ବେଙ୍ଗାଲୁରୁ: ଏମ. ଚିନ୍ନାସ୍ବାମୀ ଷ୍ଟାଡିୟମରେ ଦଳଚକଟା ଘଟଣା ପୂରା ଦେଶକୁ ଦୋହଲାଇ ଦେଇଛି । ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି)ର ଭିକ୍ଟ୍ରି ସେଲିବ୍ରେସନ୍ ବେଳେ ଘଟିଥିଲା ବଡ଼ ଅଘଟଣ । ଅସମ୍ଭାଳ ଭିଡ଼ ଭିତରେ ଦଳାଚକଟା ଘଟିବାରୁ ୧୧ ଜଣଙ୍କ ଜୀବନ ଯାଇଥିବା ବେଳେ ଅନେକ ଆହତ ହୋଇଛନ୍ତି । ତେବେ ଏତେ ବଡ଼ ଅଘଟଣ ପାଇଁ ଦାୟୀ କିଏ ? କାହାର ଅପାରଗତା ଲାଗି ଗଲା ଜୀବନ ? ଏଭଳି ଅନେକ ପ୍ରଶ୍ନ ଏବେ ଜନ ମାନସରେ ଉଙ୍କି ମାରୁଛି । ଏସବୁ ଭିତରେ ପ୍ରିୟଜନଙ୍କୁ ହରାଇ ବେସାହାରା ହୋଇପଡ଼ିଥିବା ମୃତକଙ୍କ ପରିବାରକୁ ସାହାରା କିଭଳି ମିଳିବ ତାହା ମଧ୍ୟ ବଡ଼ ପ୍ରଶ୍ନବାଚୀ । ଚର୍ଚ୍ଚା ଆଲୋଚନା ମଧ୍ୟରେ ଆରସିବି ଟିମ୍ ମୃତକଙ୍କ ପରିବାର ଲାଗି ୧୦ ଲକ୍ଷ ଟଙ୍କା ଲେଖାଏଁ ସହାୟତା ରାଶି ଘୋଷଣା କରିଛି ।
ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ମ୍ୟାନେଜମେଣ୍ଟ ବୁଧବାର ଏମ ଚିନ୍ନାସ୍ଵାମୀ ଷ୍ଟାଡିୟମରେ ବିଜୟ ଉତ୍ସବ ସମୟରେ ଭୟଙ୍କର ଦଳାଚକଟାରେ ପ୍ରାଣ ହରାଇଥିବା ୧୧ ମୃତକଙ୍କ ପରିବାର ପ୍ରତି ୧୦ ଲକ୍ଷ ଟଙ୍କା ଲେଖାଏଁ ସହାୟତା ରାଶି ଘୋଷଣା କରିଛି। ଆରସିବି ଗୁରୁବାର ନିଜର ପ୍ରେସ ବିବୃତିରେ କହିଛି ଯେ, ଏହି ଘଟଣାରେ ଆରସିବି ପରିବାର ବେଶ ଦୁଃଖିତ ଓ ମର୍ମାହତ। ସମ୍ମାନ ଭାବେ ଦଳ ପ୍ରବନ୍ଧକ ୧୧ ମୃତକଙ୍କ ପରିବାରକୁ ଆର୍ଥିକ ସହାୟତା ପ୍ରଦାନ କରିବେ।
ଆରସିବି ମଙ୍ଗଳବାର ଅହମ୍ମଦାବାଦରେ ଖେଳା ଯାଇଥିବା ଆଇପିଏଲ୍ ଫାଇନାଲରେ ପଞ୍ଜାବ କିଙ୍ଗସକୁ ୬ ରନରେ ହରାଇ ନିଜର ପ୍ରଥମ ଟାଇଟଲ୍ ଜିତିଛି। ଟ୍ରଫି ଜିତିବା ପରେ ବେଙ୍ଗାଲୁରୁରେ ଉତ୍ସବ ପାଳନ ପାଇଁ ସମ୍ମାନ ସମାରୋହ ଆୟୋଜିତ କରାଯାଇଥିଲା। ମାତ୍ର ଷ୍ଟାଡିୟମ ବାହାରେ ଦଳାଚକଟା ହେବାରୁ ୧୧ ଜଣଙ୍କ ମୃତ୍ୟୁ ଘଟିଥିବା ବେଳେ ୫୦ରୁ ଉର୍ଦ୍ଧ୍ଵ ଆହତ ହୋଇଛନ୍ତି । ଦୁର୍ଘଟଣାରେ ଆହତ ପ୍ରଶଂସକଙ୍କ ସହାୟତା ପାଇଁ ‘ଆରସିବି କେୟାର୍ସ’ ନାମରେ ଏକ ସ୍ଵତନ୍ତ୍ର ଫଣ୍ଡ ଆରମ୍ଭ କରାଯାଇଛି।
ସୂଚନାଯୋଗ୍ୟ, ଏମ ଚିନ୍ନାସ୍ବାମୀ ଷ୍ଟାଡିୟମରେ ଦର୍ଶକ ଧାରଣ କ୍ଷମତା ୩୫ ହଜାର ହୋଇଥିବା ବେଳେ ଆରସିବିର ବିଜୟ ଉତ୍ସବ ଦେଖିବାକୁ ପ୍ରାୟ ୫ ଲକ୍ଷ ଲୋକ ଆସିଥିଲେ । ଷ୍ଟାଡିୟମ ବାହାରେ ଅନିୟନ୍ତ୍ରିତ ଭିଡ଼ ଭିତରେ ଦଳାଚକଟା ହେବାରୁ ୧୧ ଜଣଙ୍କ ଜୀବନ ଯାଇଥିବା ବେଳେ ୫୦ରୁ ଅଧିକ ଆହତ ହୋଇଛି । ଭିତରେ ସେଲିବ୍ରେସନ ବାହାରେ ମୃତ୍ୟୁ ରଚିଥିଲା ତାଣ୍ଡବ । ଏଭଳି ଏକ ବଡ଼ ଅଘଟଣ ପାଇଁ ସରକାର ଏବଂ ପ୍ରଶାସନ ମଧ୍ୟରେ ଦୋଷ ଠେଲା ଠେଲି ଚାଲିଛି । କିନ୍ତୁ ଏଥିପାଇଁ ପ୍ରକୃତରେ ଯିଏ ଦୋଷୀ ତାକୁ ଦଣ୍ଡ ମିଳିବା ଦରକାର ବୋଲି ସାଧାରଣରେ ଦାବି ହୋଇଛି ।
