ନୂଆଦିଲ୍ଲୀ,୨୮/୧୨: କେରଳ ଓ୍ବାୟାନାଡ଼ର କଂଗ୍ରେସ ନେତା ଓ ତାଙ୍କ ପୁଅ ବିଷ ଜନିତ ମୃତ୍ୟୁ ହୋଇଛି । ଏନେଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିବା ସହ ଆରମ୍ଭ କରିଛି ତଦନ୍ତ । ତେବେ କଂଗ୍ରେସ କମିଟି କୋଷାଧ୍ୟକ୍ଷ ତଥା ସୁଲତାନ ବାଥେରୀ ପଞ୍ଚାୟତର ପୂର୍ବତନ ସଭାପତି ୭୮ ବର୍ଷୀୟ ଏନଏମ ବିଜୟ ଓ ତାଙ୍କର ୩୮ ବର୍ଷୟ ପୁଅ ଜିଜେଶଙ୍କୁ ବିଷ ଦେଇ ହତ୍ୟା କରାଯାଇଥିବା ଅଭିଯୋଗ କରିଛନ୍ତି ପରିବାର ଲୋକେ । ମୃତଦେହ ବ୍ୟବଚ୍ଛେଦ ରିପୋର୍ଚ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପୋଲିସ କହିଛି।
ପରିବାର ସଦସ୍ୟଙ୍କ ସୂଚନା ଅନୁଯାୟୀ,ତାଙ୍କର ଶେଷ ରୀତିନୀତି ଅପରାହ୍ନ ୫ଟାରେ ସୁଲତାନ ବାଥେରୀସ୍ଥିତ ତାଙ୍କ ଘରେ କରାଯିବା ପାଇଁ ଯୋଜନା କରାଯାଇଛି। ପୋଲିସ କହିଛି ଯେ ବିଜୟ ଏବଂ ଜିଜେଶଙ୍କୁ ବିଷ ଦେଇ ହତ୍ୟା କରାଯାଇଥିବା ଅଭିଯୋଗ ହୋଇଛି । ଅଭିଯୋଗ ପରେ ସେମାନଙ୍କୁ ଉଦ୍ଧାର କରାଯାଇ ପ୍ରଥମେ ଏକ ଲଘରୋଇ ଡ଼ାକ୍ତରଖାନାରେ ଭର୍ତ୍ତି କରାଯାଇଥିଲା । ପରେ ତାଙ୍କୁ କୋଜିକୋଡେ ମେଡିକାଲ କଲେଜକୁ ପଠାଯାଇଥିଲା । ହେଲେ ସେଠାରେ ଡ଼ାକ୍ତର ସେମାନଙ୍କୁ ମୃତ ଘୋଷଣା କରିଥିଲେ । ସେପଟେ ପ୍ରାଥମିକ ତଦନ୍ତରୁ ଘରୁ କୌଣସି ସୁଇସାଇଡ଼ ନୋଟ ମିଳିନଥିବା ଜଣାପଡିଛି। ଅଧିକାରୀ କହିଛନ୍ତି ଯେ,ତାଙ୍କ ଘରେ ଖୋଜାଖୋଜି କରାଯାଇଥିଲା କିନ୍ତୁ ଆତ୍ମହତ୍ୟା ନୋଟ୍ ମିଳି ନଥିଲା। ବିଜୟ ୱାୟାନଡରେ ଜଣେ ବିଶିଷ୍ଟ କଂଗ୍ରେସ ନେତା ଥିଲେ। ସେପଟେ ସୁଲତାନ ବାଥେରୀ କୋଅପରେଟିଭ ବ୍ୟାଙ୍କର ପୂର୍ବତନ କର୍ମଚାରୀ ଜିଜେଶ ଦୀର୍ଘ ଦିନ ଧରି ସ୍ୱାସ୍ଥ୍ୟଗତ ସମସ୍ୟାରେ ଅସୁସ୍ଥ ଥିଲେ। ପତ୍ନୀ ସୁମାଙ୍କ ମୃତ୍ୟୁ ପରେ ବିଜୟ ନିଜ ପୁଅ ଜିଜେଶଙ୍କର ଯତ୍ନ ନେଉଥିଲେ। ତେବେ ମୃତଦେହ ସନ୍ଦେହଜନକ ଅବସ୍ଥାରେ ମିଳିବା ପରେ ପରିବାର ସଦସ୍ୟ ଅଭିଯୋଗ କରିଛନ୍ତି ଯେ ସେ ଆତ୍ମହତ୍ୟା କରିନାହାଁନ୍ତି, ତାଙ୍କୁ ହତ୍ୟା କରିଛନ୍ତି। ଏହା ପୂର୍ବରୁ ପୋଲିସ ଏହା ଆତ୍ମହତ୍ୟା ମାମଲା ବୋଲି ସନ୍ଦେହ କରୁଥିଲା। ବର୍ତ୍ତମାନ ପୋଲିସ ଏହି ଘଟଣାରେ ନିଜେ ଅନୁସନ୍ଧାନ କରିବ ବୋଲି ସୂଚନା ଦେଇଛି ।
