିଖରେ ଭାରତ-ଇଂଲଣ୍ଡ ଦିନିକିଆ ମ୍ୟାଚ୍ ଖେଳାଯିବ । ଏନେଇ ପ୍ରସ୍ତୁତି ଜୋରଦାର ଚାଲିଛି । ଦର୍ଶକଙ୍କ ସୁବିଧାକୁ ଗୁରୁତ୍ୱ ଦେଇ ଚଳିତ ଥର ଓଡ଼ିଶା କ୍ରିକେଟ ଆସୋସିଏସନ (ଓସିଏ) କେତେକ ନୂଆ ପଦକ୍ଷେପ ନେବାକୁ ଯାଉଛି । ପ୍ରଥମଥର ପ୍ରତ୍ୟେକ ସିଟ୍ରେ ରେଡିୟମ ଷ୍ଟିକର୍ ଲାଗିବ । ଏଥିରେ ନମ୍ବର ଲେଖାଯିବ । ସନ୍ଧ୍ୟା ହେବା ପରେ ପ୍ରତ୍ୟେକ ସିଟ୍ ସହଜରେ ଚିହ୍ନି ପାରିବେ ଦର୍ଶକ । ତେବେ ମ୍ୟାଚରେ ବିରତି ସମୟରେ ଷ୍ଟାଡିୟମର ଫ୍ଲଡ ଲାଇଟ୍ ବନ୍ଦ କରାଯିବ । ସମ୍ପୂର୍ଣ୍ଣ ଷ୍ଟାଡିୟମଟି ରେଡିୟମ ଲାଇଟ୍ରେ ଚିକମିକ୍ କରିବ । ଏଭଳି କିଛି ବ୍ୟବସ୍ଥା ହେବ ବୋଲି ଜଣାପଡ଼ଛି । ଏଥିପାଇଁ ଯୋଜନା ମଧ୍ୟ ଚୂଡାନ୍ତ ହୋଇସାରିଲାଣି । ଶୁକ୍ରବାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ବାରବାଟୀ ଷ୍ଟାଡିୟମ ପରିଦର୍ଶନରେ ଆସି ମ୍ୟାଚ୍ ପ୍ରସ୍ତୁତିର ସମୀକ୍ଷା କରିବେ ବୋଲି ଓସିଏ ପକ୍ଷରୁ ସୂଚନା ଦିଆଯାଇଛି ।
ବିଗତ କିଛି ବର୍ଷ ହେବ ବାରବାଟୀରେ ସିଟ୍ ନମ୍ବରିଂ ବ୍ୟବସ୍ଥା ଗ୍ରହଣ କରାଯାଇଛି । ପୂର୍ବରୁ ଗ୍ୟାଲେରୀ ଗୁଡିକରେ ଏହା ଦେଖିବାକୁ ମିଳୁନଥିଲା । ଆଗାମୀ ମ୍ୟାଚରେ ଆକର୍ଷଣ ଭରିବା ପାଇଁ ଓସିଏ ରେଡିୟମ ଷ୍ଟିକର ଲଗାଇବା ପାଇଁ ଯୋଜନା କରିଛି । ଷ୍ଟିକର ଗୁଡିକ ଖୁବ ପତଳା ରହିବ । ଯଦ୍ୱାରା ଦର୍ଶକ ଏହାକୁ ସହଜରେ ଛଡ଼ାଇ ପାରିବେ ନାହିଁ । ରାତି ହେବା ପରେ ଷ୍ଟିକର ଗୁଡିକ ଚିକମିକ୍ କରିବ । ବାରବାଟୀରେ ଏହା ଏକ ଭିନ୍ନ ଅନୁଭୂତି ଦେବ ବୋଲି ଆଶା ରଖିଛି ଓସିଏ ।
ସେହିପରି ପାଣି ବୋତଲ ପ୍ରବେଶ ଉପରେ କଟକଣା ଲାଗିଥିଲେ ସୁଦ୍ଧା ବାରବାଟୀରେ ଜାଲି ବନ୍ଧା ହେବ । ବିଭିନ୍ନ ଗ୍ୟାଲେରୀ ସମ୍ମୁଖରେ ବାଉଁଶ ଜରିଆରେ ପୂର୍ବରୁ ଜାଲି ବନ୍ଧା ହେଉଥିଲା । ପାଣି ବୋତଲ ବ୍ୟତୀତ ଅନ୍ୟ କୌଣସି ସାମଗ୍ରୀ ଦର୍ଶକମାନେ ପଡ଼ିଆ ଭିତରକୁ ଫିଙ୍ଗି ନପାରିବା ଭଳି ବ୍ୟବସ୍ଥା ହୋଇଛି । ହେଲେ ବାଉଁଶ ବନ୍ଧା ହେଉଥିବାରୁ କିଛି ନିର୍ଦ୍ଦିଷ୍ଟ ସ୍ଥାନରେ ବସୁଥିବା ଦର୍ଶକ ଖେଳ ଉପଭୋଗ କରି ପାରୁନଥିଲେ । ଏଥରେ ମଧ୍ୟ ପରିବର୍ତ୍ତନ ଅଣାଯିବ । ଆଗାମୀ ମ୍ୟାଚ୍ରେ ଗ୍ୟାଲେରୀ ସମ୍ମୁଖରେ ଆଉ ବାଉଁଶ ଦେଖିବାକୁ ମିଳିବ ନାହିଁ । ତାର ଦ୍ୱାରା ଜାଲି ବାନ୍ଧିବା ପାଇଁ ଓସିଏ ଯୋଜନା କରିଛି ।
ବାରବାଟୀରେ ନାହିଁ ସ୍ଥାୟୀ ଅଗ୍ନି ନିରାପତ୍ତା, ରାଜସ୍ୱ ଓ ବିପର୍ଯ୍ୟୟ ପ୍ରଶମନ ବିଭାଗକୁ ଚିଠି ଲେଖିଲେ ଅଗ୍ନିଶମ ଡିଜି
