କଟକ,୨୬/୦୧: ବାରବାଟୀ ଷ୍ଟାଡିୟମ୍ରେ ଆସନ୍ତା ଫେବ୍ରୁଆରୀ ୯ ତାରିଖରେ ଭାରତ-ଇଂଲଣ୍ଡ ଦିନିକିଆ ମ୍ୟାଚ୍ ଖେଳାଯିବ । ଏନେଇ ଆୟୋଜକ ଓଡ଼ିଶା କ୍ରିକେଟ୍ ଆସୋସିଏସନ୍ (ଓସିଏ) ତରଫରୁ ପ୍ରସ୍ତୁତି ଜୋର୍ଦାର କରାଯାଇଛି । ଏତେ ବଡ଼ ଆୟୋଜନ ପାଇଁ ପ୍ରସ୍ତୁତି କରାଯାଉଥିବା ବେଳେ ବାରବାଟୀ ଷ୍ଟାଡିୟମ୍ରେ ଏବେ ଯାଏ ସ୍ଥାୟୀ ଅଗ୍ନି ନିରାପତ୍ତା ବ୍ୟବସ୍ଥା ନାହିଁ । ଗୁରୁତ୍ୱପୂର୍ଣ୍ଣ ହେଲା, ମାତ୍ର ୧୫ ଦିନ ତଳେ ରାଜସ୍ୱ ଓ ବିପର୍ଯ୍ୟୟ ପ୍ରଶମନ ବିଭାଗକୁ ଏ ବାବଦରେ ଚିଠି ଲେଖି ଅବଗତ କରାଇଛନ୍ତି ଅଗ୍ନିଶମ ଡିଜି । ବାରବାଟୀ ଷ୍ଟାଡିୟମ୍ରେ ବିନା ଅଗ୍ନିଶମ ପ୍ରମାଣପତ୍ରରେ ସାଧାରଣ ଲୋକଙ୍କ ପାଇଁ ଉଦ୍ଦିଷ୍ଟ କାର୍ଯ୍ୟକ୍ରମ କରାଯାଉଥିବା ନେଇ ସରକାରଙ୍କ ଦୃଷ୍ଟି ଆକର୍ଷଣ କରିଛି ଅଗ୍ନିଶମ ବିଭାଗ ।
ଅଗ୍ନିଶମ ବିଭାଗ କିଛି ନିର୍ଦ୍ଦିଷ୍ଟ ଦିଗ ପ୍ରତି ଦୃଷ୍ଟି ଦେବାକୁ ଉଲ୍ଲେଖ କରାଯାଇଛି । ପ୍ରେସ୍ ବକ୍ସ, କର୍ପୋରେଟ ବକ୍ସ, ଭିଭିଆଇପି ବକ୍ସରେ ଲଗାଯାଇଥିବା ପୁରୁଣା ଏସି ସଟ୍ସର୍କିଟ୍ ହେବାର ସମ୍ଭାବନା ଥିବାରୁ ଏହାକୁ ବଦଳାଯାଉ ବୋଲି ପରାମର୍ଶ ଦିଆଯାଇଛି । ଏହାସହ ବିଦ୍ୟୁତ୍ ସଂଯୋଗ ଥିବା ଡିଜି ସେଟ୍, ଇଲୋକ୍ଟ୍ରୋନିକ ପ୍ୟାନେଲ୍ ବୋର୍ଡ, ଟ୍ରାନ୍ସଫର୍ମର୍, ଏସି ଆଦିର ଯାଞ୍ଚ୍ କରିବା ସହ ଇଲେକ୍ଟ୍ରି ସାର୍ଟିଫିକେଟ ଦେବା ପାଇଁ କହିଛି ଅଗ୍ନିଶମ ବିଭାଗ । ଏହାସହ କନଫରେନ୍ସ ହଲ୍, ନ୍ୟୁ ପ୍ୟାଭିଲିୟନ୍, ଅଲିମ୍ପିକ ଆସୋସିଏସନ୍, କର୍ପୋରେଟ ବକ୍ସ ଆଦିରେ ଅସ୍ଥାୟୀ ଶିଡି ନିର୍ମାଣ ପାଇଁ ମଧ୍ୟ ପରାମର୍ଶ ଦେଇଛି ।
ସେପଟେ ଅଗ୍ନିଶମ ବିଭାଗ ତରଫରୁ ମ୍ୟାଚ ପାଇଁ ପ୍ରସ୍ତୁତି ଜୋର୍ଦାର କରାଯାଇଛି । ରେଞ୍ଜ୍ ଫାୟାର୍ ଅଫିସର୍ ଟି.କେ. ବାବୁଙ୍କ ସୂଚନା ମୁତାବକ, ଅସ୍ଥାୟୀ ଅଗ୍ନି ନିରାପତ୍ତା ବ୍ୟବସ୍ଥା କରାଯାଇଛି । ୮ ଟି ଦମକଳ ଗାଡ଼ି ଷ୍ଟାଡିୟମ୍ ପରିସରରେ ରହିବ । ୧୮୦ ଜଣ ଅଗ୍ନିଶମ କର୍ମଚାରୀ ନିୟୋଜିତ ରହିବେ । ଆଜି ବାରବାଟୀରେ ଭୁବନେଶ୍ୱର ଆଇଆଇଟିର ଏକ ୧୫ ଜଣିଆ ବୈଷୟିକ କମିଟି ମଧ୍ୟ ପୁରା ଷ୍ଟାଡିୟମ ଯାଞ୍ଚ୍ କରିଛନ୍ତି । ଗ୍ୟାଲେରୀ, ପ୍ୟାଭିଲିୟନ ସହ ମ୍ୟାଚ ପାଇଁ ହେଉଥିବା ସମସ୍ତ ଅସ୍ଥାୟୀ ନିର୍ମାଣ ଯାଞ୍ଚ୍ କରିଛନ୍ତି । ଆଇଆଇଟି କର୍ତ୍ତୃପକ୍ଷଙ୍କ ସହ ଓସିଏ କନସଲଟାଣ୍ଟ୍ ଟିମ୍ ମଧ୍ୟ ଏକ ରିପୋର୍ଟ ପ୍ରସ୍ତୁତ କରି ସରକାରଙ୍କୁ ଦେବେ ।
