ଭୁବନେଶ୍ୱର, ୧୩/୦୪: ବଲାଙ୍ଗିର ଜିଲ୍ଲା ମୁରିବାହାଲ ଥାନା ହଳଦୀ ପଞ୍ଚାୟତ କର୍ଲାପିଟା ଗାଁରେ ଅଭାବନୀୟ ଘଟଣା ଘଟିଛି । ଗାଁରେ ଷୋହଳ ପ୍ରହରୀ ନାମଯଜ୍ଞ ଚାଲୁଥିବା ବେଳେ ବୃଦ୍ଧଙ୍କୁ ଠେଙ୍ଗାରେ ପିଟି ପିଟି ହତ୍ୟା କରାଯାଇଥିବା ଘଟଣା ସାମ୍ନାକୁ ଆସିଛି । ଏହି ଘଟଣାରେ ଅଭିଯୁକ୍ତ ପୁରନ୍ଦର ଧରୁଆକୁ ପୋଲିସ ଗିରଫ କରିଛି ।
ସୂଚନା ମୁତାବକ, ଗାଁରେ ଷୋହଳ ପ୍ରହରୀ ନାମଯଜ୍ଞ ଚାଲିଥିଲା। ଆଧ୍ୟାତ୍ମିକ ପରିବେଶରେ ମସଗୁଲ ଥିଲେ ଗାଁ ଲୋକେ । ଜେଲ୍ ଯାଇ ଫେରିଥିବା ପୁରନ୍ଦର ଧରୁଆ ନାମଯଜ୍ଞ ଦେଖୁଥିବା ବିଭୀଷଣ ଧରୁଆକୁ ଅତର୍କିତ ଭାବେ ଠେଙ୍ଗାରେ ଆକ୍ରମଣ କରିଥିଲା । ଘଟଣାସ୍ଥଳରେ ବିଭୀଷଣ ଧରୁଆଙ୍କ ମୃତ୍ୟୁ ଘଟିଛି । ଖବର ପାଇ ମୁରିବାହାଲ ପୋଲିସ, କଣ୍ଟାବାଞ୍ଜି ଏସଡ଼ିପିଓ, ସାଇଣ୍ଟିଫିକ ଟିମ୍ ପହଞ୍ଚି ତଦନ୍ତ କରିଛି । ହତ୍ୟାକାରୀ ପୁରନ୍ଦର ଧରୁଆକୁ ପୋଲିସ ଗିରଫ କରିଛି । ତେବେ ପୂର୍ବରୁ ହତ୍ୟାକାରୀର ବିଭିନ୍ନ ସମୟରେ ମୃତକଙ୍କ ସହିତ ମାରପିଟ, କଳି ଝଗଡା ଲାଗି ରହୁଥିଲା । ପୂର୍ବ ଶତ୍ରୁତାରୁ ଏହି ହତ୍ୟାକାଣ୍ଡ ଘଟିଥିବା ପ୍ରାଥମିକ ସୂଚନାରୁ ଜାଣିବାକୁ ପାଇଛି ।
