ଭୋପାଳ: ମଧ୍ୟପ୍ରଦେଶର ଭୋପାଳରେ ବିଧାନସଭାର ବଜେଟ ଅଧିବେଶନର ଗୋଟିଏ ଦିନ ପୂର୍ବରୁ କଂଗ୍ରେସ କର୍ମୀମାନେ ବିଧାନସଭା ଘେରାଉ କରିବା ପାଇଁ ଏକାଠି ହୋଇଥିଲେ । ରଙ୍ଗମହଲ ଛକରେ ପ୍ରତିବାଦ ସମୟରେ କଂଗ୍ରେସର ମଞ୍ଚ ଭୁଶୁଡ଼ି ପଡ଼ିଥିଲା। ମଞ୍ଚ ଭୁଶୁଡ଼ି ପଡ଼ିବା ଯୋଗୁଁ ୭ ରୁ ଅଧିକ କଂଗ୍ରେସ କର୍ମୀ ଆହତ ହୋଇଛନ୍ତି । ଆହତଙ୍କ ମଧ୍ୟରେ ମଧ୍ୟପ୍ରଦେଶ କିଷାନ କଂଗ୍ରେସର ରାଜ୍ୟ ସଭାପତି ଧର୍ମେନ୍ଦ୍ର ସିଂହ ଚୌହାନ ଅଛନ୍ତି ।
ସେହିଭଳି କଂଗ୍ରେସ ନେତା ଜିତୁ ପଟୱାରୀ, ହରିଶ ଚୌଧୁରୀ, ରାଜୀବ ସିଂହ ଆହତ ମଧ୍ୟ ହୋଇଛନ୍ତି । ଏହି ଦୁର୍ଘଟଣାରେ ଅନେକ ମହିଳା ଶ୍ରମିକ ଗୁରୁତର ଆହତ ମଧ୍ୟ ହୋଇଛନ୍ତି । ଆହତମାନଙ୍କୁ ଡାକ୍ତରଖାନା ନେବା ପାଇଁ ଘଟଣାସ୍ଥଳରେ ଏକ ଆମ୍ବୁଲାନ୍ସ ଡକାଯାଇଥିଲା । ଆମ୍ବୁଲାନ୍ସ ଠିକ୍ ସମୟରେ ନ ପହଞ୍ଚିବା ଯୋଗୁଁ, ଲୋକଙ୍କୁ ପରସ୍ପରର ବ୍ୟକ୍ତିଗତ ଗାଡ଼ି ବ୍ୟବହାର କରି ଡାକ୍ତରଖାନା ପହଞ୍ଚିବାକୁ ପଡିଥିଲା । ପ୍ରଦର୍ଶନ ସମୟରେ ମଞ୍ଚ ଭୁଶୁଡ଼ି ପଡ଼ିବା ମାତ୍ରେ କଂଗ୍ରେସ କର୍ମୀଙ୍କ ପ୍ରତିବାଦ ଆହୁରି ତୀବ୍ର ହୋଇଥିଲା ।
ଆନ୍ଦୋଳନ ଯେମତି ଆହୁରି ବଡ଼ ହୋଇନଯାଉ ,ସେଥିପାଇଁ ପୋଲିସ ଓ୍ବାଟର କ୍ୟାନ୍ ଏବଂ ଲୁହବୁହା ଗ୍ୟାସର ବ୍ୟବହାର କରିଥିଲା । ଘଟଣାସ୍ଥଳରେ ଉପସ୍ଥିତ ବିକ୍ଷୋଭକାରୀଙ୍କ ସଂଖ୍ୟା ଏତେ ଅଧିକ ଥିଲା ଯେ ସେମାନଙ୍କୁ ନିୟନ୍ତ୍ରଣ କରିବା ଲାଗି ପୋଲିସ ନାକେଦମ ହୋଇଥିଲା ।
ପୋଲିସ ପୂର୍ବରୁ ଲୋକଙ୍କୁ ଅଟକାଇବାକୁ ଚେଷ୍ଟା କରୁଥିଲା କିନ୍ତୁ ଯେତେବେଳେ ମଞ୍ଚ ଭାଙ୍ଗିଗଲା କଂଗ୍ରେସ ନେତାମାନେ ଆହୁରି ଉତକ୍ଷିପ୍ତ ହୋଇଉଠିଥିଲେ । ସେମାନେ ହାତରେ ପତାକା ଧରି ପ୍ରତିବାଦ କରିଥିଲେ । ପ୍ରଶାସନ ସେମାନଙ୍କୁ ରୋକିବା ପାଇଁ ଯଥାସମ୍ଭବ ଚେଷ୍ଟା କରିଥିଲା । କିନ୍ତୁ ପ୍ରଦର୍ଶନକାରୀମାନେ ପୋଲିସ ଏବଂ ପ୍ରଶାସନକୁ ଭ୍ରୁକ୍ଷେପ କରିନଥିଲେ ।
ସକାଳ ପାଖରୁ ମଞ୍ଚ ସଜାଯାଉଥିଲା, ତଥାପି ହଠାତ୍ ମଞ୍ଚ ଭୁଶୁଡ଼ି ପଡ଼ିବା ଦେଖି ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ । ପୂର୍ବତନ କୃଷି ମନ୍ତ୍ରୀ ସଚିନ ଯାଦବ ଏବଂ ଯୁବ କଂଗ୍ରେସ ସଭାପତି ବ୍ୟାରିକେଡ୍ ଉପରେ ଚଢ଼ି ପ୍ରତିବାଦ କରିଥିଲେ। ଜିତୁ ପଟୱାରୀ କହିଛନ୍ତି ଯେ, ଏପରି ପ୍ରତିବାଦ ଜାରି ରହିବ ଏବଂ ଚାଷୀଙ୍କ ସମସ୍ୟା ଉଠାଯିବ।
