ଭୁବନେଶ୍ୱର,୧୭/୦୩: ଦେଶରେ ପିଲାଙ୍କଠାରେ ମୋଟାପଣ ଦେଖିବାକୁ ମିଳୁଛି । ବିଶେଷ ଭାବେ ୫ରୁ ୧୯ବର୍ଷ ମଧ୍ୟରେ ଥିବା ପିଲାଙ୍କ ଓଜନ ଅତ୍ୟଧିକ ରହୁଛି । ଏହାକୁ ନେଇ ଚିନ୍ତା ପ୍ରକଟ କରିଛି କେନ୍ଦ୍ର ଶିକ୍ଷା ମନ୍ତ୍ରଣାଳୟ । ତେଣୁ ମଧ୍ୟାହ୍ନଭୋଜନକୁ ସୁଷମ କରିବା ପାଇଁ ନିଆଯାଉଛି ପଦକ୍ଷେପ । ଏଣିକି ମଧ୍ୟାହ୍ନଭୋଜନ ଖାଦ୍ୟରେ କମ୍ ତେଲ ବ୍ୟବହାର ହେବ । ଆଗରୁ ଯେତିକି ତେଲ ବ୍ୟବହାର ହେଉଥିଲା, ତା’ର ୧୦ ପ୍ରତିଶତ ହ୍ରାସ କରାଯିବ । ଫର୍ଟିଫାଏଡ୍ ଭିଟାମିନ୍ ଏ ଓ ଡି ଯୁକ୍ତ ଖାଇବା ତେଲ ବ୍ୟବହାର ହେବ । ଡବଲ ଫର୍ଟିଫାଏଡ୍ ଲୁଣ ବ୍ୟବହାର କରାଯିବ । ଏପରିକି କମ୍ ଲୁଣ ମଧ୍ୟ ବ୍ୟବହାର ହେବ । ଏଥିସହ ନ୍ୟୁଟ୍ରିସିଆନ୍ଙ୍କ ପରାମର୍ଶ ନିଆଯିବ । ଜଣେ ଶିକ୍ଷାର୍ଥୀଙ୍କୁ ସ୍ୱାସ୍ଥ୍ୟ ଆମ୍ବାସାଡାର ଭାବେ ନିଯୁକ୍ତି ଦିଆଯିବ । ଏପରି ନିଷ୍ପତ୍ତି ନେଇଛି କେନ୍ଦ୍ର ଶିକ୍ଷା ମନ୍ତ୍ରଣାଳୟ ।
ମନ୍ତ୍ରଣାଳୟ ପକ୍ଷରୁ ସମସ୍ତ ରାଜ୍ୟର ମୁଖ୍ୟଶାସନ ସଚିବ, ଶିକ୍ଷା ବିଭାଗର ପ୍ରମୁଖ ଶାସନ ସଚିବ, ସମଗ୍ର ଶିକ୍ଷାର ସ୍ୱତନ୍ତ୍ର ପ୍ରକଳ୍ପ ନିର୍ଦ୍ଦେଶକ,ଏନ୍ସିଇଆର୍ଟି ନିର୍ଦ୍ଦେଶକ, ସିବିଏସ୍ଇ ଅଧ୍ୟକ୍ଷ, କେନ୍ଦ୍ରୀୟ ବିଦ୍ୟାଳୟ ଓ ନବୋଦୟ ବିଦ୍ୟାଳୟ ସଂଗଠନର କମିଶନରଙ୍କୁ ଚିଠି ହୋଇଛି ।
ଏଥିରେ କୁହାଯାଇଛି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପରୀକ୍ଷା ପେ ଚର୍ଚ୍ଚା କାର୍ଯ୍ୟକ୍ରମ ସମୟରେ ପିଲାଙ୍କଠାରେ ଦେଖାଯାଉଥିବା ମୋଟାପଣକୁ ନେଇ ଚିନ୍ତା ପ୍ରକଟ କରିଛନ୍ତି । ଏପିରକି ଏକ ଜର୍ଣ୍ଣାଲରେ ଏସମ୍ପର୍କରେ ମଧ୍ୟ ପ୍ରକାଶ ପାଇଛି । ଯାହା ଖାଇବା ପିଇବା ଶୈଳୀରେ ପରିବର୍ତ୍ତନ ନେଇ ଏପରି ଦେଖାଯାଉଛି ବୋଲି କୁହାଯାଇଛି । ତେଣୁ ରନ୍ଧନ ହେଉଥିବା ଖାଦ୍ୟରେ ୧୦ ପ୍ରତିଶତ ଖାଇବା ତେଲର ବ୍ୟବହାର ହ୍ରାସ କରାଯିବ ।
ଏ ସମ୍ପର୍କରେ ଅଭିଭାବକ, ଶିକ୍ଷକଙ୍କୁ ସଚେତନ କରାଯିବ । ପିଏମ୍ ପୋଷଣ ଯୋଜନାରେ ଦିଆଯାଉଥିବା ମଧ୍ୟାହ୍ନ ଭୋଜନକୁ ଅଧିକ ସୁଷମ କରାଯିବ । ପୋଷଣ ଯୁକ୍ତ ଚାଉଳ, ଗହମ, ଡାଲି, ପନିପରିବା ବ୍ୟବହାର ହେବ । ପ୍ରାଥମିକ ଶ୍ରେଣୀ ପିଲାଙ୍କ ପାଇଁ ୫ ଗ୍ରାମ ଓ ଉଚ୍ଚ ପ୍ରାଥମିକ ଶ୍ରେଣୀ ପିଲାଙ୍କ ପାଇଁ ୭.୫ ଗ୍ରାମର ଲୁଣ ବ୍ୟବହାର ହେବ । ସ୍କୁଲରେ ପୋଷଣ ବଗିଚା କରାଯିବ । ସେଠାରୁ ଉତ୍ପାଦିତ ପରିବା ମଧ୍ୟାହ୍ନଭୋଜନରେ ବ୍ୟବହାର ହେବ ।
ଖାଇବା ତେଲ କମ ବ୍ୟବହାର ନେଇ ମଧ୍ୟ ଏକ ସଚେତନତା କାର୍ଯ୍ୟକ୍ରମ ହେବ । ଯେଉଁଥିରେ ସ୍ୱତନ୍ତ୍ର କ୍ଲାସ କରାଯିବ । ଜଣେ ପୋଷଣ ବିଶେଷଜ୍ଞ (ନ୍ୟୁଟ୍ରିସିଆନ୍) ଙ୍କୁ ସ୍କୁଲକୁ ନିମନ୍ତ୍ରଣ କରାଯିବ । ସେ ଏକ ସୂଚନାସମ୍ବଳିତ ଅଧିବେଶନ କରି କମ୍ ଖାଇବା ତେଲ ବ୍ୟବହାରରେ କିପରି ରୋଷେଇ ହୋଇପାରିବ ପରାମର୍ଶ ଦେବେ । ସ୍କୁଲସ୍ତରୀୟ କୁଇଜ୍ ପ୍ରତିଯୋଗିତା ହେବ । ଇକୋ କ୍ଲବ୍ ଆକ୍ଟିଭିଟି କରାଯିବ । ବ୍ୟାୟାମ ଓ ଯୋଗ ନିୟମିତ କରିବାକୁ ପ୍ରୋତ୍ସାହିତ କରାଯିବ । ଛାତ୍ରଛାତ୍ରୀଙ୍କୁ ନେଇ କମ୍ ତେଲରେ କିପରି ରୋଷେଇ ହୋଇପାରିବ ତାର ଏକ ପ୍ରତିଯୋଗିତା ମଧ୍ୟ ହେବ । ଏହାକୁ ସାମାଜିକ ଗଣମାଧ୍ୟମରେ ଅପଲୋଡ୍ କରି ସଚେତନତା ସୃଷ୍ଟି କରାଯିବ । ସ୍କୁଲ ପରିଚାଳନା କମିଟିକୁ ନେଇ ମଧ୍ୟ ବୈଠକ ହେବ ।
